އެއް ޖިންސުން ގުޅުން ހިންގި މައްސަލައިގައި ދައުވާ ކޮށްފައިވާ ފުލުހުންގެ ޑްރަގް އެންފޯސްމަންޓް ޑިޕާޓްމަންޓުގައި މަސައްކަތް ކުރަމުން އައި ޢަބްދުއްރަޙްމާން ރަފީޢު (ދޮންދިގު) ގެ މައްޗަށް ދައުލަތުން އުފުލާފައިވާ ދަޢުވާގެ އަޑުއެހުމެއް މިއަދު ބާއްވަން ތާވަލުކޮށްފިއެވެ.

ބަންގްލަދޭޝްގެ ޒުވާނެއްކަމަށްވާ އެމްޑީ އަލަމްގީރް (އަލަމްގިރި) އާއެކު އެއް ޖިންސުން ޖިންސީ ގުޅުން ހިންގި ކަމަށް ތުހުމަތުކުރެވޭ މައްސަލައިގައި އަބްދުއްރަޙްމާން ހައްޔަރު ކުރީ، ޖުލައި 28 ވަނަ ދުވަހު އެވެ. އެއަށްފަހު އޭނާ ބަންދުގައި ބެހެއްޓުމަށްފަހު، ބަންދުން ދޫކޮށްލީ އޭނާގެ މައްޗަށް ދައުވާ ކުރަން ކޯޓަށް ފޮނުވުމަށް ފަހުގައެވެ. 

އެ މައްސަލާގައި އޭނާގެ މައްޗަށް ކޮށްފައިވާ، އެއްޖިންސުން ޖިންސީ ގުޅުން ހިންގުމުގެ ދައުވާގެ އަޑުއެހުމެއް މިއަދު 13:00 ގައި ބޭއްވުމަށް ކްރިމިނަލް ކޯޓުން ވަނީ ތާވަލް ކޮށްފައެވެ. 

އެ ދަޢުވާއާ ގުޅިގެން މީގެ ކުރިން އަޑުއެހުމެއް ވަނީ ބާއްވާފައެވެ. އެ އަޑުއެހުމުގައި ދަޢުވާއަށް ޖަވާބުދާރީވާން ބޭނުންވަނީ ވަކީލަކާއެކު ކަމަށް ބުނުމުން ކޯޓުން ދިނީ 10 ދުވަހެވެ. އެހެންކަމުން މިއަދުގެ އަޑުއެހުމުގައި އޮންނާނީ ދަޢުވާއަށް ޖަވާބުދާރީވުމެވެ.

ބަންގްލަދޭޝަށް ނިސްބަތްވާ އެމްޑީ އަލަމްގީރް އާއެކު، މާލޭގައި ހުންނަ އެޕާޓްމެންޓެއްގެ ކޮޓަރިއެއްގައި އެއް ޖިންސުން ގުޅުން ހިންގާ މަންޒަރު ފެންނަ ކަމަށް ބުނާ ވީޑިއޯތަކެއް މިދިޔަ މަހުގެ ފަހުކޮޅު ވަނީ ލީކުކުރަން ފަށައިފަ އެވެ.

މި މައްސަލައިގައި ހައްޔަރު ހައްޔަރު ކުރި މީހުންގެ ތެރެއިން އަލަމްގިރް އާއި ގާނޫނީ ވަކީލު ނާޒިމް ސައްތާރުގެ މައްޗަށް މިހާރު ކޯޓުން ވަނީ ހުކުމްވެސް ކޮށްފައެވެ. އެގޮތުން އަލަމްގިރް އަށް 7 މަހުގެ ދުވަހުގެ ޖަލު ހުކުމް އައި އިރު، ނާޒިމް ސައްތާރު އަށް އައީ އެންމެ ތިން މަހާއި، 26 ދުވަހުގެ ގޭބަންދުގެ ހުކުމެކެވެ. އެކަމާއި ގުޅިގެން ގިނަ ބައެއްގެ ފާޑުކިޔުންތައް އެ ހުކުމް ކުރި ގާޒީއަށާއި ސަރުކާރަށް ވަނީ އަމާޒުވެފައެވެ. 

އެއް ޖިންސުން ގުޅުންހިންގި ކަމުގެ ތުހުމަތުވާ އެންމެންގެ މައްޗަށްވެސް ޕީޖީ އޮފީހުން ގާނޫނުލްއުގުބާތުގެ ދަށުން ދައުވާ ކުރިއިރު، ޖިންސީ ކުށުގެ ގާނޫނުގައި ވެސް އެއްޖިންސުން ގުޅުން ހިންގުން ކުށެއްގެ ގޮތުގައި އޮވެ އެވެ. އެ ގާނޫނުގެ ދަށުން، ދެ މީހަކު ރުހުމުގައި އެއްޖިންސުން ޖިންސީ ގުޅުން ހިންގައިފި ނަމަ އަދަބަކީ 5-7 އަހަރަށް ޖަލަށް ލުމެވެ.