ޚާރިޖީ މަސްލަހަތު ހިމާޔަތްކުރުމުގެ ނަމުގައި "އިންޑިއާ އައުޓު" ކިޔުމަކީ ކުށެއްކަމަށް ކަނޑައަޅައި ސަރުކާރުގެ ފަރާތުން މަޖިލީހަށް ހުށައެޅި ބިލަކީ އަވައްޓެރި އިންޑިއާގެ ވެރިކަން ކުރާ ޕާޓީ ބީޖޭޕީއިން ޑްރާފްޓު ކުރި ބިލެއްކަމަށް މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެއެވެ. 

ޝިޔާމު މިފަދައިން ވިދާޅުވީ ބިލައް ތާއީދު ނުކުރައްވާކަން ފާހަގަކުރައްވާ އެ ބިލު އަނބުރާ ގެންދިއުމަށް ގޮވާލާ މަޖިލީހުގައި ވާހަކަދައްކަވަމުންނެވެ. 

ޝިޔާމު ވިދާޅުވީ ބީޖޭޕީއަކީ އެ ގައުމުގެ ރައްޔިތުންވެސް މިއަދު ބަލައިގަންނަ ޕާޓީއެއް ނޫންކަމަށެވެ. އެ ގައުމުގައި ދިރިއުޅޭ މިސްލިމު ރައްޔިތުންނަށްވެސް ބޮޑެތި އަނިޔާތަކެއް ބީޖޭޕީއިން މެދުންދާއިރު، ބީޖޭޕީގެ ހައްގުގައި ދިވެހިރައްޔިތުންގެ ހައްގުތައް ހަނިކޮށް ބިލުަތައް ތައްޔާރުކޮށްގެން ނުވާނެކަމަށެވެ. އަދި އެފަދަ ބިލެއް މަޖިލީހަށް ހުށައަޅައިގެންވެސް ނުވާނެކަމަށް ޝިޔާމު ވިިދާޅުވިއެވެ. 

Advertisement

އެއާއެކު ޝިޔާމު ވަނީ ތަކުރާރުކޮށް ސަރުކާރުގެ ފަރާތުން ގާނޫނުލް އުގޫބާތަށް އިސްލާހު ގެނައުމަށް ހުށައަޅާފައިވާ ބިލަކީ ބީޖޭޕީއިން ޑްރާފްޓުކޮށްފައިވާ ބިލެއްކަމަށް ވިދާޅުވެފައެވެ. 

"މިނިވަން ގައުމެއް މި ގައުމަކީ، ދިވެހިރާއްޖޭގެ ގާނޫނު ހަދާ މަޖިލީހަށް މި ޑްރާފްޓެއް ނުދެއްވޭނެ. މި ޑްރާފްޓުގައި މި އޮތީ މި ގައުމުގެ މަސްހަލަތަށްވުރެ ބޮޑަށް އެހެން ގައުމެއްގެ މަސްލަހަތު ހިމާޔަތްކޮށްދީފަ، 

ޝިޔާމު އިތުރަށް ވިދާޅުވީ ރާއްޖޭގައި ގަވައިދާއި ޚިލާފަށް އިންޑިއާ ސިފައިން ތިބިކަން ޑިފެންސް މިނިސްޓަރު ޔަގީންކޮށްދެއްވާކަމަށެވެ. އިންޑިއާއެކު ހަދާފައިވާ އަޑި ނޭނގޭ އެއްބަސްވުންތަށް ސަރުކާރުން ހާމަނުކުރަނީވެސް އޭގައި ރާއްޖޭގެ މިނިވަންކަމަށް ބުރޫ އަރާ އެތައް ކަމެއް ހުރުމުންކަމަށް އޭނާ ވިދާޅުވިއެވެ. 

މިހާރު ސަރުކާރުން ކުރަން މަސައްކަތް ކުރާ ކަމަކީ އެ ވާހަކަ ދެއްކުވުން ހުއްޓުވާ ރައްޔިތުނގެ އަނގައި ޓޭޕު އެޅުމުގެ މަސައްކަންކަމަށް ޝިޔާމު ވިދާޅުވިއެވެ. އަދި އެ ބިލގެ ސަބަބުން ނޫސްވެރިކަން ކުރުމުގެ ހައްގަށްވެސް ހުރަސް އެޅިގެންދާނެކަމަށް އޭނާ ވިދާޅުވިއެވެ. 

އެކަންކަން ފާހަގަކުރައްވާ ޝިޔާމު ވަނީ މިހާރު މަޖިލީހަށް ހުށައަޅާފައިވާ ބިލު ބޭރުކުރުމަށް ތަކުރާރުކޮށް ގޮވާލާފައެވެ. 

ޚާރިޖީ މަސްލަހަތު ނަގާލުމަކީ ކުށެއްކަމަށް ހެދުމަށް ގާނޫނުލް އުގޫބާތު އިސްލާހު ކުރުމަށް ހުށައަޅާފައިވާ ބިލުގައި، ބޭރު ގައުމަކާއި ދޭތެރޭގައި ނަފްރަތު އުފެދިދާނެ ނުވަތަ ރުޅިވެރިކަން އުފެދިދާނެ ވާހަކައެއް ދެއްކުމަކީވެސް، ނުވަތަ އެފަދަ ފޮޓޯއެއް، އޯޑިއޯއެއް ނުވަތ ވީޑިއޯއެއް ބޭނުންކުރުމަކީވެސް ކުށެއްކަމުގައި ވަނީ ކަނޑައަޅާފައެވެ. އަދި ކުށުގެ ކުޑަ ބޮޑު މިނަށް ބަލާ އެފަދަ ކަމެއް ކުރާ ފަރާތަކަށް 2 އަހަރު ދުވަހުގެ ޖަލުހުކުމެއް ކުރެވޭގޮތަށް ހިމެނުމަށްވެސް ވަނީ ހުށައަޅާފައެވެ.