އިންޓަނޭޝަނަލް ސްޕޭސް ސްޓޭޝަން (އައި.އެސް.އެސް) މިރޭ މާލެ މަތިން ދަތުރުކުރާނެއެވެ.

އައި.އެސް.އެސް މާލެއަށް ފެންނާނީ މިރޭ 18:47 ގައެވެ. އައި.އެސް.އެސް ލޮލަށް ފެންނާނީ 6 މިނެޓާއި 46 ސިކުންތަށެވެ.

އިންޓަނޭޝަނަލް ސްޕޭސް ސްޓޭޝަން މާލެއަށް ފެންނާނީ ހުޅަނގު ދެކުނުންނެވެ. އެއީ އުތުރުން ފެށިގެން 215 ޑިގްރީއެވެ. އަދި ދަތުރުކުރާނީ އިރު އުތުރަށެވެ. އައި.އެސް.އެސް މާލެއަށް ފެންނާނީ 18:47 ގައެވެ. އަދި ގެއްލޭނީ 18:54 ގައެވެ. މާލެއާ ދިމާ މެދަށް ސްޓޭޝަން އަރާނީ 18:50ގައެވެ.

Advertisement

މާލެ ނޫން އެހެން ސަރަޙައްދުތަކަށްވެސް މިރޭ އައި.އެސް.އެސް ފެންނާނެއެވެ.

އެގޮތުން ރާއްޖޭގެ އެންމެ ދެކުނުން އައްޑޫއަށް ފެންނާނީ 18:46ގައެވެ. އަދި ގެއްލޭނީ 18:53ގައެވެ. ރާއްޖޭގެ އެންމެ އުތުރުން ތުރާކުނަށް އައި.އެސް.އެސް ފެންނާނީ 18:48ގައެވެ. އަދި ގެއްލޭނީ 18:55ގައެވެ.

އައި.އެސް.އެސް ދުނިޔެވަށާ ބުރެއް ޖަހަނީ 93 މިނެޓުންނެވެ. އެހެންކަމުން ކޮންމެ ދުވަހަކު ދުނިޔެވަށާ 15.5 ބުރު ޖަހައެވެ. އެވަގުތު ހުރި ތަނެއްގެ ސީދާ މަތިން އައި.އެސް.އެސް ދަތުރު ނުކުރި ނަމަވެސް ކައިރި ސަރަޙައްދުތަކުން ދަތުރުކުރާ ވަގުތުތަކުގައި ހަމަލޮލަށް ފެންނާނެއެވެ. އެންމެ ތިރިން ދަތުރުކުރާއިރު އައި.އެސް.އެސް ދަތުރުކުރަނީ ބިމަށްވުރެ 413 ކިލޯމީޓަރު އުހުގައެވެ.

އައި.އެސް.އެސް އަކީ ދުނިޔެ ވަށާ ދަތުރުކުރާ އެންމެ ބޮޑު ސެޓެލައިޓެވެ. ދިގުމިނުގައި 73 މީޓަރު އަދި ފުޅާމިނުގައި 109 މީޓަރު ހުންނަ މި ސްޕޭސް ސްޓޭޝަން އޮޕަރޭޓްކުރަނީ ދުނިޔޭގެ ފަސް ސްޕޭސް އޭޖެންސީއަކުންނެވެ.

އެއީ އެމެރިކާގެ ނާސާ، ރަޝިއާގެ ރޮސްކޮމޮސް، ޔޫރަޕްގެ އީ.އެސް.އޭ، ޖަޕާންގެ ޖާޒާ އަދި ކެނެޑާގެ ސީ.އެސް.އޭ އެވެ. އައި.އެސް.އެސް ޖައްވަށް ލޯންޗުކޮށްފައިވަނީ 1998ވަނަ އަހަރުގެ ނޮވެމްބަރު 20ވަނަ ދުވަހުއެވެ.