ފަލަސްތީނުގެ ރައްޔިތުންނަށް އިސްރާއީހުގެ ޔަހޫދީ ސިފައިން ދޭ އަނިޔާތައް ކަވަރުކުރަމުންދިޔަ އަލް ޖަޒީރާގެ ނޫސްވެރިއެއް ކަމުގައިވާ ޝީރީން އަބޫ އަކްލަޙް މަރާލީ ޔަހޫދީ އިސްރާޢީލުގެ ސިފައިން ދިން ބަޑީގެ ހަމަލާއެއްގައި ކަމަށް ޔަހޫދީން އެންމެ ފަހުން އެއްބަސްވެއްޖެއެވެ.
ޝީރީން މަރައިލާފައި ވަނީ ޔަހޫދީ އިސްރާޢީލުން ވެރިވެގަނެފައިވާ ހުޅަނގު އައްސޭރީގެ ޖެނިންނަށް އަރައި ހިންގަމުން ދިޔަ އުދުވާންތަކެއް ރިޕޯޓު ކުރަމުން ދަނިކޮށް، މޭ މަހުގެ 11 ވަނަ ދުވަހުއެވެ.
ޝީރީން މަރައިލާފައި ވަނީ ޔަހޫދީ ސިފައިން ބަޑިޖަހައި ދިން ހަމަލާތަކެއްގައި ކަމަށް ފަލަސްތީނުން އެންމެ ފުރަތަމަ ދުވަހުން ފެށިގެން ވެސް ދިޔައީ ބުނަމުންނެވެ. ނަމަވެސް، ޔަހޫދީ އިސްރާޢީލުން ދިޔައީ މި ކަމާ ދެކޮޅު ހަދަމުންނެވެ. އަދި، ޝީރީން މަރުވީ ޔަހޫދީންގެ ބަޑީގެ ހަމަލާއެއްގައި ކަމަށް ބުނާ ރިޕޯޓުތައްވެސް ދޮގުކުރަމުންނެވެ.
އެހެން ނަމަވެސް ޝީރީން މަރުވީ ޔަހޫދީ އިސްރާއިލް ސިފައިންގެ މީހަކު ބަޑިޖަހައި ދިން ހަމަލާއަކުންކަން އެ ގައުމުން ކުރި ތަހުގީގުންވެސް ވަނީ ހާމަވެފައެވެ.
ޝީރީން މަރުވީ ކޮން ބަޔަކު ދިން ބަޑީގެ ހަމަލާއެއްގައި ކަން ކަށަވަރު ކުރުމަށް ފަލަސްތީނުގެ އިތުރުން އެމެރިކާއިން ވަނީ ތަހުޤީޤު ކޮށްފައެވެ. ޝީރީންގެ ހަށިގަނޑަށް އަރާފައިވާ ވަޒަން ތަހުޤީޤު ކުރުމަށް ފަހު އެމެރިކާއިން ވެސް ވަނީ، އޭނާ މަރުވީ ޔަހޫދީ އިސްރާޢީލުގެ ސިފައިން ދިން ހަމަލާއެއްގައި ކަމަށް ބެލެވޭ ކަމުގައި ބުނެފައެވެ.ޝީރީން މަރުވީ ޔަހޫދީ ސިފައިން ދިން ބަޑީގެ ހަމަލާތަކެއް ކަމުގައި އ.ދ.ގެ އިންސާނީ ޙައްޤުތަކާ ބެހޭ އިދާރާއިން ވެސް ވަނީ ބުނެފައެވެ.
