އެއްވެސް ހުއްދައަކާއި ނުލައި ހައްޖުގެ އަޅުކަމަށް ދާ ފަރާތްތަށް 50،000 ރިޔާލުން ޖޫރިމަނާ ކުރަނީ!

ކަމާބެހޭ އެއްވެސް ފަރާތެއްގެ ހުއްދައެއް ނެތި ހައްޖުގެ އަޅުކަން އަދާކުރުމަށްދާ ފަރާތްތަކުން 50،000 ރިޔާލުން ޖޫރިމަނާ ކުރުމަށް ސައުދީ އަރަބިއާ އިން ނިންމައިފިއެވެ.

މިގޮތުން ސައުދީގެ ހައްޖު އެންޑް އުމްރާ މިނިސްޓްރީން ބުނީ ހޯދަންޖެހޭ ހުއްދަ ނުހޯދައި ހައްޖުގެ އަޅުކަން އަދާކުރުމަށް އައުމަކީ ގާނޫނާއި ޚިލާފު ކަމެއް ކަމަށެވެ. އަދި އެފަދައިން ހުއްދަ ނުހޯދާ އަންނަ ފަރާތްތަކުން 50،000 ރިޔާލުން ޖޫރިމަނާކުރެވޭނެ ކަމަށެވެ. ހަމައެހެންމެ ހައްޖުވެރިންނާއި އެކު އަންނަ އެހީތެރިން ވެސް މި އުސޫލުގެ ދަށުން ޖޫރިމަނާ ކުރެވޭނެ ކަމަށް އެ މިނިސްޓްރީން ވަނީ ބުނެފައެވެ.

މި ފަރާތްތަކުން ޖޫރިމަނާ ކުރުމުގެ އިތުރުން، މި ކުށް ސާބިތުވެއްޖެނަމަ، ހަ މަސް ދުވަހަށް ޖަލަށް ލުމާއި ސައުދީން ފޮނުވާލުމަށް ވެސް ވަނީ ކަނޑައަޅާފައެވެ. މިފަދަ ފަރާތްތަކަށް 10 އަހަރު ވަންދެން ސައުދީ އަށް އެރުންވެސް މަނާ ކުރެވިގެންދާނެ ކަމަށް މިނިސްޓްރީން ވަނީ ބުނެފައެވެ.

މި އަދަބު ތަކުގެ އިތުރުންވެސް މި ފަދަ ކުށްތައް ކުރާ ފަރާތްތައް އާންމުންނަށް ފެންނަ ގޮތަށް ޓީވީ ފަދަ ތަކެތިން ދެއްކުމަށް ވެސް ސައުދީން ވަނީ ނިންމާފައެވެ.

މިއީ ގަވާއިދާ ހިލާފު ކަންކަން ކުޑަކޮށް، ހައްޖުގެ މަތިވެރި އަޅުކަމާއި ގުޅުން ހުރި ކަންކަން ވީހާވެސް އަމާން ކަމާއި އެކު، ކުރިއަށް ގެންދިޔުމަށްޓަކައި ކަމާބެހޭ ފަރާތްތަކާއި ގުޅިގެން ސައުދީން އެޅުމަށް ނިންމާފައިވާ ފިޔަވަޅު ތަކެކެވެ.