އިންޑިއާ-ސްރީލަންކާ ފެރީ ޚިދުމަތް އަލުން ފަށައިފި

މިދިޔަ އަހަރު ފަށައި، އެހެންނަމަވެސް ފަހުން ހުއްޓިފައި އޮތް އިންޑިއާ-ސްރީލަންކާ ފެރީ ޚިދުމަތް އަލުން ފަށައިފިއެވެ.

މި ޚިދުމަތް އަލުން ފެށުމަށް އިންޑިއާގެ ޗެންނާއީގެ ނަގަޕައްޓިނަމް ބަނދަރުން ފުރައިގެން ފެރީ ވަނީ ހުކުރު ދުވަހު ސްރީލަންކާގެ ޖަފްނާ ކައިރީގައި އޮންނަ ކަންކެސަންތުރާއީ އަށް ބަނދަރުކޮށްފައެވެ.

މިފެރީ ދަތުރުގެ ދިގުމިނަކީ ގާތްގަނޑަކަށް 4 ގަޑިއިރެވެ. ފުރަތަމަ ދަތުރުގައި 50 ފަސިންޖަރުން ބައިވެރިވިއިރު، ކަންކެސަންތުރާއީއިން ފެރީގައި އައި މީހުންނަށް މަރުހަބާ ވިދާޅުވީ ޖަފްނާގައި ހުންނަވާ އިންޑިއާގެ ކޮންސުލް ޖެނެރަލްއެވެ.

ފެރީ ޚިދުމަތް ދިނުމަށް އިންޑިއާ ފަޅިން ކުރަން ޖެހޭ ހަރަދުތައް ހަމަޖެއްސުމަށް އެއް އަހަރު ދުވަހުގެ މުއްދަކަށް މަހަކު ފަންސަވީސް މިލިއަން ސްރީލަންކަން ރުޕީސްގެ އެހީ އިންޑިއާ ސަރުކާރުން ޚަރަދުކުރާނެކަމަށް ސްރީލަންކާ މިޑީއާއިންބުނެއެވެ. އަދި މިޚިދުމަތް ފެށުމަށް ބޭނުންވާ ފެންވަރަށް ކަންކެސަންތުރާއީ ބަންދަރު ތަރައްޤީކުރުމަށް އިންޑިއާއިން ސްރީލަންކާއަށް ހިލޭ އެހީގެ ގޮތުގައި 63.65 މިލިއަން އެމެރިކާ ޑޮލަރުގެ އެހީ ދީފައިވެއެވެ.

ދެގައުމުގެ ސަރުކާރުންވެސް ދެކޭ ގޮތުގައި މި ފެރީ ޚިދުމަތާއެކު ދެޤައުމުގެ މެދުގައި ގުޅުން އިތުރަށް އާލާވެ، ސްރީލަންކާގެ ތަމަޅައިންނާއި އިންޑިއާގެ ތަމަޅައިންގެ މެދުގައި އޮންނަ ސަގާފީ އާއިލީ އަދި ދީނީ ގުޅުންތައް ވަރުގަދަވެގެންދާނެއެވެ.

ކޮޅުނބުގައި ހުންނަ އިންޑިއާގެ ހައިކޮމިޝަނުން ބުނީ ފެރީ ޚިދުމަތާއި އަދި ޚިދުމަތް ދިނުމަށް ބޭނުންވާ އެހެން ކަންކަން ފުރިހަމަކުރުމަށް އިންޑިއާއިން ލަންކާއަށް ފޯރުކޮށްދޭ އެހީއަކީ ލަންކާގެ އިޤްތިޞާދީ ހާލަތު ރަނގަޅުކުރުމަށް އިންޑިއާއިން އެހީތެރިވެދޭން ވެފައިވާ ވައުދުގެ ދަށުން ދެމުން އަންނަ އެހީތެރިކަން ކަމަށެވެ.

މި ޚިދުމަތް އިތުރަށް ފުޅާކޮށް، ފެރީ ޚިދުމަތުގެ ނިޒާމުގެ ތެރެއަށް އިތުރު ބަނދަރުތައް އިތުރުކުރުމަށް ދެޤައުމުންވެސް ވަނީ މަޝްވަރާކޮށްފައެވެ.