ގޭންގުތަކުން ސިޔާސީ ފަރާތްތަކަށް ނުފޫޒު ފޯރުވައި ދައުލަތުގެ އެކި ގުނަވަންތަކަށް ބާރު ފޯރުވަމުން ގެންދާ ކަމަށް ފުލުހުން ބުނެފިއެވެ.

މިހާރު ކުރިއަށްދާ "ވިއަވަތި ރާއްޖެ" ކޮންފަރެންސްގައި ފުލުހުން ހުށަހެޅި ޕްރެޒެންޓޭޝަންގައި ވާގޮތުން ގޭންގު ކުށްތަކުގައި ވޭތުވެދިޔަ 15 އަހަރު ދުވަހުގެ ތެރޭގައި 32 މީހަކު ވަނީ މަރުވެފައެވެ. އޭގެ ތެރޭގައި ދެކުނަށް ނިސްބަތްވާ 6 މީހުން ހިމެނޭކަމަށްވެސް ފުލުހުން މައުލޫމާތު ދެއެވެ.

އަދި މިފަދަ މާރާމަރީތަކާ ގުޅިގެން މީހުން މެރުމުގައި ހިމެނޭ މީހުންގެ ތެރެއިން 185 މީހުންނަކީ ދެކުނުގެ އަތޮޅުތަކަށް ނިސްބަތްވާ މީހުން ހިމެނޭއިރު މީގެ ތެރޭގައި 21 ކުޑަކުދިންވެސް ހިމެނޭކަމަށް ފުލުހުން ބުންޏެވެ. އެ މީހުންގެ ތެރޭގައި ހިމެނެނީ އައްޑޫ ސިޓީއަށް ނިސްބަތްވާ 30 މީހަކާއި ފުވައްމުލަަކަށް ނިސްބަތްވާ 17 މީހަކާއި ގދ.އަތޮޅުގެ ރަށްތަކަށް ނިސްބަތްވާ 15 މީހަކާއި ގއ. އަތޮޅުގެ ރަށްތަކަށް ނިސްބަތްވާ 12 މީހަކާއި ލ. އަތޮޅުގެ ރަށްތަކަށް ނިސްބަތްވާ 15 މީހަކާއި ތ. ރަށްތަކަށް ނިސްބަތްވާ 4 މީހެކެވެ.

ހޯމް މިނިސްޓަރ ޢިމްރާން އާއި ކޮމިޝަނަރ އޮފް ޕޮލިސް މުހައްމަދު ހަމީދުވެސް ބައިވެރިވެ ވަޑައިގެން ކުރިއަށްދިޔަ މި ކޮންފަރެންސްގައި ވާހަކަ ދައްކަވަމުން، ޗީފް އިންސްޕެކްޓަރ އާރިފް ވިދާޅުވީ ދިވެހި ރާއްޖޭގައި ގޭންގުތަކުން ނުރައްކާތެރި އެތައް ޖަރީމާއެއް ހިންގަމުންދާއިރު އެ ގޭންގުތަކުން ސިޔާސީ ފަރާތްތަކަށް ނުފޫޒު ފޯރުވައި ދައުލަތުގެ އެކި ގުނަވަންތަކަށް ބާރު ފޯރުވަމުން ގެންދާ ކަމަށެވެ.

އަދި އެގޮތުން ޝަރުއީ އެކި މައްސަލަ ތަކަށް ނުފޫޒް ފޯރުވާފައިވާއިރު، އެ ގޭންގުތަކުގެ ބާރު ފޯރުވައިގެން ފިހާރަތަކާއި، އޮޑި ދޯނިފަހަރާއި، ބިން ވެސް ގަނެ، ގެސްޓް ހައުސް ހަދާފައިވާކަމަށް ފުލުހުން ބުނެފައިވެއެވެ.