ރާއްޖޭގެ މޫސުން ގޯސްވެ މިއަދު ހެނދުނު 10 އިން ފެށިގެން ހަވީރު 3 އާއި ހަމައަށް ރީނދޫ ސަމާލު ނެރެފައިވަނީ ހއ. އަތޮޅުން ފެށިގެން ތ. އަތޮޅަށް ކަމަށް މޫސުމާއި ބެހޭ ޤައުމީ އިދާރާ (މެޓް) އިން ބުނެފިއެވެ.

މި ވަގުތުތަކުގައި ގުގުރުމާއެކު ބޯކޮށް ވާރޭވެހޭނެ ކަމަށާއި، އަދި 25 މޭލާއި 30 މޭލާއިދެމެދު ބާރުމިނުގައި ވައިޖެހި ވިލާގަނޑުގައި ގަޑިއަކު 50 މޭލަށް ވައި ގަދަވެ ކަނޑުތައް ގަދަވާނެ ކަމަށް ލަފާކުރެވޭ ކަމަށް މެޓް އޮފީހުން ވަނީ ބުނެފައެވެ.

މީގެ އިތުރުން ލ. އަތޮޅުން ފެށިގެން އަައްޑޫ ސިޓީ އަށް ހުދު ސަމާލު ވެސް ވަނީ ނެރެފައެވެ. މިއަދު ހެނދުނު 9 އިން ފެށިގެން ހަވީރު 3 އަށް ނެރެފައިވާ ހުދު ސަމާލުގައި ގަޑިއަކު ވިލާގަނޑުގައި 45 މޭލަށް ވައިގަދަވެ ބޯކޮށް ވާރޭ ވެހުމާއި އެކު ގުގުރާނެ ކަމަށް މެޓް އޮފީހުން ބުންޏެވެ.

ކުރިއަށް އޮތް ދުވަސްތަކުގައި ކަނޑު ގަދާވާނެ ކަމަށް ލަފާކޮށް މެޓުން ވަނީ ޚާއްޞަކޮށް ކަނޑުދަތުރު ކުރާ ފަރާތްތަކުން ސަމާލުވުމަށް އިލްތިމާސް ކޮށްފައެވެ. އަދި ހުރިހާ ފަރާތްތަކުން ވެސް ގަދަ ވަޔާއެކު ބޯކޮށް ވާރޭ ވެހުމުގެ ސަބަބުން ކުރިމަތި ވެދާނެ ނުރައްކާތަކުން ރައްކާތެރިވުމަށާއި ، ލިބިދާނެ ގެއްލުންތައް ކުޑަކުރުމަށް ސަލާމަތީ ފިޔަވަޅު އެޅުމަށް އިލްތިމާސް ކޮށްފައިވެއެވެ.