އިއްޔެ ހަވީރު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް، ނޫސްވެރިންނާއި ބައްދަލުވުމުގައި "ވޮއިސް" އިން ކުރި ސުވާލަކަށް ޖަވާބު ދެއްވަމުން އެމަނިކުފާނު ވިދާޅުވީ ހިޔާ ފްލެޓުގެ ޓަވަރެއްގައި 5000 ވަރަކަށް މީހުން ދިރިއުޅޭނެ ކަމަށެވެ.

މިއަދަދު މިއީ އަސްލު އަދަދާއި ވަރަށްބޮޑަށްވެސް ތަފާތު އަދަދަކަށްވާތީ ވަރަށް ގިނަ ބަޔަކުވަނީ މީސް މީޑިއާގައި ރައީސް ޖެއްސެވި ހިސާބަށް ފާޑު ކިޔާފައިއެވެ. އެހެންކަމުން ހިޔާ ފްލެޓްގެ ހަޤީގަތަށް ބަލާލަންޖެހެއެވެ.

ހިޔާ ފްލެޓު ތަކުގައިވަނީ މިހެންނެވެ. ޖުމްލަ ހުރީ 16 ޓަވަރެވެ. އޭގެ ތެރޭގައި އުޅެނީ ދެ ޑިޒައިނެކެވެ.

ފުރަތަމަ 10 ޓަވަރުގައި ކޮންމެ ޓަވަރެއްގައި ހުންނާނި ދެ ކޮޓަރީގެ 392 ދެ އެޕާޓުމަންޓެވެ. ކޮންމެ އެޕާޓުމަންޓެއްގައި 6-4 މީހުން އުޅޭނަމަ އެއް ޓަވަރުގައި އުޅޭނީ 2352-1568 މީހުންނެވެ. މި ޓަވަރު ތަކުގައި ހުންނާނީ 3 ލިފްޓެވެ.

ބާކީ ހުރި 6 ޓަވަރުގައި ހުންނާނީ 2 ކޮޓަރީގެ 490 އެޕާޓުމަންޓެވެ. ކޮންމެ އެޕާޓުމަންޓެއްގައި 6-4 ވަރަކަށް މީހުން އުޅޭނަމަ ޓަވަރެއްގައި އުޅޭނީ 2940-1960 މީހުންނެވެ. މި ހަ ޓަވަރުގައި ހުންނާނީ 4 ލިފްޓެވެ.

ލިފްޓު ތަކުގެ ސައިޒަށް ބަލައިލާއިރު މިއީ އާއްމުކޮށް މާލޭ ގެތަކުން ފެންނަ ލިފްޓާއި ހިލާފަށް އެއްފަހަރާ 14 މީހުންނަށް އެރޭ ވަރުގެ ބޮޑެތި ލިފްޓަތެކެވެ. މިވަރު ލިފްޓު ގިނަ ބަޔަކަށް ފެނިފައި ހުންނާނީ އައި.ޖީ.އެމް.އެޗް ހޮސްޕިޓަލުންނެވެ. މި ލިފްޓުތަކުގެ ސްޕީޑަށް ބަލާއިރު އެންމެ މަތިން ތިރިއަށް އަންނަން ނަގާނީ 35 ސިކުންތެވެ. ޓަވަރެއްގައި ހުންނަން ޖެހެނީ ކިތައް ލިފްޓުކަން ކަނޑައަޅާ އުސޫލުތަކެއް ވެއެވެ. އެއީ މީހުންގެ އަދަދާއި، ލިފްޓުގެ ބޮޑު މިނާއި، އޭގެ ސްޕީޑު އަދި އެ ޕްރޮގްރާމްކޮށްފައި ހުންނަ ގޮތަށް ބަލައި ކަނޑައަޅާ އެއްޗެކެވެ. ހިޔާ ފްލެޓުގެ މަޝްރޫއު ގައި ބޭނުން ކޯށްފައިވަނީ އިނގިރޭސި ވިލާތުގެ ސްޓޭންޑާޑެވެ.

ޓަވަރެއްގައި 5000 މީހުން އުޅޭނެކަމަށް ރައީސް ވިދާޅު ވި އިރު މިހިސާބުތައް އެއްގޮތަކަށްވެސް ދިމަލެއް ނުވެއެވެ. އަދި 5000 މީހުން އުޅޭނެ ކަމަށް ބަލައި ލިފްޓަށް އަރަން 2 ގަޑިއިރު ކިއު ލައިންގައި ތިބެން ޖެހޭނެ ކަމަށް ރައީސް ވިދާޅުވި ވިދާޅުވުންވެސް ދިމަލެއް ނުވެއެވެ. އެއްބަޔަކު މީސް މީޑިއާގައި ވިދާޅުވަނީ ރައީސް އިތުރުފުޅެއް ނަހައްދަވާނެ ކަމަށެވެ. އެވާނީ އޮޅިވަޑައިގަތީ ކަމަށެވެ.