މި ސަރުކާރުން މިހާރު ކުރިއަށް ގެންދާ ގިނަ މަޝްރޫޢުތަކަކީ ރައީސް ޔާމީންގެ ސަރުކާރުން ފަށާފައިވާ މަސައްކަތްތަކެއް ކަމުގައި ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.

ޝަރީފް މިފަދައިން ވިދާޅުވީ ސަންގު ޓީވީން ގެނެސްދިން "ޚަބަރަށްފަހު" ޕްރޮގްރާމްގައި ދެއްކެވި ވާހަކަފުޅެއްގައެވެ.

ރައްޔިތުންގެ މަޖިލީހުގައި ބަހުސްކުރަމުންދާ ބަޖެޓާއި ގުޅޭ ގޮތުން ވާހަކަ ދައްކަވަމުން ޝަރީފް ވިދާޅުވީ، ޗައިނާއިން ނަގާފައިވާ ލޯނުތައް އަދާކުރަން ނުޖެހޭނެ ކަމަށާއި، އެއީ މި ނިމުނު ސަރުކާރުގެ ލޯނުތައް ކަމުގައި ބައެއް ބޭފުޅުން ވިދާޅުވެފައި ވީނަމަވެސް އެއީ ރަނގަޅު ވާހަކަތަކެއް ނޫން ކަމުގައެވެ. އެއީ ދިވެހިރާއްޖޭގެ ލޯނުތަކެއްގެ ގޮތުގައި ޝަރީފް ސިފަކުރެއްވިއެވެ.

އޭގެ އިތުރުން އެބޭފުޅާ ވިދާޅުވީ، އެއް ސަރުކާރުން އަނެއް ސަރުކާރަށް ބަދަލުވީ ނަމަވެސް ސަރުކާރުގެ ބޮލުގައި އެޅިފައި އޮންނަ އިލްޒާމަށް ބަދަލެއް ނާންނާނެ ކަމަށެވެ. އަދި އެއް ސަރުކާރުންވާ ވަޢުދު އަނެއް ސަރުކާރުންވެސް ފުއްދަން ޖެހޭނެ ކަމުގައި ޝަރީފް ފާހަގަކުރެއްވިއެވެ.

މީގެިއތުރުން ރައީސް އިބްރާހިމް ޞާލިހްގެ ސަރުކާރު ވެރިކަމަށް އައުމަށްފަހުގައި، ފާއިތުވެގެން މިދިޔަ މުއްދަތުގެ ތެރޭގައި ހިންގާފައިވާ ގިނަ މަޝްރޫޢުތަކަކީ ކުރީ ސަރުކާރުން ފަށާފައިވާ މަޝްރޫޢުތަކެއް ކަމަށް ޝަރީފް ވަނީ ވިދާޅުވެފައެވެ.