ސައުދީ އަށް ރަމަޟާން މަހުގެ ހަނދު ފެނިއްޖެ!
1445 ވަނަ އަހަރުގެ ރަމަޟާން މަހުގެ ހަނދު ސާޢުދީ އަރަބިއްޔާ އަށް ފެނި، މާދަމާ އަކީ، އެ ގައުމަށް މި އަހަރުގެ ރަމަޟާން މަހުގެ ފުރަތަމަ ދުވަސް ކަމަށް ސައުދީ ސަރުކާރުން ކަނޑައަޅާ އެކަން އިއުލާނު ކޮށްފި އެވެ.
ސަޢުދީ ސަރުކާރުން، ދާދި ދެންމެ އަކު ވަނީ، މާދަމާ އަކީ އެގައުމަށް ރަމަޟާން މަހުގެ ފުރަތަމަ ދުވަސް ކަން އިއުލާން ކޮށް، މިރޭ މަސްޖިދުލް ޙަރަމް އަދި މަސްޖިދުއްނަބަވީގައި ތަރާވީހު ނަމާދު ކުރާނެކަން ހާމަކޮށްފައެވެ.
ސަޢުދީއަށް ރަމަޟާން މަހުގެ ހަނދު ފެނިފައިވާއިރު ދުނިޔޭގެ ބައެއް ގައުމުތަކަށް ހަނދު ނުފެނި ރަމަޟާން މަހުގެ އެއްވަން ދުވަހަކީ އަންގާރަ ދުވަސް ކަމުގައި މިރޭ ވަނީ ކަނޑައަޅާފަ އެވެ.
އެގޮތުން، ފިލިޕިންސް، ސިންގަޕޫރު، އިންޑޮނޭޝިޔާ، މެލޭޝިޔާ، އަދި ބުރޫނާއީ އަށްވެސް ރޯދަ މަހުގެ ފުރަތަމަ ދުވަހަކީ އަންގާރަ ދުވަސް ކަން ވަނީ އިއުލާން ކޮށްފައެވެ.
ދިވެހިރާއްޖޭގެ އިސްލާމީ ކަންތައްތަކާ ބެހޭ ވުޒާރާއިން ބުނެފައިވާ ގޮތުން ހަނދު ބެލުމާއި ހަނދާއި ބެހޭ ރަސްމީ ޤަރާރު އިއްވުމަށް ބާއްވާ ޚާއްޞަ ޖަލްސާ އޮންނާނީ މިރޭ 8:45 ގައި އިސްލާމީ މަރުކަޒުގައެވެ.
ކަލަންޑަރުގައިވާ ގޮތުން ރާއްޖެއަށް މިއަހަރު ރޯދަމަހުގެ ފުރަތަމަ ދުވަހަކީ މާދަމާ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
