މާލޭގައި ހިންގޭ މަޝްރޫއު ތަކަަކީ ޖަޒީރާވަންތަ ރާއްޖެއެއް ތަރައްގީ ކުރުމަށް އޮތް ހުރަހެއް ނޫން ކަމަށް ރައީސުލްޖުމްހުރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.
ލ. ގަމުގައި މިހާރު ކުރިއަށްދާ 'ވިޔަވަތި' ރާއްޖެ ކޮންފަރެންސްގެ ހަވާސާގައި ނޫސްވެރިންނާއި ވާހަކަދައްކަވަމުން ރައީސް ޞާލިހް ވިދާޅުވެފައިވަނީ މިފަހަރުގެ 'ވިޔަވަތި' ކޮންފަރެންސްގައި ހުށަހެގެން ދިޔައީ އެމަނިކުފާނު ހީކުރިވަރަށް މަދު ކަންބޮޑުވުންތަކެއް ކަމަށެވެ. އަދި އޭގެ މާނައަކީ މިދިޔަ މެއި މަހު އއ. އުކުޅަހުގައި ބޭއްވުނު ކޮންފަރެންސުގައި ފާހަގަކުރެވުނު ކަންތައްތަކަށް ސަރުކާރުން ހައްލުތަކެއް ހޯދައިދެވިފައި ހުރިކަމަށް ގަބޫލުކުރައްވާ ކަމަށްވެސް ރައީސް ޞާލިހް ވިދާޅުވިިއެވެ.
މީގެ އިތުރުން ރައީސް ޞާލިހް ވިދާޅުވެފައިވަނީ މާލެއަށް ހައްލެއް ހޯދަން ޖެހޭ ކަމަށެވެ. އަދި މާލޭގައި މިހާރު ދިރިއުޅޭ މީހުންނަށް ހަމަޖެހޭ ދިރިއުޅުމެއް އުޅެވޭނެ ގޮތްތަކެއް ހެދުމައްޓަކައި މާލޭގައި ގެދޮރުވެރިކަން ހޯދައިދީ މަގުތައް ތޮއްޖެހިފައިވާ ޖެހުމަށް ހައްލެއް ހޯދައިދޭން ޖެހޭ ކަމަށްވެސް ރައީސް ޞާލިހް ވަނީ ވިދާޅުވެފައެވެ.
"މާލެއަށް މިގެނެވޭ ތަރައްގީގެ މަޝްރޫއު ތަކަކީ، އަޅުގަނޑު ނުދަންނަވާނަން އެއީއަކީ މުޅި ރާއްޖެ ޖަޒީރާވަންތަ ރާއްޖެއެއްގެ ގޮތުގައި ތަރައްގީ ކުރުމަށް އޮތް ހުރަހެއް ކަމަކަށް"
ރައީސް ޞާލިހް ވިދާޅުވިއެވެ.
މީގެ އިތުރުން ނޫސްވެރިންނާއި ވާހަކަދައްކަވަމުން ރައީސް ޞާލިހް ވިދާޅުވެފައިވަނީ ލާމު އަތުގެ ގުޅިފައިވާ ރައްތަކަކީ ވަރަށް ބޮޑަށް ތަރައްގީ ކުރެވޭނެ ތަނެއް ކަމަށެވެ. އަދި އެ ރަށްތަކުގައި ބޯހިޔާވަހިކަމުގެ މަޝްރޫތައް ހިންގުމާއި، އެއާޕޯޓް އިންޓަނޭޝަނަލް ކުރުމާއި، އެ ސަރަހައްދުގައި ރިސޯޓުތަކެއް ހެދުމަށް ސަރުކާރުގެ ޕްލޭނެއް އެބަ އޮތްކަމަށް ރައީސް ޞާލިހް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
