ރައްޔިތުންގެ މަޖިލީހުގެ މެންބަރުންގެ އަދަދު މަދުކުރުމުގެ ކުރިން އެކަމާއިމެދު ދިވެހި ރައްޔިތުން ދެކޭގޮތް ބެލުމަށް، ވޯޓެއް ނަގަންޖެހޭ ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މަޖިލިސް މެންބަރު އިބްރާހީމް ރަޝީދު (ބޮންޑެ) ވިދާޅުވެއްޖެއެވެ.

މެންބަރުންގެ އަދަދު މިހާރު އޮތް ވަރުގައި ހިފަހެއްޓުމަށް ޓަކައި ގާނޫނު އަސާސީއަށް ބަދަލުގެންނަން، މާމިނގިލި ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމް ހުށަހެޅުއްވި އިސްލާހަށް މަޖިލީހުގެ މިއަދުގެ ޖަލްސާގައި ބަހުސްކުރައްވަމުން ބޮންޑެ ވިދާޅުވީ، ފެހި ގާނޫނު އަސާސީ އާއި އެކު ރައްޔިތުންގެ މަޖިލީސް ފެށިއިރު މަޖިލީހުގައި ތިބީ 77 މެންބަރުން ކަމަށެވެ. އެއަށްފަހު މިހާރު 87 މެންބަރުން ތިބި ކަމަށާ، އެ އިތުރުވެފައިވާ މެންބަރުންނަކީ ޚަރަދެއްގެ ގޮތުގައި ބުނާއިރު، މަޖިލީހުގެ އެންމެހައި މެންބަރުންނަކީވެސް ސަރުކާރު ޖަވާބު ދާރީ ކުރުވަން ތިބި ރައްޔިތުންގެ މަންދޫބުން ކަމަށް އޭނާ ވިދާޅުވިއެވެ.

"ޚަރަދުގެ ވާހަކަ ދައްކާއިރުގައި، އަޅުގަނޑަށް ފެނޭ މި ބިލާއި އެއްކޮށް އަޅުގަނޑުމެން ރައްޔިތުންގެ ފެންނަ ނުފެންނަ ވޯޓަކަށް ދާން. ރައްޔިތުން ކައިރިން އަހާލަން. މިހާުރު ތިއްބެވި 87 މެންބަރުންގެ ތެރެއިން 8 މެންބަރުން މަދުކުރަން އަޅުގަނޑުމެންނަށް ފެނެއޭ. އެހެންވީމާ އެކަން ކުރަންޖެހޭނީ ރައްޔިތުން ކައިރީ އަހާލާފައި. އެއީ ރަނގަޅު ގޮތަކީ." މަޖިލިސް މެންބަރުން މަދުކުރަން ރައްޔިތުންގެ ފެންނަ ނުފެންނަ ވޯޓަކަށް ދިއުމަށް އެދި ބޮންޑެ ވިދާޅުވިއެވެ.

ބޮންޑެ ވިދާޅުވީ، ދިވެހިރާއްޖޭގެ ގާނޫނުއަސާސީގައި ވާގޮތުން ނަމަ، ދިވެހި ރައްޔިތުން ވަރަށް ރަނގަޅަށް ތަމްސީލު ކުރަންޖެހޭ ކަމަށެވެ. އެގޮތުން، މިހާރު މަޖިލީހުގައި ތިއްބެވި މެންބަރުންވެސް ކުރައްވަމުންދާ މަސައްކަތަކީ ރައްޔިތުން ތަމްސީލް ކޮށް، ސަރުކާރު ޖަވާބު ދާރީ ކުރުމުގެ މަސައްކަތް ކަމަށެވެ. އެހެން ނަމަވެސް އެކަން ރަނގަޅަށް ނުކުރެވެނީ ނިޒާމުގެ މައްސަލައިން ކަމަށްވެސް ބޮންޑެ ވިދާޅުވިއެވެ.