ބުރާސްފަތި ދުވަހު ވެރިކަންކުރާ ކޯލިޝަންގެ އިސްލީޑަރުން ރައްޔިތުންގެ މަޖިލިސްގެ މަޖިލިސްގެ އިންތިޚާބާއިގުޅޭ މުހިއްމު ބައްދަލުވުމެއްގައި ބައިވެރިވެވަޑައިގެން ނުކުމެވަޑައިގަތުމުން އެބޭފުޅުން ތިއްބެވި ހޮޓެލް ޖެންއަށް އައިސް އެބޭފުޅުންގެ ކުރިފުޅުމަތީގައި މުޒާހަރާކޮށް، އިހްތިޖާޖްކުރިކުރުމަކީ އާދައިގެކަމެއްކަމަށް ބުނެވިދާނެތޯއެވެ. ސަބަބަކީ މުޒާހަރާކުރި މީހުން ހޮޓަލަށް ވަންނަން ހޮޓެލްގެ ސްޓާފުން ދެކޮޅުހެދުމުން އެމީހުންނާމެދު އަޅައިނުލުމަށް ބާރުއެޅުއްވީ ވެރިކަންކުރާ އެމްޑީޕީގެ ލީޑަރ މުހައްމަދު ނަޝީދުކަމަށް ވުމުންނެވެ.
އެފެހި ސިގްނަލް ނަޝީދު ނުދެއްވިނަމަ ނަވާނަވައި ކިޔާ ބަޔަކީ އެފަދަ މުޒާހަރާއެއް ނުވަތަ އިހްތިޖާޖެއްކުރުމަށް ކޮންބައެއް ހެއްޔެވެ؟ ގައުމުގެ ރައީސުލްޖުމްހޫރިއްޔާގެ ކުރިފުޅު މައްޗަށް އެގޮތަށް އައިސް މުޒާހަރާ ނުވަތަ އިހްތިޖާޖްކުރަން އެކަމަށް ކަނޑައެޅިފައި އޮންނަ އުސޫލުތަކުގެ ބޭރުން ކަންކުރަން ފުލުހުން ދޫކޮށްލާނެހެއްޔެވެ؟
އެމްޑީޕީން ކުރިންވެސް ކަންތައްކުރީ ދާދި އެއްކަހަލަގޮތަކަށް
މާޒީގެ ސަފްހާއަކަށް އެބުރިވަޑައިގަންނަވާށެވެ. 2008 ވަނަ އަހަރު އެމްޑީޕީން އުފެއްދި ވަތަން އެދޭކޯލިޝަންގައި އެމްޑީޕީ ފިޔަވައި ދެން އެންމެ ބޮޑު ޕާޓްނަރަކީ ގާސިމް އިބްރާހިމްގެ ޖުމްހޫރީ ޕާޓީއެވެ. ގާސިމަށް ނަޝީދުގެ ސަރުކާރުގައި ދެއްވީ ބާރުގަދަ ހޯމް މިނިސްޓްރީއެވެ. ސަރުކާރަށް ހަމަސްދުވަސްވެ ނުވަނީސް ގާސިމް އިބްރާހިމް ކޯލިޝަނުން ބޭރުކުރުމުގެ، ނަވާނަވައި ހިންގިކަހަލަ ހަރަކާތްތަކެއް އެކަހަލަ މަދުބަޔަކު އެއްވެ މާލެތެރޭގައި ފެށިއެވެ.
އެހަރަކާތްތަކުގައި ހިމެނެނީ އެމްޑީޕީގެ އެކްޓިވިސްޓުންނެވެ. އެމްޑީޕީގެ ވެރިންގެ ފުރިހަމަ ބްލެސިން ލިބިގެންނެވެ. ގާސިމް އިބްރާހިމްއަކީ ގާސިމް އިބްރާހިމްއެވެ. ކޯފާވާކަހަލަ ކަންކަން ކޮށްލީމާ ނިކަން އަވަހަށް ނިންމުންތައް ނިންމަވާކަން އެމްޑީޕީގެ ވެރިންނަށް އެގެއެވެ. އެންމެފަހުން ގާސިމް ނުކުމެވަޑައިގަތީއެވެ. ޚަލާސް، ކޯލިޝަން ރޫޅުނީއެވެ.
