އަދީބުގެ މައްސަލައިގައި ކްރިމިނަލް ކޯޓުން ކުރި ހުކުމް އިސްތިއުނާފްކުރަނީ، ޕީޖީގެ ނުރުހުން ގާޒީއަށް!

14 Jul 2020 | 20:03

ކުރީގެ ނައިބު ރައީސް އަހުމަދު އަދީބުގެ މައްޗަށް ކްރިނިނަލް ކޯޓުގައި އުފުލާފައިވާ ހުރިހާ ދައުވާތަކެއް ބާތިލްކަމަށް ނިންމުމުން، އެ މައްސަލަ އިސްތިއުނާފްކުރުމަށް ޕްރޮސެކިއުޓަރ ޖެނެރަލްގެ އޮފީހުން ނިންމައިފިއެވެ.

މިކަން ހާމަކުރެއްވީ، މިއަދު އޮތް ނޫސްވެރިންގެ ބައްދަލުވުމެއްގައި ޕްރޮސެކިއުޓަރ ޖެނެރަލް އަލްެއުސްތާޛު ހުސައިން ޝަމީމެވެ.

ޕީޖީ ޝަމީމް ވިދާޅުވީ މި މައްސަލަ މިއަދު ނުވަތަ މާދަމާގެ ހެނދުނު ހައިކޯޓުގައި އިސްތިއުނާފް ކުރައްވާނެކަމަށެވެ. ޝަމީމް މިއަދުގެ ނޫސްވެރިންގެ ބައްދަލުވުމުގައި ވަނީ މި މައްސަލަ ބެއްލެވި ގާޒީ އިސްމާއިލް ރަޝީދު މައްސަލައިގައި ހުކުމް ކުރެއްވިގޮތަށް ވަރަށް ބޮޑަށް ފާޑުވިދާޅުވެފައެވެ. އަދި އެބޭފުޅާގެ މައްސަލަ ޖޭއެސްސީއަށް ހުށައަޅުއްވާނެކަމަށްވެސް ވިދާޅުވިއެވެ.

އެގޮތުން ގާޒީ އިސްމާއިލް ރަޝީދު ކުރެއްވި ހުކުމްގައި ޕީޖީއިން ހުށަނާޅާ ލިޔެކިޔުންތަކުން ހުށަނާޅާ މައުލޫމާތުތަކަށާއި، ޝަރީއަތުގެ މަޖިލީހުގައި އަދީބު ވިދާޅުނުވާ ބަސްތަކަކަށް ރިއާޔަތްކުރައްވާފައިވާކަން ޕީޖީ ފާހަގަކުރެއްވިއެވެ. އެއީ ގާނޫނީގޮތުން ހަމަޖެހޭ ގޮތެއްކަމަށް ގަބޫލުފުޅު ނުކުރައްވާކަމަށްވެސް އެބޭފުޅާ ވިދާޅުވިއެވެ.

އަދި މީގެ އިތުރުން މި މައްސަލައިގެ ހުކުމްގައި ގާޒީ އެންމެ ތިންް ފޮޅުވަތް ލިޔުއްވާފައިވާތީވެސް ޕީޖީ ޝަމީމް އެކަމާއި މެދު ސުވާލު އުފެއްދެވިއެވެ. އެގޮތުން އެ ހުކުމް ކުރެއްވި ސަބަބެއް، ހަވާލާދެއްވި މާއްދާއެއް، އަދި ބާތިލް ކުރެއްވީ ކިހިނެެތްކަން އެނގޭކަށް ނެތްކަމަށްވެސް ޕީޖީ ވިދާޅުވިއެވެ.

Advertisement

ކޮމެންޓް