މިދިޔަ އާދީއްތަ ދުވަހު ހިޔާ ފްލެޓުގެ ހަތަރުވަނަ ޓަވަރުގެ 17 ވަނަ ފަންގިފިލާގައި ހުރި އެޕާޓްމެންޓުން މަގުމައްޗަށް އެއްޗެހި އުކި އަންހެން މީހާ، އަނެއްކާވެސް، އެ ޓަވަރުގައި ހުރި ލިފްޓްގެ ލޮބީއަށް އެއްޗެހި ތަކެއް އުކައިފިއެވެ. 

މިރޭގެ ވަގުތެއްގައި އަނެއްކާވެސް އެ އަންހެން މީހާ ލިފްޓްގެ ލޮބީގެ ތެރެއަށް އެއްޗެހި އުކަމުންދިޔައިރު, އޭނާގެ ކުޑަދަރިފުޅު ރޯ އަޑުވެސް އިވޭ ކަމަށް މަންޒަރު ދުށް ފަރާތަކުން'ވޮއިސް' އަށް މައުލޫމާތު ދީފައިވެއެވެ. އަދި އޭނާގެ މި ޢަމަލުތައް މަންޒަރު ދުށް ފަރާތަކުން ފުލުހުންނަށް ރިޕޯޓް ކުރުމާއި ގުޅިގެން މިވަގުތު އެ އަންހެންމީހާ ވަނީ ފުލުހުންގެ ބެލުމުގެ ދަށަށް ގެންގޮސްފައި ކަމަށްވެސް މައުލޫމާތު ލިބެއެވެ. 

މި މައްސަލަ އާއި ގުޅިގެން ފުލުހުންގެ ބަހެއް މިހާތަނަށް ލިބިފައެއް ނުވެއެވެ. 

Advertisement

މިދިޔަ އާދިއްތަ ދުވަހުވެސް އެ އަންހެން މީހާ ވަނީ ހިޔާ ފުލެޓުގެ އެ އެޕާޓްމަންޓް މަތިން އެކި އެއްޗެހި ތިރިއަށް އުކާފައެވެ. އޭގެ ތެރޭގައި ގޭގައި ގެންގުޅޭ ތަކެއްޗާއި އެނޫންވެސް އެކި ސާމާނު ހިމެނެއެވެ. އަދި އެ އެއްޗެހިތައް ޖެހިގެން ފުލެޓް ތިރީގައި ހުރި ބައެއް އުޅަނދު ތަކަށްވެސް ވަނީ ބޮޑެތި ގެއްލުން ވެފައެވެ. 

އެ މައްސަލަ އާއި ގުޅިގެން ފުލުހުން ބުނީ، ހުޅުމާލޭ ހިޔާ ފުލެޓް ހަތަރުވަނަ ޓަވަރު ކައިރީ ޕާކުކޮށްފައި ހުރި އުޅަނދު ތަކަކަށް ގެއްލުން ލިބިފައިވާ ކަމުގެ ރިޕޯޓް 12:53 ހާއިރު އެ އިދާރާއަށް ލިބިފައިވާކަމަށެވެ. 

އަދި އެ މައްސަލަ އާއި ގުޅިގެން އިތުރަށް ބަލަންޖެހޭ ކަންކަން ބަލަމުން އަންނަ ކަމަށްވެސް ފުލުހުން ބުނެފައިވެއެވެ. 

އެހެން ނަމަވެސް ފުލުހުން އެ މައްސަލަ އާއި ގުޅިގެން ބެލި ކަމެއް މިހާތަނަށް ވެސް ހާމަކޮށްފައި ނުވާއިރު, އެގޭގައި ހުރި ކުޑަ ކުއްްޖާވެސް މިރެއާއި ޖެހެންދެންވެސް ޖެންޑާރ މިނިސްޓްރީ ގެ ބެލުމުގެ ދަށަށް ގެންގޮސްފައެއް ނުވެއެވެ. އަދި އެ އަންހެން މީހާ އެފަދައިން އެއްޗެހި އުކާ ވަކި ސަބަބެއް ސާފުވެފައި ނުވާއިރު، އެފަދަ މީހެއްގެ ބެލުމުގެ ދަށުގައި ކުޑަކުއްޖަކު ބެހެއްޓުމަކީ ރައްކާތެރި ގޮތެއް ނޫން ކަމަށް ބުނެ މީގެ ކުރިންވެސް އާއްމުން ވަނީ ކަންބޮޑުވުން ފާޅުކޮށްފައެވެ.