އެއްޖިންސުން ގުޅުން ހިންގުމުގެ ކުށް ސާބިތުވާ މީހުންގެ އަދަބު ކުޑަ ކަމާއި މެދު ޢާއްމުންގެ ޝަކުވާ އިންތިހާއަށް ބޮޑުވެފައި ވަނިކޮށް، ކުށް ކުރާ މީހުންގެ އަދަބު ކުޑަ ކުރުމަކީ އައު ކަމެއް ނޫން ކަމަށް ބުނެ އެކަން ދިފާއުކޮށް ޕްރޮސެކިއުޓާ ޖެނެރަލް ހުސައިން ޝަމީމް ލިޔުމެއް އާއްމު ކުރައްވައިފިއެވެ. 

"އަދަބު އިސްތިއުނާފް ކުރުން- އަބަދުވެސް ހިނގާ ކަމެއް" ނަމުގައި ޕީޖީ ޝަމީމް އިއްޔެ އޭނާގެ ބްލޮގުގައި ލިޔުއްވާފައިވް ލިޔުމުގައި ވާގޮތުން ކުށް ސާބިތުވާ ކަމަށް ނިންމާފައިވާ މައްސަލަތަކާއި އަދަބު ދިން ގޮތާ މެދު ހިތްހަމަނުޖެހިގެން މައްސަލައެއް އިސްތިއުނާފު ކުރުމަކީ އަސްލު މަސައްކަތުގައި އުޅުއްވާ ވަކީލުންނާއި ޕްރޮސިކިއުޓަރުން އަލަށް ކުރާ ކަމެއް ނޫން ކަމަށާ، އެއީ އަބަދުވެސް ހިނގާ ކަމެއް ކަމަށެވެ.

"އަދަބާބެހޭ ގޮތުން އޮތް ހަމަތައް ތަންފީޒުކުރާކަން ކަށަވަރު ކުރުމަށްޓަކައި، އަދަބު ދިނުމުގައި ފަނޑިޔާރު ޤާނޫނު މާނަކުރެއްވި ގޮތް ވަކިން (ކުށް ސާބިތުވާކަމަށް ނިންމެވި ނިންމެވުމާ ވަކިން) އިސްތިއުނާފު ކުރެވޭނެކަމަށްވެސް ޤާނޫނުގައި ކަނޑައެޅިއެވެ. 1003 ވަނަ މާއްދާގެ (ރ) ގައި އޮތީ، ކުށުގެ ދަރަޖަ ކަނޑައެޅުމުގައި ކޯޓުން އޮޅުން އަރައިފައިވާނަމަ ނުވަތަ ކަނޑައެޅޭނެ އަދަބުގެ މިންވަރު ނިންމުމުގައި ޤާނޫނީގޮތުން ނުބައި ކޮށް ނިންމައިފައިވާނަމަ، ޙުކުމުގެ އެބައި އެކަނި އިސްތިއުނާފު ކުރެވިދާނެކަމަށެވެ." ޝަމީމްގެ ލިޔުމުގައިވެއެވެ. 

ޝަމީމްގެ އެ ލިޔުމުގައި ވާގޮތުން ގާނޫނުލްއުގޫބާތުގައި އޮންނަ ގޮތުން، ދައުވާ ކުރުމުގެ ކުރިން ކުށަށް އިއުތިރާފުވެ އާންމުންގެ ކިބައިން މާފަށް އެދޭ ނަމަ އަދަބަށް ދެ ދަރަޖައިގެ ލުޔެއް ލިބޭނެ އެވެ. އެކަމަކު، ދައުވާ ކުރި ފަހުން ނަމަ ލިބޭނީ އެއް ދަރަޖައިގެ ލުޔެކެވެ.

"ގާނޫނުލްއުގޫބާތުގެ 1106 ވަނަ މާއްދާގައި އޮތީ، ކުށްވެރިޔާ ކުށާ މެދު ދެރަވާކަން އާންމުންގެ ތެރޭގައި ފާޅުކުރުމުން، އަދަބުގެ ދަރަޖަ ދަށްވާނެ ވާހަކަ އެވެ. ދައުވާކުރުމުގެ ކުރިންނަމަ، 2 ދަރަޖަ، ދައުވާ ކުރި ފަހުންނަމަ، 1 ދަރަޖައެވެ. ކުށް ސާބިތުވާކަމަށް ކަނޑައެޅި ނަމަވެސް، އަދަބު ދިނުމުގައި އިސްވެދެންނެވި އުސޫލާ ޚިލާފު ނަމަ، އެ ނުކުތާ ވަކިން އިސްތިއުނާފު ކުރަންޖެހެ އެވެ." ޝަމީމްގެ ބްލޮގްގައިވެ އެވެ.

މީގެ އިތުރުން، ޝަރީޢަތުން އަދަބު ކަނޑައެޅުމުގައި ޢަމަލުކުރާނެ ގޮތުގެ އުޞޫލުގެ ނަމުގައި ސުޕްރީމް ކޯޓުން ނެރުނު އުޞޫލުގެ 6 ވަނަ މާއްދާގެ (ހ) ގައި، ޖިނާއީ ދަޢުވާއެއް ސާބިތުވާކަމަށް ކަނޑައަޅައި، އެ ކުށަށް އަދަބު ކަނޑައެޅުމުގައި ކަނޑައެޅޭ އަދަބުގެ މިންވަރަށް ވުރެ 2 ގުނަ ނުވަތަ އެއަށްވުރެ މަތީ މިންވަރެއްގެ އަދަބެއް ކަނޑައެޅުމުގެ އިޚްތިޔާރު ފަނޑިޔާރަށް ލިބިގެންވާކަމަށް އޮންނަ ކަމަށާ، އެހެންނަމަވެސް، އެއްވެސް ކުށަކަށް ކަނޑައެޅޭ އަދަބު 2 ގުނަ މަތިކުރުމަކީ ޤާނޫނުލްޢުޤޫބާތު ދަންނަ ކަމެއް ނޫން ކަމަށްވެސް އެ ލިޔުމުގައި ވެއެވެ. 

ޝަމީމް މިފަދަ ލިޔުމެއް ލިޔުއްވާފައި މިވަނީ, ބަންގްލަދޭޝްގެ ރައްޔިތެއް ކަމަށްވާ އަލަމްގީރުއާއެކު އެއްޖިންސުން ޖިންސީ ގުޅުން ހިންގިކަން ސާބިތުވި, ފުލުހުންގެ ޑްރަގް އެންފޯސްމަންޓް ޑިޕާޓްމަންޓްގައި މަސައްކަތް ކުރި އަބްދުއްރަހުމާނު ރާފިއުއަށް ކުރި ހުކުމް ބޮޑުވުމުން, ޕްރޮސިކިއުޓާ ޖެނަރަލް (ޕީޖީ) އޮފީހުން އިސްތިއުނާފް ކުރުމަށް ނިންމި ނިންމުމާއި ގުޅިގެން ގިނަ ބައެއްގެ ފާޑުކިޔުންތައް އޭނާއަށް އަމާޒުވެފައިވާ ދަނޑިވަޅެއްގައެވެ.