މާލޭގެ ދަފްތަރުގައި ތިބި ރައްޔިތުން ތަމްސީލުކުރާނެ މެމްބަރެއް މަޖިލީހުގައި ނެތްކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން ވިދާޅުވެއްޖެއެވެ.
ރައްޔިތުންގެ މަޖިލީހަށް މާމިނގިލީ ދާއިރާގެ މެމްބަރު އަދި ޖުމްހޫރީ ޕާޓީގެ ޕީޖީ ލީޑަރު ގާސިމް އިބުރާހިމް ހުށައެޅުއްވި އިސްލާހަށް ވާހަކަދައްކަވަމުން އަލީ ހުސެއިން ވިދާޅުވީ މަޖިލީހުގެ މެމްބަރުން މަދު ކުރުމާއި، ވަކި އަދެއްގައި މެމްބަރުން ހިފެހެއްޓުމަކީ ގާނޫނު އަސާސީއަށް ގެންނަން ޖެހޭ އިސްލާހުތަކުގެ ތެރެއިން އެއް އިސްލާހުކަމަށް ގާބޫލުފުޅުކުރައްވާކަމަށެވެ.
އެހެން ނަމަވެސް އެއަށްވުރެ ޚާއްސަ އިސްކަމެއް ދޭންޖެހޭ ކަންކަން އެބަހުރިކަން އޭނާ ފާހަގަކުރެއްވިއެވެ.
އެގޮތުން ދިވެހިރާއްޖޭގެ އާބާދީގެ 16000އަށް ވުރެ ގިނަ މީހުން މަޖިލީހުގައި ތަމްސީލުނުވެ ތިބިކަން އަލ ހުސެއިން ފާހަގަކުރެއްވިއެވެ. އަދި ވިދާޅުވީ އެ ރައްޔިތުންގެ ހައްގުގައި ބަހެއް ބުނާނެ މެމްބަރަކުވެސް މަޖިލީހުގައި ނެތްކަމަށެވެ.
"އިސްލާހުގެ ވާހަކަ ދައްކާއިރު ރެޕްރެސެންޓު ނުކުރެވޭ ބަޔަކު އެބަ ތިބި. ގާތްގަނޑަކަށް 16000 ދިވެހި ރައްޔިތުން އެބަތިބި. ދަފްތަރުގައި ތިބި މީހުން. އެމީހުންގެ ވާހަކަ ދައްކާލާނެ މެމްބަރަކު މި މަޖިލީހަކު ނެތޭ"
މެމްބަރު އަލީ ހުސެއިން
އަލީ ހުސެއިންގެ ވާހަކައިގައި ވަނީ ސަރުކާރުން އިއުލާނުކުރި ގޯތި ދޫކުރުމުގެ މަޝްރޫއިންވެސް ދަފްތަރުގައި ޖެހުނު ފަރާތްތައް އެކަހެރިކޮށް ބާކީ ކޮށްފައިވާކަން ފާހަގަކުރައްވާފައެވެ.
އަދި އެ ކަމާއި ގުޅިގެން އެމީހުންގެ ހުރި ކަންބޮޑުވުންތަކާއި ޝަކުވާތައް އަހާ އެވާހަކަ އެމީހުންގެ ފަރާތުން މަޖިލީހުގައި ދައްކާލާނެ މެމްބަރަކު ނެތުމަކީ ހިތާމަކުރަން ޖެހޭކަމެއްކަމަށް އޭނާ ވިދާޅުވިއެވެ. އަދި އެއީ ގާނޫނު އަސާސީއިން ރައްޔިތުންނަށް ކަށަވަރުކޮށްދޭ ހަމަހަމަކަން އެ ރައްޔިތުންނަށް ނުދެވި އޮތްކަމުގެ މިސާލެއްގެ ގޮތުގައި އޭނާ ފާހަގަކުރެއްވިއެވެ.
އިންތިޚާބުގައި ވޯޓުލުމަށް އޮންނަ ހައްގުގެ ބޭނުން ހިފުމަށްވެސް ދަފްތަރުގެ މެމްބަރުންނަށް ކުރިމަތިލާންޖެހޭ ތަކުލީފުތަކަށް އަލީ ހުސެއިންގެ ވާހަކައިގައި ވަނީ އަލިއަޅުވާލައްވާފައެވެ.
