އިންޑިއާއިން ސްރީލަންކާއަށް ތެލުގެ ކުއްލި އެހީތެރިކަން ފޯރުކޮށްދެނީ

ސްރީލަންކާގެ ހަކަތައިގެ އެހީތެރިކަން ބޭނުންވާތީވެ، އިންޑިއާއިން ތެލުގެ ކުއްލި އެހީތެރިކަން ފޯރުކޮށްދިނުމަށް ނިންމައިފިއެވެ.

ސްރީލަންކާގެ މީޑިއާތަކުން ރިޕޯޓްކޮށްފައިވާގޮތުގައި އެޤައުމުގެ ރައީސް  އަނޫރާ ކުމާރާ ޑިސާނަޔަކަ އާއި އިންޑިއާގެ ބޮޑުވަޒީރު ނަރެންދުރަ މޯދީއާ ދެމެދު މި މަހުގެ 24 ވަނަ ދުވަހު ގުޅައި މިކަމާ ގުޅޭގޮތުން ފުޅާދާއިރާއެއްގައި ވާހަކަދައްކާފައެވެ. މި މަޝްވަރާތަކުގައި މައިގަނޑު ގޮތެއްގައި އަލިއަޅުވާލާފައިވަނީ މެދުއިރުމަތީގައި އުފެދިފައިވާ ހަމަނުޖެހުންތަކުގެ ސަބަބުން ސަރަހައްދީ ހަކަތައިގެ ރައްކާތެރިކަމަށް ކުރާ އަސަރުތަކަށެވެ.

ދެ ބޭފުޅުންގެ ދެމެދުގައި ކުރެވުނު މަޝްވަރާތަކަށްފަހު، އިންޑިއާއިން ވަނީ ސްރީލަންކާއަށް 20,000 މެޓްރިކް ޓަނުގެ ޑީސަލާއި 18,000 މެޓްރިކް ޓަނުގެ ޕެޓްރޯލް ހިމެނޭހެން ޖުމްލަ 38,000 މެޓްރިކް ޓަނުގެ ތެޔޮ ހިލޭ އެހީގެ ގޮތުގައި ދިނުމަށް ނިންމާފައެވެ. މި އެހީ މާދަމާގެ ވަގުތެއްގައި އެ ޤައުމަށް ފޮނުވާނެއެވެ.

ސްރީލަންކާގައި ހުންނަ އިންޑިއާގެ ހައިކޮމިޝަނުން ހާމަކޮށްފައިވާ ގޮތުގައި، މި އެހީއަކީ "ލަންކާ އައި.އޯ.ސީ" މެދުވެރިކޮށް އިންޑިއާގެ ތެޔޮ ރިޒާވްތަކުން ފޯރުކޮށްދީފައިވާ ކުއްލި އެހީއެކެވެ. މެދުއިރުމަތީގެ މަސްރަހު ނުތަނަވަސްވުމާ ގުޅިގެން ސިންގަޕޫރާއި އެހެނިހެން ގައުމުތަކުން ސްރީލަންކާއަށް ލިބެން ހުރި ތެޔޮ ޝިޕްމަންޓްތަކަށް ބުރޫއެރުމުން، އިންޑިއާއިން ވަނީ އެ ގައުމުގެ ހަކަތައިގެ ސަޕްލައި ހަމަޖެއްސުމަށް އިސްނަގާފައެވެ.

މި ޝިޕްމަންޓާއެކު ސްރީލަންކާގެ ބާޒާރުގައި ތެލުގެ ދަތިކަން ކުޑަވެގެންދާނެ ކަމަށް ބެލެވެއެވެ. ހާއްސަކޮށް ދަތުރުފަތުރާއި ސިނާއީ މަސައްކަތްތަކަށް ބޭނުންވާ ޑީސަލާއި ޕެޓްރޯލް ލިބުމުގައި ހުރި ދަތިތަކަށް މިކަމުގެ ސަބަބުން ލުޔެއް ލިބޭނެއެވެ. މިއީ ދެ ގައުމުގެ ދެމެދުގައި އޮތް ގާތް ގުޅުމުގެ ތެރެއިން ސްރީލަންކާއަށް ދިމާވާ އިގްތިސާދީ އަދި ހަކަތައިގެ ދަތިތަކުގައި އިންޑިއާއިން އަބަދުވެސް އެހީތެރިކަން ފޯރުކޮށްދޭ ކަމުގެ ހެއްކެއް ކަމަށް ރިޕޯޓްތައް ބުނެއެވެ.

މީގެ އިތުރުން، އިންޑިއާގެ ހާރިޖީ ވަޒީރު ޑރ. އެސް. ޖައިޝަންކަރާއި ސްރީލަންކާގެ ހާރިޖީ ވަޒީރު ވިޖިތާ ހެރާތު ވެސް ވަނީ މި ދާއިރާއިން އިތުރަށް ގުޅުން ބަދަހިކުރުމާ ބެހޭގޮތުން މަޝްވަރާކުރައްވާފައެވެ. މި ފޯރުކޮށްދެވުނު އެހީއަކީ ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކާއި ސަޕްލައިއަށް ދިމާވާ ހުރަސްތަކުން ސްރީލަންކާ ސަލާމަތްކުރުމަށް އެޅުނު މުހިންމު ފިޔަވަޅަކަށް ވާނޭކަމަށް ދެ ޤައުމުން ވަނީ ބުނެފައެވެ.