ކޮންބަޔަކު އަޑީގައި ތިބެގެންކަން ނޭގޭގޮތަށް ބަޔަކު ނަވާނަވައިގެ ނަމުގައި ކުއްލިއަކަށް ބޯޑުތަކާއި ބެނާތަކާއި އެއްޗެހި ހިފައިގެން އައިސް ރައީސުލްޖުމްހޫރިއްޔާއާއި އެމަނިކުފާނުގެ ސަރުކާރުގެ ކޯލިޝަން ލީޑަރުންގެ ކުރިފުޅު މައްޗަށް އައިސް އެކުރި މުޒާހަރާގެ މާނަ ޖުމްހޫރީ ޕާޓީގެ ލީޑަރ ގާސިމް އިބްރާހިމްގެ އެޑްވައިޒަރ ޑޮކްޓަރ މުހައްމަދު ޖަމީލު އެކުރެއްވެވީއެވެ. ސަބަބަކީ އެބަޔަކު އުފުލި ބެނާތަކުގައި ލިޔެފައިވާ އެއްޗެއް ރައްދުވަނީ ކޯލިޝަންގެ ޕާޓްނަރެއްކަމަށްވާ ގާސިމް އިބްރާހިމްއަށްކަމަށްވާތީއެވެ. ގާސިމް ނޫނީ އެބޯޑުގައި ހުރިވާހަކަ ނިސްބަތްކުރެވޭ، މީހުންނަށް އެނގޭފަދަ މުއްސަނި މަހުޖަނަކު ކޯލިޝަންގައި ނެތެވެ. އެބޯޑުގައި ލިޔެފައިވަނީ "މަހުޖަނުންގެ ނުފޫޒުން މަޖިލިސް ހިމާޔަތްކުރޭ" ފަދަ އިބާރާތްތަކެވެ.
އެ މުޒާހަރާ ނުވަތަ އިހްތިޖާޖް ކުރި މީހުންނަކީ އިދިކޮޅު ޕީޕީއެމަށް ނިސްބަތްވާ ބަޔަކަށް ނުވެއެވެ. ޖުމްހޫރީ ޕާޓީއަކަށް، މައުމޫނަކަށް އަދި އަދާލަތު ޕާޓީއަކަށް ނިސްބަތްވާ ބަޔެއްނޫނެވެ. ކޯލިޝަނަކީ ސަރުކާރެވެ. ސަރުކާރާއި ދެކޮޅަށް އަޑުއުފުލަން މިނުކުތީ ސަރުކާރަށް ނިސްބަތްވާ ބަޔަކު ނޫނޭ ބުންޏަސް ގަބޫލުކުރާނީ ކާކުހެއްޔެވެ. އަދި އަމިއްލަ ސަރުކާރާއި ދެކޮޅަށް އަޑުއުފުލަން އެމްޑީޕީގެ ލީޑަރ މުހައްމަދު ނަޝީދު ފެހިސިގްނަލް ދެއްވައި ފުލުހުންނަށް އެމަނިކުފާނަކީ އެމީހުންގެ ނިވާފަތްގަނޑަށް ހެއްދެވީ ޑިމޮކްރަސީގެ ފުރިހަމަ ނަމޫނާއެއް ދައްކަވަންވެގެންކަމަށް ގަބޫލުކުރާނީވެސް މަދު މީހެކެވެ.
އެޑްވައިޒަރު ޖަމީލު އެއުފެއްދެވީ އެ ސުވާލެވެ. އަދި ޕްރެޑިކްޝަނެވެ. މިއީ ކޯލިޝަން ރޫޅުމުގެ ފުރަތަމަ ނިޝާން އެވެ. " ފަރުވާތެރިކަމާއެކު ރާވައިގެން ކޮށްފައިވާ މުޒާހަރާއެއް" ކަމަށެވެ. އަދި މިއީ ސިޔާސީ ކުރިމަތިލުންތަކެއްގެ ފެށުންތޯ ގާސިމްގެ އެޑްވައިޒަރު ސުވާލު އުފައްދަވައެވެ. 2009 ގައިވެސް ކަންހިގީ ހަމަދާދި އެއްކަހަލަގޮތަކަށެވެ.
