އީރާނުގެ ވިޔަފާރި އުޅަނދަކަށް ޔޫކްރެއިނުން ދިން ހަމަލާއަކީ ޖަވާބު ނުދީ ދޫކޮށްލެވޭނެ ކަމެއް ނޫން ކަމަށް އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވެއްޖެއެވެ.

އާދީއްތަ ދުވަހު އީރާނުން ހާމަކުރި ގޮތުގައި، ކެސްޕިއަން ކަނޑުގައި ދަތުރުކުރަމުންދިޔަ އެ ގައުމުގެ އުޅަނދަކަށް އަމާޒުކޮށް ޔޫކްރެއިނުން ދިން މި ހަމަލާގައި އެއްޗެއް ގޮވައި، އުޅަނދުގައި ހުރި ފަޅުވެރިއަކު ވަނީ މަރުވެފައެވެ. އަދި މި ހާދިސާގައި އިތުރު ފަޅުވެރިއަކަށް އަނިޔާވެފައިވާ ކަމަށްވެސް އީރާނުން މައުލޫމާތު ދެއެވެ.

ޚާރިޖީ ވަޒީރު އަރަގްޗީ މިކަން ހާމަކުރެއްވީ، ޔޫރަޕްގެ އިއްތިހާދުގެ ޚާރިޖީ ސިޔާސަތާ ބެހޭ އިސްވެރިޔާ ކާޖާ ކާލަސް އަދި ރަޝިޔާގެ ޚާރިޖީ ވަޒީރު ސަރްގޭ ލަވްރޯފްއާ ފޯނުން ގުޅުއްވައި ދެއްކެވި ވާހަކަފުޅުގައެވެ.

މިކަމާ ގުޅިގެން ރަޝިޔާގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ، މި ހަމަލާގައި މަރުވި ފަޅުވެރިޔާގެ އާއިލާއަށް ވަޒީރު ލަވްރޯފް ތައުޒިޔާ ފޮނުއްވާފައިވާ ކަމަށެވެ. އަދި އެ އުޅަނދު ދަތުރު ފެށި ރަޝިޔާގެ އަސްޓްރާޚާން ސަރަހައްދުގެ ކަމާބެހޭ ފަރާތްތަކުން، އުޅަނދުގެ ފަޅުވެރިންނަށް ފޯރުކޮށްދިން އެހީތެރިކަމަށް އަރަގްޗީ ޝުކުރު އަދާކުރެއްވި ކަމަށްވެސް ރަޝިޔާގެ ބަޔާނުގައިވެއެވެ.

މީގެ އިތުރުން، ކީވްގެ ސަރުކާރުން ހިންގާ މިފަދަ ނުރައްކާތެރި އަމަލުތައް ހުއްޓުވަން ޖެހޭނެ ކަމަށް އަރަގްޗީ ވިދާޅުވިއެވެ. އަދި މެދުއިރުމަތީގެ މަސްރަހު ފިނިކުރުމަށްޓަކައި އީރާނުން ކުރަމުންދާ ޑިޕްލޮމެޓިކް މަސައްކަތްތަކުގެ މައުލޫމާތުވެސް އީރާނުގެ ޚާރިޖީ ވަޒީރު ވަނީ ރަޝިޔާގެ ޚާރިޖީ ވަޒީރާ ހިއްސާކުރައްވާފައެވެ.