އިންޑިއާ އާއި ގުޅިގެން ޝަރުއީ ދާއިރާގައި މަސައްކަތް ކުރާ ދިވެހިން ތަމްރީން ކުރުމަށް ނިންމި ނިންމުމުން، ރާއްޖޭގެ ޝަރުއީ ނިޒާމަށް ފައިދާވެދާނެ ގޮތަކާ މެދު ކުރީގެ ޕްރޮސެކިއުޓަ ޖެނެރަލް އަދި ބާ ކައުންސިލްގެ މެންބަރު އަހުމަދު މުއިއްޒު ސުވާލު އުފައްދަވައިފިއެވެ.
މުއިއްޒު މިފަދައިން ސުވާލު އުފެއްދެވީ، ރާއްޖޭގެ ޝަރުއީ ދާއިރާ ކުރިއެރުވުމަށް ޖުޑީޝަލް ސަރވިސް ކޮމިޝަން (ޖޭއެސްސީ) އާއި އިންޑިޔާގެ މިނިސްޓްރީ އޮފް ލޯ އެންޑް ޖަސްޓިސްއާ ދެމެދު މެމަރަންޑަމް އޮފް އަންޑަރސްޓޭންޑިންގ (އެމް.އޯ.ޔޫ) އެއްގައި ސޮއިކުރުމާއި ގުޅިގެން އޭގެ ސަބަބުން އިންޑިއާ އާއި ރާއްޖޭގެ ގުޅުން އިތުރަށް ހަރުދަނާވާނެ ކަމަށް ބުނެ ރާއްޖޭގައި ހުންނަ އިންޑިއާ ހައިކޮމިޝަނުން ކުރި ޓްވީޓަކަށް ރައްދު ދެއްވަމުންނެވެ.
އެގޮތުން މުއިއްޒު ކުރެއްވި ޓްވީޓެއްގައި ވަނީ، ޝަރުއީ ދާއިރާގައި މަސައްކަތް ކުރާ ދިވެހިން އިންޑިއާ އިން ތަމްރީނުކުރާތީ އެކަމުން ދިވެހިންނަށް ފައިދާވެދާނެ ގޮތަކާ މެދު ސުވާލު އުފައްދަވާފަ އެވެ. އަދި އިންޑިއާ އަކީ ޝަރުއީ ދާއިރާއިން ބަލާއިރު ދުނިޔޭގައި މާފާހަގަކުރެވޭ ގައުމެއް ނޫން ކަމަށްވެސް ވިދާޅުވި އެވެ.
"އިންޑިއާއަކީ އެފިޝަންޓް ޖުޑިޝަރީއެއްގެ ގޮތުގައި މަޝްހޫރު ގައުމެއް ނޫން،" ކްރިމިނަލް ކޯޓްގެ އިސް ގާޒީ ކަން ވެސް ކުރެއްވެވި މުއިއްްޒު ވިދާޅުވި އެވެ.
2020 ވަނަ އަހަރުވެސް ދިވެހިރާއްޖޭގެ ފަނޑިޔާރުން ތަމްރީނުކުރުމުގެ ގޮތުން ޖުޑީޝަލް ސަރވިސް ކޮމިޝަނާއި އިންޑިޔާގެ ނޭޝަނަލް ޖުޑީޝަލް އެކަޑެމީއާ ދެމެދުގައި އެމް.އޯ.ޔޫ އެއްގައި ސޮއި ކޮށްފައިވެއެވެ. އަދި މިފަހަރު މިސޮއި ކުރެވުނު އެމް.އޯ.ޔޫގެ ސަބަބުން ދިވެހިރާއްޖޭގެ ޝަރުޢީ ދާއިރާގައި މަސައްކަތް ކުރާ ގިނަ ފަރާތްތަކަށް ފަންނީ ތަމްރީނާއި، ތަޖުރިބާ އިތުރުކުރުމުގެ ތަފާތު ފުރުޞަތުތަކެއް ލިބިގެންދާނެ ކަމަށް ޖޭއެސްސީން ބުނެއެވެ.
Advertisement
This content is created and paid for by advertisers and does not involve Voice Journalists
