މާލެ އާއި ހުޅުމާލެ ސަރަހައްދުގައި ބޯހިމެނުމުގެ މުއްދަތު މިމަހުގެ 27ގެ ނިއަލަށް އިތުރު ކޮށްފިއެވެ. 

ބޯހިމެނުމުގެ މުއްދަތު އެންމެ ފުރަތަމަ ކަނޑައަޅާފައި ވަނީ މި މަހުގެ 13އިން 14 އަށް އަދި 17 އިން ފެށިގެން ގޮސް 25ވަނަ ދުވަހުގެ ނިޔަލަށެވެ. އެގޮތުން 13 އަދި 14 ވަނަ ދުވަހު ކުރިއަށް ގެންގޮސްފައި ވަނީ ގޭބިސީތަކާއި ވިޔަފާރިތަކާއި ގުޅޭ މަޢުލޫމާތު އެއްކުރުމަށް މަސައްކަތެވެ. 17 އިން ފެށިގެން 25 ކުރިއަށްދާނީ ގޭބިސީތަކުގައި ދިރިއުޅޭ މީހުންނާއި ދިރިއުޅުމުގެ ޙާލަތާއި ގުޅޭ މަޢުލޫމާތު ނެގުމުގެ މަސައްކަތެވެ.

މި މުއްދަތު މިމަހު 27 އަށް އިތުރު ކޮށްފައިވާކަން އިއުލާންކޮށް، މޯލްޑިވްސް ބިއުރޯ އޮފް ސްޓެޓިސްޓިކްސްއިން މިއަދު ނެރުނު ބަޔާނެއްގައި ބުނީ، ބޯހިމެނުމުގެ ލިސްޓިންގ ގެ މަސައްކަތް މާލެ އަދި ހުޅުމާލޭގެ ބައެއް ސަރަހައްދުތައް ފިޔަވާ މިހާރު ނިމިފައިވާ ކަމަށެވެ. އަދި މާލެ އަދި ހުޅުމާލޭގެ ލިސްޓިންގ ނުނިމިހުރި ސަރަހައްދުތަކުގައި މާދަމާގެ ނިޔަލަށް ލިސްޓިންގ މަސައްކަތް ކުރިއަށްދާނެ ކަމަށާ، ބޯހިމެނުމުގެ ތަފްސީލް މަޢުލޫމާތު ނެގުން މިމަހުގެ 27 ގެ ނިޔަލަށް މި ބްލޮކްތަކުގައި ކުރިއަށްގެންދެވޭނެ ކަމަށެވެ. އެގޮތަށް ނިންމާފައިވަނީ، މާލެ ސަރަހައްދުން ބޭނުންވާ އަދަދަށް އެނިއުމަރޭޓަރުން ނުލިބުމުގެ ސަބަބުން ކަމަށްވެސް އެ ބަޔާނުގައި ވެއެވެ.

މިއާއެކު އެ ބަޔާނުގައި ބުނީ، ބޯހިމެނުމުގެ މަޢުލޫމާތު އެއްކުރާ ޓީމްތައް ހަރަކާތްތެރިވާނީ ކޮންމެ ދުވަހަކުވެސް ހެނދުނު 9:00 އިން 19:00 އަށް ކަމަށާއި އަދި ހުކުރު ދުވަހު ހެނދުނު 9:00 އިން 11:00 އަށް އަދި 14:30 އިން 19:00 އަށް ކަމަށެވެ. ނަމަވެސް ހާއްސަ ހާލަތްތަކުގައި ރޭގަނޑު ގަޑީގައި ހަރަކާތްތެރިވާނެ ކަމަށް ބުނެފައިވެއެވެ.

މީގެ އިތުރުން، ލިސްޓިންގ ނިމުމުން މީހުންގެ އަދި މަސައްކަތްހިންގާތަންތަނުގެ ތަފްސީލް މައުލޫމާތުނެގުމަށް ދެވަނަފަހަރަށް ޒިޔާރަތްކުރާނެ ކަމަށްވެސް އެ ބަޔާނުގައި ވެއެވެ.

ބޯހިމެނުމުގައި ރާއްޖޭގައި ދިރިއުޅޭ ހުރިހާ ދިވެހިންނާއި ބިދޭސީންގެ މަޢުލޫމާތު އެއްކުރެވެއެވެ. މިއީ ޤާނޫނު ނަންބަރު 2021/16 ދިވެހިރާއްޖޭގެ ތަފާސްހިސާބުގެ ޤާނޫނުގެ 41 ވަނަ މާއްދާގެ ދަށުން މުޅިރާއްޖޭގެ ހުރިހާ ރަށެއްގައި ހިންގޭ ތަފާސްހިސާބުގެ ހަރަކާތެކެވެ.

