މިއަދުގެ ހުކުރު ޚުޠުބާގައި ރައްޔިތުންނަށް އޮޅޭގޮތަށް އިސްލާމްދީނުގެ ޞައްޙަ ޢަޤީދާއާއި ޚިލާފު, ހުޅަނގުގެ ސެކިއުލަރ ލާދީނީ ފަލްސަފާއަށް ފާޅުގައި ގޮވާލައްވާފައިވާކަން ފާހަގަކުރައްވައި ޝެއިޚް އާދަމް ނިޝާން ކަންބޮޑުވުން ފާޅުކުރައްވައިފިއެވެ.

މިއަދުގެ ހުކުރު ޚުޠުބާގައި ވަނީ، އަހަރެމެންގެ މެދުގައި އެކި ތަފާތުތައް ހުރި ނަމަވެސް ގައުމުގެ މަސްލަހަތަށާއި، މުޖުތަމައުގެ ލާބައަށް އިސްކަންދޭން ޖެހޭނެ ކަމަށް ބުނެފައެވެ. އެއަށް ފަހު ޚުތުބާގައި ވަނީ ހުޅަނގުގެ ގައުމު ތަކަށް ބެލުމަށެވެ. އެގޮތުން ހުޅަނގުގެ ޤައުމުތަކުގެ މުޖުތަމައު ގައި މީހުން ގިނަވެފައި، ޚިޔާލު ތަފާތުވުންތަކާއި ދެބަސްވުންތައް މާ ގިނަވާނެ ކަން ފާހަގަކޮށް ޚުތުބާގައި ވަނީ އެ މީހުން ޚިޔާލު ތަފާތުވުން ހެދީ ޤައުމު ބިނާކުރުމަށް ބޭނުންވާ ފިކުރާއި ވިސްނުން ހޯދުމަށް ކަމަށް ބުނެފައެވެ.

ޚުތުބާގައި މިފަދައިން ބުނުމާއި ގުޅިގެން ކަންބޮޑުވުން ފާޅުކުރައްވައި ޝައިޚް ނިޝާން ވިދާޅުވީ ސެކިއުލަރ ލާދިނީ ފިކުރު ފެތުރުން އެންމެ ފަހުން ހުކުރު ޚުޠުބާއަށް ވެސް ފޯރައިފި ކަމަށެވެ.

Advertisement

''މިއަދުގެ ހުކުރު ޚުޠުބާގައި ރައްޔިތުންނަށް އޮޅޭގޮތަށް އިސްލާމްދީނުގެ ޞައްޙަ ޢަޤީދާއާއި ޚިލާފު, ހުޅަނގުގެ ސެކިއުލަރ ލާދީނީ ފަލްސަފާގެ: ޤައުމިއްޔަތު ވިސްނުން އިސްލާމީ ޢަޤީދާއަށްވުރެ / ޝަރީޢަތަށްވުރެ އިސްކޮށް، ކޯއެގްޒިސްޓެންސްއާއި ޓޮލަރެންސްގެ ވިސްނުން ( ކޮންމެފަދަ ބާޠިލު ވިސްނުމެއް ފިކުރެއް ވިޔަސް އެޔާއި ދެކޮޅު ނުހަދައި ދެބަސްނުވެ އެކުގައި އުޅުމުގެ ވިސްނުން) ފެތުރުމަށް ވަރަށް ފާޅުގައި ވަނީ ގޮވާލާފައެވެ.'' ޝައިޚް ކުރެއްވި ޕޯސްޓެއްގައި ވެއެވެ.

މީގެ އިތުރުން، މުސްލިމުންގެ މެދުގައި އުފެދޭ ފަރްޢީ, ފިޤްހީ މައްސަލަތަކާއި ދުނިޔަވީ ކަންކަމުގައި ދެބަސްވާ ކަންކަމުގައި ޢަމަލު ކުރަންވީ ގޮތް ނަގައިގެން ބާޠިލު ޢަޤީދާތަކާއި, އިސްލާމްދީނުގެ ޘަވާބިތުތަކަށް (ބަދަލުވުމެއް ނެތް ޙުކުމްތަކާއި އަސްލުތަކަށް) އިންކާރުކޮށް, ފުރައްސާރަކޮށް އަދި ދެކޮޅު ހަދާ މީހުންނާމެދު ވެސް ހަރުކަށިނުވެ, ދެކޮޅު ނުހަދައި އިންކާރުނުކޮށް، ދީނަށް ޢަޤީދާއަށް ކިތަންމެ ބޮޑު ގެއްލުމެއް ވީނަމަވެސް "ޤައުމުގެ މަޞްލަޙަތައްޓަކައި" އެކަންކަން ޓޮލަރޭޓް ކޮށްލައިގެން ތިބެން ޖެހޭނެކަމަށް ވިސްނައިދޭން މިއަދުގެ ހުކުރު ޚުޠުބާގައި މަސައްކަތް ކޮށްފައިވާކަން ވަރަށް ބޮޑަށް ފާހަގަވި ކަމަށްވެސް ޝައިޚް ވިދާޅުވިއެވެ.