ބަންގްލަދޭޝްއަށް ނިސްބަތްވާ އަލަމްގިރިއާއި އެކު އެއް ޖިންސުން ގުޅުން ހިންގި މައްސަލައިގައި ނާޒިމް ސައްތާރު ތިންމާހައި 26 ދުވަހަށް ގޭބަންދު ކުރުމަށް ހުކުމްކޮށްފިއެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮށްކޮ ނާޒިމް އާއި އަލަމްގިރި އާއި އެކު އެއްޖިންސުން ގުޅުން ހިންގާ މަންޒަރު ފެންނަ ވީޑިއޯއެއް އާންމުވި މައްސަލައިގައި އޭނާ ހައްޔަރު ކޮށްފައިވަނީ މިދިޔަ ޖުލައި މަހުގެ 28 ވަނަ ދުވަހުއެވެ.

އޭނާގެ ބަންދަށް ދެ ފަހަރު ކޯޓުން މުއްދަތު ޖެހުމަށްފަހު ފުލުހުން އޭނާ އޮގަސްޓް 11 ވަނަ ދުވަހު އޭނާާ ދޫކޮށްލާފައިވަނީ މައްސަލާގެ ތަހުގީގު ނިންމައި, ނާޒިމްގެ މައްޗަށް ދައުވާ ކުރުމާމެދު މަޝްވަރާ ކުރުމަށް ޕްރޮސިކިއުޓާ ޖެނަރަލްގެ އޮފީހަށް ހުށަހެޅުމަށްފަހު އިތުރަށް އޭނާ ބަންދުގައި ބެހެއްޓުމަށް ނުފެންނާތީ ކަމަށް ފުލުހުން ބުނެފައިވެއެވެ.

Advertisement

ގާނޫނުލްއުގޫބާތުގެ ދަށުން ނާޒިމްގެ މައްޗަށް ދައުވާ އުފުލި އިރު އެއީ މީހަކާ އިނދެ ހުރެ ކުރި ކުށަކަށް ވާނަމަ، އެ ގާނޫނުގައިވާ ގޮތުން، އެ ކުށުގެ އަސާސީ އަދަބަކީ ނުވަ މަހާއި 18 ދުވަހަށް ޖަލަށް ލުމެވެ. ނަމަވެސް ނާޒިމް އެ ކުށަށް އިއުތިރާފްވެ އެފަދަ ކުށެއް ދެން ތަކުރާރު ނުކުރާނެ ކަމަށް އޭނާ ބުނުމުން ކޯޓުން ވަނީ އޭނާގެ ހުކުމް އެއް މަހާއި 28 ދުވަހުގެ ޖަލު ހުކުމަކަށް ލުއިކޮށްދީފައެވެ. އެއަށްފަހު އެ ހުކުމް ތިން މަހާއި 26 ދުވަހަށް ގޭގައި ބަންދުކުރަން ހުކުމަކަށް ބަދަލުކޮށްފައިވަނީ ނާޒިމްގެ ފަރާތުން އެކަމަށް އެދުމުންނެވެ. 

މި މައްސަލައިގައި ނާޒިމް އަދި ގިނަ އިތުރު ފިރިހެނުންނާއި އެކު އެއްޖިންސުން ގުޅުން ހިންގި ބަންގްލަދޭޝްގެ އަލަމްގިރިއަށްވަނީ ހަތް މަހާއި ހަ ދުވަހުގެ ޖަލު ހުކުމެށް އިއްވާފައެވެ.

މި މައްސަލައިގައި ނާޒިމް ހައްޔަރުކުރުމުން އޭނާގެ ބޭބެ ރައީސް ނަޝީދު ވަނީ ސަރުކާރަށާއި ރައީސް ޞާލިހަށް ވަރަށް ބޮޑަށް ފާޑުވިދާޅުވެ އެއީ ސިޔާސީ ބޭނުމެއްގައި ސަރުކާރުން ވަކި ބައެއްގެ މައްސަލަ އެކަނި ބެލުމަށް ކުރާ ކަމެއް ކަމަށް ވިދާޅުވެފައެވެ.