ނަތީޖާއަކަށްވާނީ ކޮންކަމެއް؟
ރާވައިގެންކޮށްފައިވާ މުޒާހަރާއެއްނަމަ ދެކޮޅުވެރިކަމުގެ ބެނާތަކާއި ބޯޑްތައް މިއުފުލައިލީ ކޯލިޝަންތެރޭގައި ވަރަށް ހައްސާސް ނާޒުކް ދަނޑިވަޅެއްގައެވެ. ކޯލިޝަން އެއްބަސްވުމާއިދެކޮޅުވެ އަހުދު އުވާލައި އެމްޑީޕީން މަޖިލިސް އިންތިޚާބުގެ ހުރިހައި ދާއިރާއަކަށް ވާދަކުރަން ނިންމުމުން އެކަންބަދަލުކުރެވޭތޯ އެހެން ޕާޓްނަރުން ސުލްހައިގެ މޭޒުދޮށަށްގޮސް ވާހަކަދައްކަމުންދާ ދަނޑިވަޅެއްގައެވެ.
އެމްޑީޕީގެ ލީޑަރ މުހައްމަދު ނަޝީދު އެޕާޓީގެ ކައުންސިލުން ނިންމުވައިގެން އުޅުއްވާ ނިންމެވުމަކީ އެޕާޓީން ރައީސުލްޖުމްހޫރިއްޔާކަމަށް ހޮވިވަޑައިގެން ހުންނެވި އިބްރާހިމް މުހައްމަދު ސާލިހް ހިތްޕުޅު ހަމަޖެހިވަޑައިގަންނަވާ ނިންމެވުމެއްނޫންކަން އެބައެގެއެވެ. އެހެންނަމަވެސް ނަޝީދު އެމަނިކުފާނުގެ ގޮތް ދޫކޮށްލައްވާކަށް ބޭނުންފުޅުވާތަނެއް އަދި ނުފެނެއެވެ. ދަތިއުނދަގޫ ހާލަތަކަށްވެށްޓިފައިވަނީ ރައީސް ސާލިހްއެވެ. އެހެންޕާޓީތަކާއެކު އަހުދުވެ، އިގްރާރެއް ވެފައިވަނީ ސޯލިހެވެ.
ޕާޓީގައި އެމަނިކުފާނުގެ ބަސް ނުހިގާކަމާއި، އަދި އެމަނިކުފާނަށް މިކަމުގައި ޕާޓީން އެހީތެރިވާން ނެތްކަން ކައުންސިލުން ނިންމި ނިންމުމުން ސާފުކޮށް އެގެއެވެ. ހއ އިހަވަންދުއަށް އިހަށްދުވަހު ރައީސް ނަޝީދު ވަޑައިގެން ދެއްވީ އެސިގްނަލެވެ. ވިދާޅުވެފައިވަނީ ރާއްޖޭގެ އެކިކަންކޮޅުތަކުން އެމަނިކުފާނަށް އިވިވަޑައިގަންނަވަނީ އެމްޑީޕީގެ މެމްބަރުން ހޮވައި އެޕާޓީއަށް މެޖޯރިޓީ ދިނުމަށް ގޮވާ އަޑު ކަމަށެވެ.
" ރާއްޖޭގެ އެކިކަންކޮޅުތަކުން ގޮވަނީ. މާބާރަށްގޮވަނީ. އެންމެ ރައްޔިތުން އެދެނީ އެމްޑީޕީއަށް އަޣްލަބިއްޔަތު ދިނުމަށޭ. އަޅުގަނޑަށް އެއަޑުއިވޭ" ނަޝީދު ވިދާޅުވެފައިވެއެވެ.
ނަޝީދު ފިޔަވައި އެއަޑު އިވޭ އެހެންބަޔަކު ތިބިކަމަކަށް އަދި ނުވެއެވެ. ރައީސް އިބްރާހިމް މުހައްމަދު ސާލިހަށް ގައިމުވެސް އިވިވަޑައިނުގަންނަވައެވެ.
ކޮންމެއަކަސް ކޯލިޝަންތެރޭގައި މިހާރު އޮތް ގުޅުމަކީ ޓައިމްބޮމެއްކަމަށް މިހާރު ސިފަކުރެވިދާނެއެވެ. ކޮންމެފަދަ ވަގުތެއްގައިވެސް ގޮވާފާނެއެވެ. އެބޮން ގޮއްވާލަން އުޅެނީ އެމްޑީޕީނޭ ބުނެގެން ހިތްހަމަނުޖެހުނަސް ހަގީގަތްވާނީ ހަގީގަތަށެވެ. ރައީސް އަބްދުﷲ ޔާމީން ކޯލިޝަން ޕާޓްނަރުން ޖަލަށްލައިގެން ވެރިކަންކުރިގޮތް އެމްޑީޕީގެ ލީޑަރުންނަށް އޮތީ ފެނިފައެވެ.
Advertisement
This content is created and paid for by advertisers and does not involve Voice Journalists
