އިންޑިއާއިން އޯޑަރުކޮށްފައިވާ އެޕާޗޭ ހެލިކޮޕްޓަރުތައް ހަވާލުކުރަން ޖެހޭ މުއްދަތު ފަހަނައަޅައި ދިޔަތާ އަހަރަކަށްވުރެ ގިނަ ދުވަސްވެފައިވަނިކޮށް، އެ ހެލިކޮޕްޓަރުތައް މި މަހު އަންނާކަމަށް އިންޑިއާއިން ބުނެފިއެވެ.

މިމަހު 3 ހެލިކޮޕްޓަރު ލިބުމުން، އެހެލިކޮޕްޓަރުތައް ގެންދިޔުމަށް ނިންމާފައިވަނީ އިންޑިއާ-ޕާކިސްތާން ސަރަހައްދީ ރޮނގު ބެލެހެއްޓުމަށް އެސަރަހައްދަށެވެ. 2024 ވަނަ އަހަރު އިންޑިއަން އާމީ އޭވިއޭޝަން ކޯ އުފެއްދީއްސުރެ، ޖޯދުޕޫރުގައި ސިފައިން ގާއިމުވެގެން ތިބިނަމަވެސް އެމީހުންނަށް ހެލިކޮޕްޓާރުތަކެއް ނުލިބެއެވެ.

2020 ވަނަ އަހަރު އިންޑިއާއާއި އެމެރިކާއިން ސޮއިކުރި 600 މިލިއަން ޑޮލަރުގެ އެއްބަސްވުމުގެ ދަށުން އެޕާޗޭ 64-އީ މަރުކާގެ 6 އެޓޭކް ހެލިކޮޕްޓަރު، މިދިޔަ އަހަރުގެ މެދުތެރޭ އިންޑިއާއާ ހަވާލުކުރަން ޖެހެއެވެ. ހެލިކޮޕްޓަރުތައް ފޮނުވުމުގައި ލަސްތަކެއް ކުރިމަތިވީ އެމެރިކާއަށް ހެލިކޮޕްޓަރުތައް އުފެއްދުމުގައި ދިމާވި ޓެކްނިކަލް މައްސަލަތަކެއްގެ ސަބަބުންނެވެ. 6 ހެލިކޮޕްޓަރުގެ ތެރެއިން ފުރަތަމަ 3 ހެލިކޮޕްޓަރު މިމަހު އިންޑިއާއާ ހަވާލުކުރުމަށްފަހު، މިއަހަރުގެ ފަހުކޮޅު އަނެއް 3 ހެލިކޮޕްޓަރު އިންޑިއާއާ ހަވާލުކުރެވޭނެކަމަށް ބެލެވެއެވެ.

2015 ވަނަ އަހަރު ސޮއިކުރި އެއްބަސްވުމެއްގެ ދަށުން ލިބުނު 22 އެޕާޗޭ ހެލިކޮޕްޓަރު އިންޑިއާ އެއްގަމު ސިފައިން މިހާރުވެސް ބޭނުންކުރެއެވެ.

އިންޑިއާއިން ގެންދަނީ އެގައުމުގެ އަސްކަރީ ގާބިލްކަން އިތުރުކުރުމަށް، އެންމެ ފަހުގެ ޒަމާނީ ހަތިޔާރު ދުނިޔޭގެ އެތަން މިތަނުން ހޯދަމުންނެވެ.