ދިވެހިރާއްޖޭގެ އިސްލާމިކް ޔުނިވަރސިޓީގެ ކުރީގެ ޗާންސެލަރު އަދި ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދުގެ ޚާއްސަ ދީނީ ދަރުހެއް ވޮއިސްގެ ފޭސްބުކް ޕޭޖުން ދުރަށް ދައްކާގޮތަށް ހަމަޖައްސައިފިއެވެ.

"ރަމަޟާން: އުންމީދުން ފުރިގެންވާ މައްސަރު" މި ނަމުގައި ޑރ.ޝަހީމް ހުށައަޅުއްވައިދެއްވާ ދަރުސް އޮންނާނީ މިމަހުގެ 22 ވަނަ ދުވަހުގައެވެ. މި ދަރުސް ކުރިއަށްދާނީ ރާއްޖޭގެ ގަޑިން އެރޭ  21:15 އިން 21:45 އާއި ދެމެދުގައެވެ. މި ދަރުސް ވޮއިސްގެ ފޭސްބުކް ޕޭޖުން ފެންނާނެއެވެ.

ފާހަގަކޮށްލެވޭ ގޮތުގައި ކުރިއަށް އޮތް ރަމަޟާން މަހުގެ ކޮންމެ ދުވަހަކު ހަވީރު  16:45 އިން 17:15 އަށް ޑރ.ޝަހީމްގެ ފޭސްބުކް ޕޭޖް މެދުވެރިކޮށްވެސް ދަރުސްތަކެއް ހުށައެޅުމަށް ވަނީ ނިންމާފައެވެ.

ޑރ. ޝަހީމް ދަރުސް ދެއްވަން ނިންމަވާފައިވާ މައުޟޫތައް

1- އިސްލާމީ އިޖްތިމާޢީ ނިޒާމު: މިޒަމާނުގެ ގޮންޖެހުންތަކާއި އޭގެ ޙައްލު

2- އިސްލާމީ އުންމަތުގެ ނަމޫނާ ލީޑަރުންނާއި ފިޤުހުވެރިންނާއި ސައެންސްވެރިން

3- އިސްލާމީ ޝަރީޢަތުގެ މަޤުޞަދުތަކުގެ އަލީގައި އިޤުތިޞާދީ ގޮތުންނާއި ޢުމްރާނީ ގޮތުން ޤައުމެއް ތަރައްޤީކުރުން

4- ތައުޙީދުގެ އަސާސްތަކުގެ މަތީގައި އިންސާނިއްޔަތާއި ޙަޟާރަތު ބިނާކުރުން

5- ކީރިތި ޤުރުއާނާއި ސުންނަތުގެ ދުޢާތައް

6- ކީރިތި ޤުރުއާނައި ސުންނަތުގެ އަލީގައި އިންސާނާއާ ގުޅުން ހުރި ކަންކަން