ފީފާގެ އެދުމާއި އެއްގޮތައް ތިންވަނަ ފަރާތަކުން އިންޑިއާގެ ފުޓްބޯޅައަށް ނުފޫޒު ފޯރުވަމުން ދިޔަ ދިއުން ހުއްޓުވުމާއި އެކު އިންޑިއާގެ މައްޗަށްކުރި ސަސްޕެންޝަން އެ އިދާރާއިން އުވާލައިފިއެވެ.

މި މަހުގެ 15 ވަނަ ދުވަހު ދުނިޔޭގެ މައި ފުޓްބޯޅަ އިދާރާ ފީފާއިން އިންޑިއާގެ ފުޓްބޯޅައިގެ ހުރިހާ ހަރަކާތްތަކެއް ސަސްޕެންޑް ކުރީ ސުޕްރީމް ކޯޓުން އައްޔަންކުރި ތިން މެމްބަރުންގެ ކޮމިޓީގެ ބެލުމުގެ ދަށުން މި މަހުގެ 28 ވަނަ ދުވަހު އިންޑިއާ ފުޓްބޯޅައިގެ އިންތިހާބު ބާއްވަން ތައްޔާރުވަމުން ދަނިކޮށެވެ.

ފީފާގެ ސަސްޕެންޝަނާއި އެކު އިންޑިއާގެ ސަރުކާރާއި ސުޕްރީމް ކޯޓަށް ފުޓްބޯޅާއިގެ ގިނަ ބައެއްގެ ފާޑު ކިއުން އަމާޒުވުމާއި ސަރުކާރުން ވަނީ މިކަމަށް ހައްލެއް ހޯދައިދިނުމަށް ސުޕްރީމް ކޯޓުގައި އެދިފައެވެ. މިއާއިއެކު އެ ގައުމުގެ ސުޕްރީމް ކޯޓުން ވަނީ ފީފާގެ އެދުމާއި އެއްގޮތަށް ކަންކުރަން ނިންމާފައެވެ.

އިންޑިއާގެ ސުޕްރީމް ކޯޓުން މި ގޮތަށް އަމުރު ކޮށްފައިވަނީ މި މަހުގެ 21 ވަނަ ދުވަހު އެވެ. އެގޮތުން އިންޑިއާ ފުޓްބޯޅަ ފެޑެރޭޝަން ހިންގުމާއި އާ އިންތިހާބެއް ބޭއްވުމަށް މެއި 18 ވަނަ ދުވަހު އައްޔަންކުރި ތިން މެމްބަރުންގެ ކޮމިޓީގެ މަސައްކަތް ނިމުމަކަށް ގެނައުމަށް ކޯޓުން ވަނީ އަމަރު ކޮށްފައެވެ.

ފީފާ ކައުންސިލުން ބުނީ ސަސްޕެންޝަން އުވާލި ނަމަވެސް އާ ލީޑަޝިޕެއް އިންޑިއާ ފުޓްބޯޅަ ފެޑެރޭޝަން ހިންގުމާ ހަވާލުވަންދެން، ކަންކަން ދާ ގޮތް ފީފާ އިން މޮނިޓާ ކުރަމުންދާނެ ކަމަށެވެ.

ސަސްޕެންޝަން އުވާލިއިރު، ފީފާ އިން ނިންމާފައިވަނީ އަންނަ އޮކްޓޫބަރު މަހު އިންޑިއާގައި ބާއްވަން ނިންމާފައިވާ 17 އަހަރުން ދަށުގެ އަންހެނުންގެ ވޯލްޑް ކަޕް ކުރިން ވެސް ރޭވިފައި އޮތް ގޮތަށް އިންޑިއާގައި ކުރިއަށް ގެންދިއުމަށެެވެ. ސަސްޕެންޝަނާއި އެކު މީގެ ކުރިން ފީފާއިން ވަނީ އެހެން ގައުމެއްގައި އެ މުބާރާތް ބޭއްވުމައް މަޝްވަރާ ކުރަމުން އަންނަ ކަމަށް ބުނެފައެވެ.