ކިންގ ޢަބްދުލް ޢަޒީޒް އިންޓަރނޭޝަނަލް ކޮމްޕެޓިޝަން އޮފް ދަ ހޮލީ ޤްރުއާންގެ ފައިނަލަށް އަލްޙާފިޒް އަޙްމަދު ނަބީޙް ޢަބްދުލް ޤާދިރު ދަތުރުކޮށްފިއެވެ.

ކީރިތި ޤުރުއާނާބެހޭ ޤައުމީ މަރުކަޒުން އެކަން ފާހަގަކޮށް ކޮށްފައިވާ ޓުވީޓެއްގައި ބުނީ، 42 ވަނަ ކިންގް ޢަބްދުލް ޢަޒީޒް އިންޓަރނޭޝަނަލް މުބާތުގައި ރާއްޖޭގެ ފަރާތުން ބައިވެރިވި ދެ ބައިވެރިން ފުރަތަމަ ބުރުގައި ކިޔަވައި ނިމިފައިވާ ކަމަށެވެ.

އަދި އެ މުބާރާތުގެ ދެވަނަ ބުރާއި ފައިނަލް ބުރަށް އަލްޙާފިޒް އަޙްމަދު ނަބީހު ޢަބްދުލްޤާދިރު ހޮވިފައިވާކަމަށްވެސް އެ މަރުކަޒުން ވަނީ ހާމަކޮށްފައެވެ.

Advertisement

"111 ޤައުމަކުން 153 ބައިވެރިން ބައިވެރިވި މި މުބާރާތުގެ ފައިނަލް ބުރަށް ނަބީހު ހޮވުމަކީ ވަރަށް ބޮޑު ކާމިޔާބީއެކެވެ." ކީރިތި ޤުރުއާނާ ބެހޭ މަރުކަޒުގެ ޓުވީޓުގައި ވެއެވެ. 

މި މުބާރާތުގައި ރާއްޖެ ތަމްސީލުކުރަނީ އަޙްމަދު ނަބީޙް ޢަބްދުލް ޤާދިރުއާއި މުޙައްމަދު ޔޫޝަޢު ބިން ޒަމްޒަމްއެވެ. މި ބައިވެރިންނާއިއެކު ބައިވެރިންގެ ބެލެނިވެރިންވެސް ސަޢުދީޢަރަބިއްޔާއަށް ވަނީ ދަތުރުކޮށްފައެވެ.

ސަޢުދީ ޢަރަބިއްޔާގެ މައްކާގައި ސެޕްޓެންބަރު މަހުގެ ދިހައަކުން އެކާވީހަށް ކުރިއަށްދާ "42 ވަނަ، ކިންގ ޢަބްދުލް ޢަޒީޒު އިންޓަރނޭޝަނަލް ކޮމްޕެޓިޝަން އޮފް ދަ ހޮލީ ޤްރުއާން" މުބާރާތަށް ބައިވެރިން ހޮވާފައިވަނީ ޤުރުއާނާބެހޭ ޤައުމީ މަރުކަޒުން ކުރިއަށްގެންދިޔަ އޮޑިޝަނަކުންނެވެ.

މި އޮޑިޝަން ކުރިއަށް ގެންގޮސްފައިވަނީ ބެލެނިވެރިންގެ ހާޒިރުގައި ފަނޑިޔާރުންގެ ޕެނަލަކުންނެވެ. މުބާރާތް ނިންމައި ބައިވެރިން ރާއްޖެ އައުމަށް ހަމަޖެހިފައިވަނީ 23 ސެޕްޓެންބަރު 2022 ގައެވެ.