ސައުދީ އަރަބިއްޔާއަށް އަމާޒުކޮށް ދެމުންދާ ބެލިސްޓިކް މިސައިލް ހަމަލާތައް ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.

މިކަން ހާމަކޮށް ދިވެހި ހާރިޖިއްޔާ އޮފީހުން ނެރުނު ބަޔާނުގައި ބުނެފައިވަނީ، ސައުދީއަށް ދޭންފެށި މިސައިލް ހަމަލާތަކަކީ އެޤައުމުގެ އިސްތިގުލާލާއި ސަރަހައްދީ ނިންމެވުންތަކަށް އަރައިގަތުމުގެ ގޮތުން ހިންގާފައިވާ އަމަލުތަކެއްގެ ގޮތުގައި ރާއްޖެއިން ދެކޭކަމަށެވެ. އެގޮތުން މިއީ މުޅި ސަރަހައްދުގެ ސަލާމަތާއި ހަމަޖެހުމަށް އޮތް ނުރައްކާތެރި އަމަލެއްކަމަށް ހާރިޖިއްޔާއިން ބުންޏެވެ.

ހާރިޖިއްޔާގެ ބަޔާނުގައި ވަނީ މި ދަނޑިވަޅުގައި ސައޫދީ ސަރުކާރާއި އެގައުމުގެ އަހުލުވެރި ރައްޔިތުންނާއެކު ދިވެހިރާއްޖެއިން ސާބިތުކަމާއެކު އޮތްކަމަށް ބުނެފައެވެ. އަދި ސައުދީ އަރަބިއްޔާގެ ސިޔާދަތާއި، ރައްކާތެރިކަމާއި، ސަރަހައްދީ މިނިވަންކަން ދެމެހެއްޓުމަށްޓަކައި އެޅެންހުރި ފިޔަވަޅުތަކަށް ރާއްޖެއިން ތާއީދުކުރާކަމަށްވެސް ހާރިޖިއްޔާގެ ބަޔާނުގައި ބުންޏެވެ. އަދި ސަރަހައްދުގެ ރައްކާތެރިކަމާއި ސުލްހަ ގާއިމްކުރުމަށް މަޝްވަރާގެ މަހު ހިޔާރުކުރުމުގެ މުހިންމުކަންވެސް ވަނީ ފާހަގަކޮށްފައެވެ.

ރާއްޖޭގެ ހާރިޖިއްޔާއިން ބަޔާނެއް ނެރެފައިމިވަނީ ހޫތީން ސައުދީގެ އެއާޕޯޓަކަށް ވައިގެމަގުން ހަމަލާތަކެއް ދީފައިވަނިކޮށެވެ. މެދުއިރުމަތީގެ މަޝްރަހް އަނެއްކާވެސް ގޯސްވެފައިވާއިރު، އެމެރިކާ އަދި އީރާނާ ދެމެދު އޮތް ގުޅުން ވަނީ ވަރަށްބޮޑަށް ގޯސްވެފައެވެ.