މަސްތުވާތަކެތީގެ މައްސަލަތަކެއްގައި ފުލުހުން ފަސް މީހަކު ހައްޔަރުކޮށްފިއެވެ.
މީގެ ތެރެއިން ހަތަރު މީހަކު އައްޑޫ ސިޓީ ހިތަދޫއިން ހައްޔަރުކޮށްފައިވާއިރު، އަނެއް މީހާ ހައްޔަރުކޮށްފައިވަނި ޅ. ހިންނަވަރުންނެވެ.
އައްޑޫ ސިޓީ އިން ހައްޔަރު ކުރި ހަތަރު މީހުން ހައްޔަރުކޮށްފައިވަނީ ފުލުހުން ހިންގި ވަކި ދެ އޮޕަރޭޝަނެއްގައެވެ. އެގޮތުން މި މަހުގެ 11 ވަނަ ދުވަހު އައްޑޫ ސިޓީ ހިތަދޫގެ ފަޅު ގޯއްޗެއްގައި ބަނގުރާ ކައްކާކަމަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއްގައި ފުލުހުން ވަނީ ދިވެހި ތިން ފިރިހެނުން ހައްޔަރުކޮށްފައެވެ. އެއީ 24 އަހަރުގެ މީހަކާއި 40 އަހަރުގެ މީހެއްގެ އިތުރުން 41 އަހަރުގެ ތިން މީހުންނެވެ. މި އޮޕަރޭޝަނުގައި ބަނގުރާކެއްކުމަށް ބޭނުންކުރާ ކަމަށް ބެލެވޭ ސާމާނުތަކެއް ފެނިފައިވާ ކަމަށް ފުލުހުން ބުނެފައިވެއެވެ.
ފުލުހުން އައްޑޫ ސިޓީ ހިތަދޫގައި ހިންގި ދެވަނަ އޮޕަރޭޝަން ފުލުހުން ހިންގާފައިވަނީ މި މަހުގެ 10 ވަނަ ދުވަހުއެވެ. މި އޮޕަރޭޝަނުގައި ފުލުހުން ވަނީ 21 އަހަރުގެ ދިވެހި ފިރިހެނަކު ހައްޔަރުކޮށްފައިވެއެވެ. އެމީހާ ބަލާ ފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއްހުރި 34 ސެލޯފިންކޮޅު ފެނިފައިވާ ކަމަށް ފުލުހުން ބުނެފައިވެއެވެ. މި މީހާގެ ބަންދައް ކޯޓުން ވަނީ 15 ދުވަސް ޖަހައިދީފައި ކަމަށްވެސް ފުލުހުން ވަނީ ބުނެފައެވެ.
ޅ. ހިންނަވަރުގައި ފުލުހުން އޮޕަރޭޝަނެއް ހިންގާ މީހަކު ހައްޔަރުކޮށްފައިވަނީ މި މަހުގެ 8 ވަނަ ދުވަހުއެވެ. މިއީ އެ އަތޮޅަށް މަސްތުވާތަކެތި އެތެރެކުރަން އުޅޭކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއް ކަމަށާއި މި އޮޕަރޭޝަނުގައި ހައްޔަރުކޮށްފައިވަނީ 36 އަހަރުގެ ދިވެހި ފިރިހެނަކެވެ. މި މީހާގެ ބަންދައް ކޯޓުން 10 ދުވަސް ޖަހާފައިވާ ކަމަށް ފުލުހުން ވަނީ ބުނެފައެވެ.
މި މައްސަލަތައް ފުލުހުން ބަލަމުންދާ ކަމަށް އެ އިދާރާއިން ބުނެފައިވެއެވެ.
Advertisement
This content is created and paid for by advertisers and does not involve Voice Journalists
