ދިވެހިރާއްޖޭގައި ހަރަކާތްތެރިވަމުންދާ މަސައްކަތްތެރިންގެ އެންމެ ބޮޑު އާބާދީކަމުގައިވާ ބަންގްލަދޭޝްގެ ރައްޔިތުންނަށް އަމާޒުކޮށް، ވޮއިސްގެ ބެންގާލީ އެޑިޝަން (www.voice.mv/bn) އިފްތިތާހްކޮށްފިއެވެ.

މި އެޑިޝަން އުފެއްދުމުގެ މަގްސަދަކީ މިހާރު ފެތުރެމުންދާ ކޮވިޑް-19ގެ ބަލިމަޑުކަމުގެ މައުލޫމާތާއި އަދި އެކަމާއި ގުޅިގެން ސަރުކާރުން އަޅަމުންދާ މުހިންމު ފިޔަވަޅުތަކުގެ މައުލޫމާތު ބިދޭސީންނަށް އެފަރާތްތައް ބަސްމޮށެ އުޅޭ ބަހުން ފޯރުކޮށްދިނުމެވެ.

ވޮއިސް ބެންގާލީ އެޑިޝަނާއި ބެހޭގޮތުން މައުލޫމާތުދެއްވަމުން ވޮއިސްގެ ޗީފް އެޑިޓަރ ޝަފްރާޒް އަހުމަދު ހުސައިން ވިދާޅުވީ މި އެޑިޝަން މެދުވެރިކޮށް ބިދޭސީންނަށް ކޮވިޑް-19ގެ ކަންތައްތަކާއި ގުޅޭ އެންމެ ފަހުގެ މައުލޫމާތު ފޯރުކޮށްދެވިގެން ދާނެކަމަށާއި، މިއީ ދިވެހިރާއްޖޭގައި މިފަދަ ގޮތަކަށް ނޫހެއްގެ އެޑިޝަނެއް ހެދިގެންދާ ފުރަތަމަ ފަހަރުކަން އުފަލާއި އެކު ފާހަގަކުރައްވާ ކަމަށެވެ.

ޝަފްރާޒް ވިދާޅުވީ މި އެޑިޝަނަށް ބޭނުންވާނެ ޚަބަރުތައް ތަރުޖަމާކުރުމުގެ މަސައްކަތް ކުރަމުންދާނީ ދިވެހިރާއްޖޭގައި ހަރަކާތްތެރިވާ ބިދޭސީން ކަމަށާއި، އެފަރާތްތަކުގެ ލިޔުންތައް ޝާއިއުކުރުމުގެ ކުރިން ވޮއިސް އެޑިޓޯރިއަލް އިން އިތުރަށް ބެލުމަށްފަހު ހަބަރުތައް ޝާއިއުކުރެވިގެންދާނެއެވެ. މިކަމުގައި ރާއްޖޭގައި ހަރަކާތްތެރިވާ ބައެއް ޖަމިއްޔާ ޖަމާއަތްތަކުން އެހީތެރިކަން ފޯރުކޮށްދިނުމަށް ވަނީ ނިންމާފައެވެ.

މި އެޑިޝަންގެ މަސައްކަތުގައި ހެލްތު ޕްރޮޓެކްޝަން އޭޖެންސީގެ ފަރާތުން ދެއްވާ އެހީތެރިކަން ފާހަގަކޮށް، އެފަރާތްތަކަށް ވޮއިސްގެ މުޅި ޓީމްގެ ނަމުގައި ޝުކުރު އަދާކުރަމެވެ. ބެންގާލީ އެޑިޝަން ނެރެމުން ދަނީ ސަރުކާރު އޮފީސްތައް ބަންދު ވުމުގެ ސަބަބުން މިނިސްޓްރީ އޮފް ހޯމް އެފެއާޒް އިން ބެންގާލީ ބަހުން ނޫސް ނެރުމަށް ދީފައިވާ ހާއްސަ ހުއްދައެއްގެ ދަށުންނެވެ.

ވޮއިސް ބެންގާލީ އެޑިޝަން ލޯންޗްކުރުމާއި އެކު މި ނޫސް ވެގެންދާނީ ދިވެހިރާއްޖޭގައި ތިން ބަހުން ޚަބަރުތައް ޝާއިއުކުރާ ފުރަތަމަ މީޑިޔާއަށެވެ.

މި ފުރުސަތުގައި ކޮވިޑް-19ގެ ޚަބަރުތަކާއި އަދި އެހެނިހެން ޚަބަރުތަކަށްވެސް ކިޔުންތެރިންގެ ފަރާތުން ވޮއިސްއަށް ލިބޭ އެއްބާރުލުމަށް ފަށްފަށުން ޝުކުރު އަދާކުރަމެވެ. އަދި ވޮއިސްގެ އެހެނިހެން އެޑިޝަންތައް ފަދައިން މި އެޑިޝަނަށްވެސް ކިޔުންތެރިންގެ ބަލައިގަތުން ލިބޭނެކަމަށް އުންމީދުކުރަމެވެ.