މިދިޔަ ހުކުރު ދުވަހު މާލޭ މަޖީދީ މަގު ޓެޕްކޮން ހާޑްވެއާ ކައިރިން ތިން ފުލުހުކަށް ހަމަލާދިން މައްސަލައިގައި ފުލުހުން އިތުރު 5 މީހަކު ހައްޔަރުކޮށްފިއެވެ.
ކޮމިޝަނާ އޮފް ޕޮލިސް މުހައްމަދު ހަމީދު ކުރެއްވި ޓުވީޓެއްގައި މިދިޔަ ހުކުރު ދުވަހު ތިން ފުލުހުންނަށް ހަމަލާދިން މައްސަލަައިގައި ފުލުހުން ކުރިއަށް ގެންދާ ހާއްސަ އޮޕަރޭޝަނުގައި ތުހުމަތުކުރެވޭ އިތުރު 5 މީހަކު ހައްޔަރުކޮށްފައިވާ ކަމަށެވެ. އަދި އެ ފަސް މީހުންވެސް ހައްޔަރުކޮށްފައިވަނީ ފިލައިގެންތިއްބާ ކަމަށެވެ.
އަދި މި މައްސަލައިގައި މީގެ ކުރިންވެސް ކޮމިޝަނާ ހަމީދު ގޭންގުތަކަށް ދެއްވާފައިވާ އިންޒާރު ތަކުރާރު ކުރައްވާ ވިދާޅުވެފައިވަނީ ރޭވިގެން ހިންގޭ ގްރޫޕްތައް ހުއްޓުވުމުގައި ފުލުހުން ފަހަތަށް ނުޖެހި ދެމިތިބޭނެ ކަމަށެވެ. އަދި މި މައްސަލަ ފުލުހުން ބަލަމުންދަނީ ސީރިއަސް މައްސަލައެއްގެ ގޮތުގައި ކަމަށްވެސް ހަމީދު ވިދާޅުވިއެވެ.
މި މައްސަލައިގައި މީގެ ކުރިން ހާދިސާ ހިނގި ހުކުރު ދުވަހު ދެމީހުން ހައްޔަރުކޮށް މި މަހުގެ 12 ވަނަ ދުވަހުވެސް ފުލުހުން ވަނީ އިތުރު މީހަކު ހައްޔަރުކޮށްފައެވެ. މީގެ ކުރިން ކޮމިޝަނާ ހަމީދު ވަނީ މި ހަމަލާދީފައިވަނީ ހެންވޭރުގައި ހަރަކާތްތެރިވާ ގޭންގަކުން ކަމުގައި ބުނެފައެވެ.
Advertisement
This content is created and paid for by advertisers and does not involve Voice Journalists