ޝީރީންގެ މަރާ ގުޅިގެން އެމެރިކާގެ ނޫހެއް ކަމުގައިވާ ނިއުޔޯކް ޓައިމްސްއިން ވެސް ވަނީ މިނިވަން ތަޙުޤީޤެއް ހިންގާފައެވެ. އެ ނޫހުން ވެސް ބުނީ، ޝީރީން މަރުވީ ޔަހޫދީ ސިފައިން ދިން ހަމަލާތަކެއްގައި ކަމުގައެވެ. އަދި، ޝީރީން މަރުވި ހާދިސާ ހިނގާފައިވާ ސަރަޙައްދުގައި ފަލަސްތީނުގެ ހަތިޔާރު އެޅި އެއްވެސް ޖަމާޢަތަކުން ހަރަކާތްތެރިވެފައި ނުވާ ކަމަށް ވެސް އެ ނޫހުން ބުނެފައިވެއެވެ.
އިސްރާއީލުން ހިންގި ތަހުގީގުންވެސް މި ކަން ސާބިތުވެފައިވީ ނަމަވެސް ޔަހޫދީ އިސްރާއީލުން އަދިވެސް މަސައްކަތްކުރަމުންދަނީ އެކަމުން ބަރީއަވުމަށެވެ. އެގޮތުން ޝީރީންގެ ހަށިގަނޑަށް ވަޒަން އަރާފައިވަނީ "އޮޅުމަކުން" ކަމަށް އެމީހުން ވަނީ ބުނެފައެވެ.
ޝީރީން މަރުވީ އިސްރާޢީލު ސިފައިންގެ މީހެއްގެ ބަޑިން ދިން ހަމަލާއެއްގައި ކަމަށް ވުމީ އެކަށީގެންވާ ކަމެއްކަމަށާއި، އިސްރާޢީލު ސިފައިން ބަޑި ޖަހަމުން ދިޔައީ ފަލަސްތީނުގެ ހަތިޔާރު އެޅީ ޖަމާޢަތްތަކުގެ މެންބަރުންނަށް އަމާޒުކޮށްކަމަށާއި އަދި ޝީރީނަކީ ނޫސްވެރިއެއް ކަން އެއިރު ނޭނގޭކަމަށް އެ ކަމާއި ގުޅިގެން އިސްރާއިލުން ނެރުނު ބަޔާނުގައި ވަނީ ބުނެފައެވެ.
ޝީރީން މަރާލުމުގެ އިތުރުން ޔަހޫދީ ސިފައިންވަނީ އޭނާގެ ޖަނާޒާ ކުރިއަށް ދިޔަވަގުތުވެސް ހަމަލާދީފައެވެ. އެގޮތުން ޖަނާޖާގައި ބައިވެރިވި މީހުންނަށްވެސް ހަމަލާދީ އުދުވާން ހިންގި މަންޒަރު ފެނިގެންދާ ފޮޓޯތަކެއްވެސް ވަނީ އާންމުވެފައެވެ.
އަނިޔާވެރިގޮތަކަށް ޖަޒީރާ ނޫހުގެ ނޫސްވެރިޔާ ޝީރީން މަރާލުމާއި ގުޅިގެން ފަލަސްތީނުގެ އިތުރުން ދުނިޔޭގެ އެކި ކަންކޮޅުތަކުގައި ވަނީ ހިތާމަ ފާޅުކޮށްފައެވެ.
ޝީރީން އަކީ އޭނާގެ އުމުރުގެ 25 އަހަރު ފަލަސްތީނުގެ ރައްޔިތުންނަށް އެ ގައުމަށް ވެރިވެގަތް ޔަހޫދީން ދެމުންދާ އަނިޔާތައް ގެނެސްދިނުމުގައި މަސްކަތް ކޮށްފައިވާ ނޫސްވެރިއެކެވެ. އޭނާގެ ގަޔަށް ޔަހޫދީ އިސްރާއީލުން ބަޑިޖެހީ ނޫސްވެރިން ބޭނުންކުރާ ވެސްޓުވެސް ލައިގެން ހުއްޓައެވެ. އެ މައްސަލަ އަލް ޖަޒީރާއިން ވަނީ ބައިނަލްއަގުވާމީ ޖިނާއީ ކޯޓަށްވެސް ހުށައަޅަން ނިންމާފައެވެ.
Advertisement
This content is created and paid for by advertisers and does not involve Voice Journalists
