އިންޑިއާ ވިޔަފާރީގެ އެއްބަސްވުން ގާއިމްކުރެވޭނެ: ޓްރަމްޕް
އިންޑިއާއާއި އެމެރިކާއާ ދެމެދު ވިޔަފާރީގެ އެއްބަސްވުމެއް ގާއިމްކުރުމަށް ކުރަމުންދާ މަސައްކަތް ނިމި، ވަރަށް އަވަހަށް އެއްބަސްވުމުގައި ސޮއެކުރެވެނެކަމަށް ބެލެވޭކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
އަންގާރަ ދުވަހު އެއަރފޯސް ވަންގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ އެމެރިކާގެ ކުންފުނިތަކުން އުފައްދާ މުދަލާއި ދޭ ޚިދުމަތަށް އިންޑިއާއިން ނަގާ ޓެރިފް ކުޑަކުރުމަށް އެގައުމުން ތައްޔާރަށް އޮތްކަމަށް ގަބޫލުކުރައްވާކަމަށެވެ. އަދި ބީދައިން އިންޑިއާއިން އަމަލުކޮށްފިނަމަ، އެމެރިކާއިން އިއުލާންކުރި 26 އިންސައްތަ ޓެރިފް ބޮޑުތަނުން ކުޑަ ކުރެވޭނެކަމަށް ޓްރަމްޕް ވިދާޅުވިއެވެ.
ޓްރަމްޕް ވަނީ މީގެ ކުރިންވެސް އިންޑިއާއާއެކު ވިޔަފާރީގެ އެއްބަސްވުމެއް ހެދިދާނެކަމަށް ވިދާޅުވެފައެވެ. އެހެންނަމަވެސް އަންގާރަ ދުވަހުގެ މި އިއުލާންކުރެއްވުމަކީ މިމަސައްތުގެ ދުވެލި އަވަސްވެފައިވާކަމުގެ ހެއްކެކެވެ. ދާދިފަހުން އެމެރިކާގެ މާލީ ވަޒީރު ސްކޮޓް ބެސެންޓް ފޮކްސް ނިއުސްއާއި ވާހަކަ ދައްކަވަމުން ވިދާޅުވީ އިންޑިއާއާއެކު މަޝްވަރާކުރެވެމުންދާ ވިޔަފާރީގެ އެއްބަސްވުން ނިމުމަކާ ހިސާބަށް އައިސްފައިވާކަމަށެވެ.
އެއްބަސްވުމުގެ މަޝްވަރާތަކަށް މިވަގުތު ވޮޝިންޓަނުގައި ތިބި އިންޑިއާގެ އޮފިޝަލުންގެ ދަތުރު މިދިޔަ ހަފްތާގައި ދިގުވެސްކޮށްފައިވެއެވެ. ސަބަބަކީ ދެގައުމުގެ މެދުގައި އެއްބަސްވުމަކަށް ނާދެވި ހުރި ބައެއް ކުދިކުދި ކަންކަން ހުރުމާއެކު، އެކަންކަމާއި މެދު މަޝްވަރާކޮށް ގޮތެއް ނިންމުމެވެ.
ދުނިޔޭގެ ބޮޑު ބަޔަކުން އެމެރިކާއަށް އެތެރެކުރާ މުދަލުން ބޮޑު ޓެރިފެއް ނަގަން ޓްރަމްޕް ނިންމެވި ނިންމެވުމަށް އަމަލުކުރުން ފަސްކޮށްފައިވާ މުއްދަތު ހަމަވާނީ އަންނަ ހަފްތާގައެވެ. ޖުލައި 9 ގެ ޑެޑްލައިންގެ ކުރިން އެމެރިކާއެކު އެއްބަސްވުމަކަށް އައުމަށް ގިނަ ގައުމުތަކަކުން އަންނަނީ މަސައްކަތްކުރަމުންނެވެ.
Advertisement
This content is created and paid for by advertisers and does not involve Voice Journalists
