ދިރުވާލައިގެން ރާއްޖެއަށް ރަން އެތެރެކުރި އިންޑިއާ މީހެއްގެ މައްޗަށް ސިއްރުން މުދާ އެތެރެކުރުމުގެ ދައުވާ ސާބިތުވެ 60،000 ރުފިޔާއިން ޖޫރިމަނާކޮށްފިއެވެ.
ސިއްރުން މުދާ އެތެރެކުރުމުގެ ކުށުގެ ދައުވާ ސާބިތުވެ ހުކުމްކޮށްފައިވަނީ އިންޑިއާ ރައްޔިތެއް ކަމަށްވާ އަކްޝޭކްމާރު ސްރޭޝްބާއީ ބަޓް އެވެ. އަކްޝޭ ރަންތަކެއް ދިރިއުވާލައިގެން ރާއްޖެ އެތެރެވީ މިދިޔަ ޖުލައި 19 ވަނަ ދުވަހުއެވެ.
ކްރިމިނަލް ކޯޓުން އެމީހާގެ މައްޗަށް ކުރި ދައުވާގެ މައްސަލަ ނިންމި ގޮތުގެ ރިޕޯޓުން ފާހަގަވެފައިވާ ގޮތުގައި އޭނާގެ ހަށިގަނޑުގައި އެއްޗެއް ފޮރުވާފައިވާކަން ޝައްކުކުރެވުނީ އެއާޕޯޓުން ޗެކުކުރި ވަގުތު އެވެ.
އަދި އެކަމާ ގުޅޭ ގޮތުން ކަސްޓަމްސްގެ މުވައްޒަފުން އޭނާއާ އެ ވަގުތު ސުވާލުކުރުމުން އެއީ ރަން ކަމަށް ބުނެ ބޮޑުކަމު ގޮސް އެތަކެތި ނެރުނީވެސް އަމިއްލަ އިހްތިޔާރުގައި ކަން އެނގޭ ކަމަށްވެސް ބުނެފައިވެއެވެ. އަދި މައްސަލަ ކޯޓަށް ހުށައެޅުމުން އިބްތިދާއީ މަރުހަލާގައި އޭނާ ވަނީ ކުށަށް އިއުތިރާފުވެފައެވެ.
އޭނާ އެ ކުށަށް އިއުތިފާރްވެފައިވާތީ ކްރިމިނަލް ކޯޓުން ވަނީ 60,000 ރުފިޔާއިން އޭނާ ޖޫރިމަނާކޮށް, އިއްޔެއިން ފެށިގެން ފަސް މަސްދުވަހުގެތެރޭގައި އެ ފައިސާ ދައުލަތަށް ދެއްކުމަށް ހުކުމްކޮށްފައެވެ. އަދި އެ މީހާގެ ހަށިގަނޑުން ފެނުނު ރަން ދައުލަތަށް ނެގުމަށް ވެސް ޙުކުމުގައި ބަޔާންކޮށްފައިވެއެވެ.
Advertisement
This content is created and paid for by advertisers and does not involve Voice Journalists
