ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއަށް އޮޅިވަޑައިގެން ޓުއަރިޒަމާއި ބެހޭ ގާނޫނަށް ގެނައި އިސްލާހު ތަސްދީގުކުރެއްވުމާއި ގުޅިގެން މި މުއްދަތުގެ ތެރޭގައި ދައުލަތަށް ގެއްލުނު ގްރީން ޓެކްސްގެ ފައިސާ އަލުން އަނބުރާ ހޯދުމަށް މިހާރު ހުށައަޅާފައިވާ އިސްލާހުގައި ނުހިމެނޭކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ. 

މިދިޔަ ޖޫން މަހު މަޖިލީހުން ފާސްކުރި ޓޫރިޒަމާ ބެހޭ ގާނޫނަށް ގެނައި އިސްލާހުގައި ތާރީހު ޖަހާފައި އޮތް ރަނގަޅަށް ނުބައްލަވާ، އެ އިސްލާހު ރައީސް ސޯލިހު ތަސްދީގު ކުރެއްވުމާއި ގުޅިގެން ގްރީން ޓެކްސް ނެގުން ވަނީ ހުއްޓިފައެވެ. އެކަމުގެ ސަބަބުން ދައުލަތަށް ލިބެން ޖެހޭ 600 މިލިއަން ރުފިޔާ ނުލިބިއޮތްކަން ފާހަގަކޮށްލެވެއެވެ. 

މިހާރު އަނެއްކާވެސް ގާނޫނުގައި އޮތް ތާރީހު ބަދަލުކޮށް، ޓުއަރިޒަމާއި ބެހޭ ގާނޫނަށް އިސްލާހު ހުށައަޅާފައިވާއިރު، މިއަދު މަޖިލީހުގައިވަނީ އެ ބިލަށް ބަހުސްކޮށްފައެވެ. 

Advertisement

ބިލަށް ބަހުސްކުރެއްވި ބައެއް މެމްބަރުންވަނީ ކުރިން ތަސްދީގުކުރި ބިލާއެކު ދައުލަތަށް ގެއްލުނު ގްރީން ޓެކްސް ފައިސާ އަނބުރާ ހޯދޭނެގޮތަށް ބިލުގައި ހިމަނައިދިނުމަށް އެދިފައެވެ. 

ބަހުސްގެ ތެރެއިން ފުރުސަތެއް ހޯއްދަވާ ނަޝީދުވަނީ އެފަދައިން މާއްދާއެއް ހިމެނުމާއި ދެކޮޅު ހައްދަވާފައެވެ. އަދި އެގޮތަށް އެކަން ނުކުރެވޭނެކަމަށްވެސް ނަޝީދު ވިދާޅުވިއެވެ. 

ނަޝީދު ވިދާޅުވީ ބިލުގައި ބުނާ ގޮތުން ޖުލައި ތިނަކުން ފެށިގެން މި ބިލު ތަސްދީގުކުރުމާ ދެމެދުގައި ހިނގާފައިވާ މުއްދަތުގައި ގްރީން ޓެކްސްގެ ގޮތުގައި ޓޫރިސްޓެއް އަތުން ފައިސާ ނަގައިފި ނަމަ އެ ފައިސާ އެ ފަރާތަކަށް އަނބުރާ ނުދައްކާހާ ހިނދަކު ދައުލަތަށް އަނބުރާ އެ ޓެކްސް ދައްކަން ޖެހޭނެ ކަމަށެވެ.

އެހެން ނަމަވެސް ގާނޫނު އަސާސީގެ 59 ވަނަ މާއްދާއަށް ބަލާއިރު ގާނޫނުގައި ކުށެއް ކަމަށް ކަނޑައަޅާފައި ނުވާ ކަމެއް ފަހުން ހަދާ ގާނޫނަކުން އަދަބު ނުލިބޭނެކަމަށް ބަޔާންކޮށްފައިވާއިރު، އެ ގާނޫނާއި ފުށޫއަރާގޮތަށް، ގްރީންޓެކްސް ފައިސާ ހޯދުމަށް މާއްދާއެއް ނުހިމެނޭނެކަމަށް އޭނާ ވިދާޅުވިއެވެ. 

"މިހާރު ހުށަހަޅުއްވާފައިވާ ގާނޫނުގައި ތިޔަ ވިދާޅުވަނީ ކުރީގައި ކޮށްފައި އޮތް ކަމެއް އެހެން ގޮތަކަށް ހެދުމަށް. އެކަން ހިނގައިދިޔަ ފަހުން ގާނޫނެއް ހައްދަވަން. މިއީ ގާނޫނުގައި އަޅުގަނޑު ދެކޭ ގޮތުގައި މި މާއްދާއެއް ނުހިމެނޭނެ،" ނަޝީދު ވިދާޅުވި އެވެ.

ޓުއަރިޒަމާއި ބެހޭ ގާނޫނަށް ކުރިން ގެނައި އިސްލާހާއެކު، ޓެކްސް ނަގަން ފަށާނެ ތާރީހެއްކަމަށް ކަނޑައަޅާފައި އޮތީ އަންނަ އަހަރުގެ ޖެނުއަރީއިން ފެށިގެންނެވެ. 

މިރާގެ ތަފާސް ހިސާބުތައް ދައްކާގޮތުން މި އަހަރުގެ ޖޫން މަހުގެ ނިޔަލަށް 547 މިލިއަށްވުރެ ގިނައިން ގްރީން ޓެކްސްގެ ގޮތުގައި ލިބިފައިވާއިރު، ގްރީން ޓެކްސްގެ ނެގުން މެދުކެނޑުމާއެކު، ދައުލަތަށް 600 މިލިއަން ރުފިޔާގެ ގެއްލުންވާނެއެވެ.