ލިބުނީ އެމްއެމްޕީއާރްސީގެ ފައިސާކަން އެނގުނީ ލިސްޓު ފެނުމުން - ނަހުލާ
މަޝްހޫރު ފިލްމު ޑައިރެކްޓަރ ފާޠިމަތު ނަހުލާއަށް ލިބިފައިވަނީ އެމްއެމްޕީއާރްސީގެ ފައިސާކަން އެނގުނީ ލިސްޓް އާންމު ކުރުމުން ކަމަށް އޭނާ ބުނެފިއެވެ.
ރާއްޖޭގެ ފިލްމީ ދާއިރާގައި އެންމެ ގިނަ ދުވަސްވީ އެއް ޑައިރެކްޓަރ ކަމުގައިވާ ނަހުލާ ފޭސްބުކްގައި ކޮށްފައިވާ ޕޯސްޓެއްގައި ބުނެފައިވަނީ، 2015 ވަނަ އަހަރު ޕީޕީއެމްގެ ފަރާތުން މައްޗަންގޯޅި އުތުރު ދާއިރާއަށް ކުރިމަތި ލީ ކަމަށާއި، ޕާޓީއަކުން ކުރިމަތިލައިފިނަމަ، ކެމްޕެއިން ކުރުމަށް ކެންޑިޑޭޓުންނަށް ފައިސާ ދޭނެކަން އެންމެނަށްވެސް އެނގޭނެ ކަމަށެވެ.
އެކަމަކު އެމްއެމްޕީއާރްސީގެ ފައިސާ އޭނާއަށް ލިބުނުކަން އެނގުނީ އެފައިސާ ލިބުނު މީހުންގެ ލިސްޓު އާންމު ކުރުމުން ކަމަށް ނަހުލާ ބުނެފައިވެއެވެ.
ނަހުލާ ބުނެފައިވަނީ، އޭނާއަކީ އަމިއްލަ ބޭނުންތަކަށް އެއްވެސް މީހަކު އަތުން ފައިސާ ހޯދަން ޖެހޭ ފެންވަރުގެ މީހެއް ނޫން ކަމަށެވެ.
އަދި އޭނާއަކީ އެނގިހުރެ އެފަދަ ފައިސާއެއް ބޭނުން ކުރާނެ މީހެއް ނޫންކަމަށްވެސް ބުނެފައިވެއެވެ.
ނަހުލާގެ ފޭސްބުކް ޕޯސްޓް ނިންމާލަމުން ބުނެފައިވަނީ، ޕާޓީތަކުގެ ވެރިން، ވައްކަން ކޮށްގެންނާއި، ފޭރި ނުވަތަ ލޫޓުވައިގެން ހޯދާ ފައިސާ ކެންޑިޑޭޓުންނަށް ކެމްޕެއިން ކުރުމަށް ނުދިނުމަށް ގޮވާލާ ކަމަށެވެ.
އެމްއެމްޕީއާރްސީގެ ޚިޔާނާތުގެ މައްސަލާގައި ފައިސާ ލިބުނު މީހުންގެ ލިސްޓެއް ރައްޔިތުންގެ މަޖިލީހުން ވަނީ އާންމު ކޮށްފައެވެ.
އެ ލިސްޓްގައި ކުރީ ސަރުކާރުގެ އިސް މަޤާމުތަކުގައި އުޅެފައިވާ އަދި މި ސަރުކާރުގައިވެސް އިސް މަޤާމުތަކުގައި އުޅެމުންދާ ގިނަ ފަރާތްތަކެއް ހިމެނެއެވެ. އަދި އާންމުންގެ އެތައް ބަޔަކުވެސް އޭގެ ތެރޭގައި ހިމެނެއެވެ.
Advertisement
This content is created and paid for by advertisers and does not involve Voice Journalists