މިފަރާތްތަކަށް މޯލްޑިވްސް ބިއުރޯ އޮފް ސްޓެޓިސްޓިކްސްގެ ހުއްދަ ދެވިފައިވާ މީހެއްކަން އަންގައިދޭ ބިއުރޯގެ ރަސްމީ ތައްގަނޑު ޖަހާފައިވާ ފާހެއް ދޫކުރެވިފައިވާނެއެވެ. ބޯހިމެނުމަށް މަޢުލޫމާތު ދިނުމުގެކުރިން މިފާސް އޮތްމީހެއްތޯ ޔަގީންކުރުމަށް އާންމު ރައްޔިތުންގެ ކިބައިން އެ އިދާރާއިން އެދީފައިވެއެވެ.  އަދި މިފަރާތަކީ ބޯހިމެނުމުގެ މައުލޫމާތު އެއްކުރުމުގެ ހުއްދަ ދެވިފައިވާ ފަރާތެއްކަން އިތުރަށް ޔަގީންކުރުމަށް ބޭނުންނަމަ mv.mpao.stag.census://https ލިންކް މެދުވެރިކޮށް އެނިއުމަރޭޓަރުންގެ ދިވެހިރައްޔިތެއްކަން އަންގައިދޭ ކާޑު ނަންބަރު ބޭނުންކޮއްގެން ވެރިފައިކުރެވޭނެއެވެ. މީގެ އިތުރުން ބިއުރޯގެ ހޮޓްލައިން 1423 މެދުވެރިކޮށްވެސް އެނިއުމަރޭޓަރުންގެ ޞައްހަކަން ދެނެގަނެވިދާނެއެވެ.

ބޯހިމެނުމުގައި މަޢުލޫމާތުނެގޭނީ ހަވާލާދޭ ވަގުތު އެމީހަކު ނިދާ ދިރިއުޅުނު ތަނުންނެވެ. ލިސްޓިންގ ގައި ނެގޭ މައުލޫމާތުގެތެރޭގައި ތަނުގައި ހުރި ކޮޓަރީގެ އަދަދު، ގޭބިސީގެ އިސްމީހާ، މަސައްކަތްހިންގާ ތަނެއްނަމަ މުވައްޒަފުންގެ އަދަދު، ގުޅޭނެ ނަންބަރު ފަދަ މަޢުލޫމާތު ހިމެނެއެވެ. މީހަކާ ދިމާނުވާނަމަ ޓީމްތަކުން އެކިފަހަރުމަތިން ބަލާ ދިމާނުވާތަންތަނަށް، އެޓީމާއި ގުޅޭނެ ނަންބަރު އެނގޭހެން ފްލަޔަރ އެއްލެވޭނެއެވެ. ޓީމާއި ނުގުޅިއްޖެނަމަ ބިއުރޯގެ ހޮޓްލައިން 1423 މެދުވެރިކޮށް މަޢުލޫމާތު އެއްކުރެވޭނެއެވެ.

ބޯހިމެނުމުގެ މަސައްކަތަކީ ކޮންމެ 10 އަހަރަކުން އެއްއަހަރު ޤައުމުގެ ޙާލަތު ވަޒަންކޮށް ކުރިމަގުގައި ކުރިއަށްގެންދާ މަޝްރޫޢުތައް ޕްލޭންކުރުމަށް މަގުފަހިކުރުމަށް ބޭނުންވާ މަޢުލޫމާތު އެއްކުރުމަށް ކުރިއަށްގެންދާ ޤައުމީ ތަރައްޤީގެ މަސައްކަތެކެވެ. މީގެ ދަށުން ގޭބިސީތަކުގައި ދިރިއުޅޭ މީހުންގެ މަޢުލޫމާތާއި ދިރިއުޅުމުގެ ޙާލަތު ދެނެގަތުމަށް މަސައްކަތްކުރާނެއެވެ. އެހެން ފަހަރުތަކާއި ޚިލާފަށް މިފަހަރު ވިޔަފާރިތަކާއި މަސައްކަތްކުރާ އިދާރާތަކުގެ މަޢުލޫމާތުވެސް އެއްކުރުމަށްވަނީ ހަމަޖެހިފައެވެ.

.