ކީރިތި ޤުރުއާން ހިތުދަސްކުރާން މަސައްކަތް ކުރާ ގިނަ ފަރާތްތަކެއް އަހަރެމެން ދިވެހިންގެ ތެރޭގައިވެސް ތިބިއިރު، އެކަމަށް ގިނަ މީހުންނަށް ކުރިމަތިވެފައިވާ އެންމެ ބޮޑު އެއް ގޮންޖެހުމަކީ އެކުގައި އެކަމުގައި މަސައްކަތް ކުރާނެ މީހަކު ނެތުމެވެ. ނުވަތަ، ތިމާ ކިޔަވާއިރު, އެ ކިޔެވެނީ ރަނގަޅަށްތޯ ނުވަތަ ނޫންތޯ ބަލާނެ މީހަކު ނެތުމެވެ. އޭގެ ސަބަބުން، ނުބައި ކޮށް ޤުރުއާން ކިޔެވޭ އިރުވެސް މި ކިޔެނީ ނުބައި ކޮށް ކަން ނޭނގި، އެކަމާއި ގުޅިގެން އުފެދޭ ކަންބޮޑުވުމާއި ހުރެ ގުރުއާން ހިތުދަސްކުރާން ފަށާ އެތައް ބައެއް އެކަން ހުއްޓާލާތަންވެސް ފެނެއެވެ. މި ހުރިހާ މައްސަލައަކާއި، މިނޫންވެސް ގުރުއާން ހިތުދަސްކުރާ ފަރާތްތަކަށް ކުރިމަތިވާ ގިނަ މައްސަލަ ތަކެއްގެ ހައްލު "ތަރްތީލް" އެޕްލިކޭޝަންއިން މިވަނީ ހޯދައިދީފައެވެ. 

"ތަރްތީލް" އެޕް އަކީ ގުރުއާން ހިތުދަސްކުރާ ފަރާތްތަކަށް ޚާއްސަކޮށްގެން ތައްޔާރުކޮށްފައިވާ އެޕްލިކޭޝަނެކެވެ. މި ގުރުއާން އެޕްލިކޭޝަން ފޯނަށް އެޅުމަށްފަހު ތިމާއަށް ކިޔެވެނީ ރަނގަޅަށްތޯ ނުވަތަ ނޫންތޯ ބަލާނެ މީހަކު ނެތީގެން ކަންބޮޑުވާކަށް ނުޖެހޭނެއެވެ. އެހެނީ މި އެޕްގައި އިންނަ ޚާއްސަ އެއް ފީޗާއަކީ ދަސްވިތޯ ޗެކްކުރަން ބޭނުންވާ އާޔަތް އެޕްލިކޭޝަން ގައި އިންނަ ގުރުއާން އިން ގެއްލުވާލުމެވެ. އެގޮތުން އާޔަތް ގެއްލުވާލާފައި، ދެން ތިމާ އެ އާޔަތް ކިޔަން ފެށުމުން އެ ކިޔެނީ ރަނގަޅަށް ކަމުގައިވާނަމަ، ފޯނުން ތިމާ ކިޔާ ވަރަށް، ކިޔާ މިންވަރެއް ފެންނަމުންދެއެވެ. އަދި އެއްވެސް ހިސާބަކުން ނުބައިކޮށް ކިއިއްޖެނަމަ، އެހިސާބުން ގުރުއާނުގެ އާޔަތް ފެނުން ހުއްޓެއެވެ. އަދި ރަނގަޅަށް ކިޔުމުން އަލުން އެ ކިޔާ ވަރަކަށް އާޔަތް ފޯނު އިސްކިރީނަށް އަރަމުންދެއެވެ. 

އަދި މީގެ އިތުރުން، ތިމާގެ ކިޔެވުމުގެ ޝައުގާއި ޖޯޝު އިތުރު ކޮށްދީ، އަބަދުވެސް 'މޯޓިވޭޓް' ކޮށްދިނުމަށް، ދަސްވާ މިންވަރަކަށް، ބެޖާއި، އަދި ކިޔެވުމަށް ހަނދާންކޮށްދިނުމަށް ނޯޓިފިކޭޝަންވެސް އެ އެޕްލިކޭޝަން އިން ފޮނުވަދެއެވެ. އަދި ތިމާއަށް ކިޔެވޭ މިންވަރާއި އަޑުއެހޭ މިންވަރު އޮޓޮމެޓިކުން ޓްރެކް ވެގެންދާއިރު، ތިމާއަށް ދުވާލެއްގެ މައްޗަށް ހާސިލްވެފައިވާ މިންވަރުވެސް މި އެޕްލިކޭޝަން މެދުވެރިކޮށް ބަލާލެވޭނެއެވެ.

އަދި ހަމައެހެންމެ، ވަކި އާޔަތެއް ގުރުއާނުން ހޯދަން ބޭނުންވެއްޖެނަމަ އެ އާޔަތް ކިޔަވާލުމުން ގުރުއާނުގައި އެ އާޔަތް އިންނަ ތަން ތަރްތީލް އެޕް އިން ދައްކައިދޭނެއެވެ.

މި އެޕްލިކޭޝަން ގެ ޕްރިމިއަމް ވާޝަން އިން ތިމާ ކިޔަވާއިރު، އިތުރު ކޮށްގެން ނުވަތަ އުނިކޮށްގެން ކިޔޭ ލަފްޒުތަކާއި އަދި ނުބައިކޮށް ކިޔެވޭ ލަފްޒުތައް ތިމާއަށް ފާހަގަކޮށްދިނުން ފަދަ ޚާއްސަ އެތައް ކަމެއް ހިމެނެއެވެ. 

ތަރްތީލް އެޕް ގެ އައިއޯއެސް ލިންކް

https://apps.apple.com/app/tarteel/id1391009396

ތަރްތީލް އެޕް ގެ އެންޑްރޮއިޑް ލިންކް

https://play.google.com/store/apps/details?id=com.mmmoussa.iqra