މެންޗެސްޓާ ސިޓީއަށް އަލަށް ގުޅުނު އާލިންގ ހާލަންޑުގެ ހެޓްރިކުން ސިޓީއިން ފަހަތުން އަރާ ކްރިސްޓަލް ޕެލެސް ބަލިކޮށްފިއެވެ.

މިރޭގެ ސިޓީގެ ދަނޑުގައި ކުޅުނު މި މެޗު ކްރިސްޓަލް ޕެލެސްއިން ފަށާފައިވަނީ ވަރުގަދަ ކޮށެވެ. ކްރިސްޓަލް ޕެލެސްގެ ވަރުގަދަ ފެށުމުގައި ސިޓީގެ ބަދުނަސީބުވެސް ވަނީ އަތެއް ކުޅެފައެވެ. އެގޮތުން މެޗުގެ 4 ވަނަ މިނަޓުގައި ކްރިސްޓަލް ޕެލެސްއިން ލީޑު ނަގާފައިވަނީ ސިޓީގެ ޖޯން ސްޓޯންސް އަތުން ބައިކޮޅަށް ވަތް ގޯލަކުންނެވެ.

ގޯލުގެ ސަބަބުން ކްރިސްޓަލް ޕެލެސްއަށް މެޗުގެ މާބޮޑު ކޮންޓްރޯލެއް ނުލިބުނަސް އެ ޓީމުން ދިޔައީ ކައުންޓާ އެޓޭކުގައި ސިޓީގެ ގޯލަށް ނުރައްކާ ކުރުމަށް މަސައްކަތް ކުރަމުންނެވެ. އެގޮތުން ސިޓީ ސިއްސުވާލާ މެޗުގެ 21 ވަނަ މިނަޓުގައި ކްރިސްޓަލް ޕެލެސްގެ ދެވަނަ ގޯލު ޖަހައިދިނީ ޖޯކިމް އެންޑަސަންއެވެ.

ކްރިސްޓަލް ޕެލެސްގެ ދެވަނަ ގޯލަށް ފަހު ސިޓީއިން ވަނީ މެޗުގެ ތެރެއަށް ބޮޑަށް ވަދެ ނަތީޖާ އަނބުރާލުމަށް މަސައްކަތް ކޮށްފައެވެ. ނަމަވެސް މެޗުގެ ފުރަތަމަ ހާފުގައި ސިޓީއަށް ވަނީ ގޯލެއް ޖެހޭ ގޮތް ނުވެފައެވެ. ދެވަނަ ހާފުވެސް ސިޓީއިން ފެށީ ފުރަތަމަަ ހާފު ނިންމި ބީދައިންނެވެ. ސިޓީގެ ފުރަތަމަ ގޯލު ފެނިގެން ގޮސްފައިވަނީ މެޗުގެ 53 ވަނަ މިނަޓުގައެވެ. އެ ޓީމަށް މި ގޯލު ކާމިޔާބު ކޮށްދިނީ ބާނާޑޯ ސިލްވާއެވެ.

މެޗުގެ ނަތީޖާ އަނބުރާލާފައިވަނީ އާލިންގ ހާލަންޑުގެ ތަފާތު ކުޅުމުންނެވެ. އޭނާ ސިޓީއަށް ނަތީޖާ އެއްވަރު ކޮށްދިނީ މެޗުގެ 62 ވަނަ މިނަޓުގައެވެ. މި މެޗުގައި ފެނިގެންދިޔަ ހާލަންޑުގެ ދެވަނަ ގޯލު ފެނިގެން ގޮސްފައިވަނީ މެޗުގެ 70 ވަނަ މިނަޓުގައެވެ. މެޗުގެ 81 ވަނަ މިނަޓުގައި ހާލަންޑުވަނީ ތިންވަނަ ގޯލެއްޖަހާ އޭނާގެ ހެޓްރިކް ކާމިޔާބު ކޮށްފައެވެ.

މި ތިން ގޯލާއި އެކު ހާލަންޑު ވަނީ މިހާތަނަށް އޭނާ ސިޓީއަށް ކުޅެދިން 4 މެޗުގައި 6 ގޯލު ކާމިޔާބު ކޮށްދީފައެވެ. ސިޓީއިން ދެން ލީގުގައި ނިކުންނާނީ ނޮޓިންގހަމް ފޮރެސްޓާއި ދެކޮޅަށެވެ.