އޭނާ ވިދާޅުވީ އިންތިޚާބުތަކާއި ދިމާވުމުން ދަފްތަރު އެކި އިދާރާތަކަށް ބައިކުރަމުންދާކަމަށެވެ. އެކަން ކުރަނީ ބައެއް މެމްބަރުން އިލެކްޝަން ކޮމިޝަންގެ ތެރެއަށް ނުފޫޒު ފޯރުވައިގެންކަމަށާއި، އެހެން ވުމުގެ ސަބަބުން، އެކި އިންތިޚާބުތަކުގައި ދަފްތަރުގެ ރައްޔިތުން ވޯޓުލާން ޖެހެނީ އެކި ދާއިރާތަކަށްކަމަށް އޭނާ ވިދާޅުވިއެވެ.
ނަތީޖާއެއްގެ ގޮތުން ދަފްތަރުގެ ރައްޔިތުންގެ ޝަކުވާތައް ހިފައިގެން ދާނެ މެމްބަރަކުވެސް އާޚިރުގައި ނުހުންނަކަން އަލީ ހުސެއިން ފާހަގަކުރެއްވިއެވެ.
"ކަން ވާ ގޮތަކީ ކޮންމެވެސް މެމްބަރަކު (މިހާރުވެސް މި މަޖިލީހުގައި އެބަ އިންނެވި) އިލެކްޝަން ކޮމިޝަނަށް ވަޑައިގެން ވިދާޅުވަނީ ދަފްތަރުގެ މިހިރަ މިހިރަ މީހުން މިތަނަށް، މިތިބަ މީހުން މިތަނަށް، އެހެން ލާފަ، އިލެކްޝަން ކޮމިޝަން މެދުވެރިކޮށް ދަފްތަރު ބަހާލަނީ ބޭނުން ދިމާއަކަށް. އެމީހަކު ބޭނުންވާނެ އެމީހަކަށް ވޯޓ ދޭނެ މީހުން ދަފްތަރުގައި ތިބި މީހުން އެކި ތަންތަނަށް މި އަޅާލަނީ. ނަތީޖާއަކަށް ވަނީ އެކި ފަހަރު ދަފްތަރު މީހުން ވޯޓުލާން ޖެހެނީ އެކި ތަންތަނަށް"
ކެންދޫ މެމްބަރު އަލީ ހުސެއިން
އެ ކަންބޮޑުވުންތައް ހިއްސާކުރެއްވުމަށްފަހު އަލީ ހުސެއިން ވިދާޅުވީ ދަފްތަރު ތަމްސީލުކުރުމަށް މަޖިލީހަށް ގޮނޑި އިތުރުކުރުމުގެ އިސްލާހު މިހާރު ހުށައަޅާފައި އޮތް އިސްލާހަށްވުރެ ބޭނުންތެރިކަމަށް އޭނާ ގަބޫލުކުރައްވާކަމަށެވެ. އަދި ދަފްތަރުގައި ތިބި ރައްޔިތުން މަޖިލީހުގައި ތަމްސީލުވާނެ ގޮތެއް ހޯދުމަކީ ކުރަން ޖެހޭކަމެއްކަމަށެވެ.
"މާ ރަނގަޅު އިސްލާހެއް ދެއްތޯ އެއީ ހަގީގަތުގައި ދަފްތަރަށް ޚާއްސަ ވަކި ގޮނޑިތަކެއް ހެދުން. 16000 ތިބިކަމަށް ވަންޏާ ޚާއްސަކޮށް ހަމަ ދަފްތަރު މެމްބަރުން ކިޔާފައި ތިން މެމްބަރުން ކީއްވެގެން ތޯ ނުތިބެން ވީ؟"
ކެންދޫ މެމްބަރު އަލީ ހުސެއިން
އަލީ ހުސެއިން ވިދާޅުވީ ހަމަހަމަކަން ގާއިމުކުރުމުގެ ވާހަކަ ދައްކާއިރު މި ކަންކަމަކީ ބަދަލުކުރަން ޖެހޭ ކަމެއްކަމަށެވެ. އިސްލާހުގެ ވާހަކަދައްކާއިރު، އެންމެ ފުރަތަމަ ދައްކަން ޖެހެނީ މިހެން ހުންނަ މައްސަލަތަކުގެ ވާހަކަމަށް އޭނާ ވިދާޅުވިއެވެ.
ރައްޔިތުންގެ މަޖިލީސް އުފެދުނުތާ ގިނަ އަހަރުތަކެއް ވެގެންދާއިރު، ސަރުކާރުގެ ގޮތްޕެއްގެ ގޮތުގައި މަޖިލިސް އޮތް އޮތުމަކީވެސް ކޮންމެހެން ބަދަލުވާން ޖެހޭ ކަމެއްކަމަށް އަލީ ހުސެއިންގެ ވާހަކައިގައި ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
