އަމީނީ މަގުނަ ހަދަން ގަސްތައް ނެގުމާއި ކެނޑުމާއި ކޮށުން ހުއްޓާލައި އެކަމުގައި ދެވަނަ ވިސްނުމަކަށް ސަރުކާރުން ނުދާނަމަ އަމިއްލަފުޅަށް ޝަރީއަތަށް ވަޑައި ވަޑައިގަންނަވާނެ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މިއަދު އިންޒާރު ދެއްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވަމުން ވިދާޅުވީ އަމީނީ މަގު ހެދުމުގެ ނަމުގައި އެ މަގުގެ ގަސްތައް ނަގާ ވާހަކައިގެ ކަންބޮޑުވުން މީގެ ކުރީންވެސް އެ މަނިކުފާނު މެންބަރުންނާއި އާންމުން ރައްޔިތުންގެ ސަމާލު ކަމަށް މަޖިލީޖުގެ ރިޔާސަތުގައި އިންނަވައިގެން ގެނެސް ދެއްވާފައިވާނެ ކަމަށެވެ. އަދި އަމީނީ މަގުގައި ހުރި ގަސްތައް ކަނޑަމުންދާތީ އެކަމުގެ ކަންބޮޑުވުން އާންމުންވެސް ދަނީ ކުރަމުންނެވެ.
ނަޝީދު ވިދާޅުވީ، އެމަނިކުފާނު އުންމީދު ކުރައްވަނީ އާރްޑީސީ އާއި ޕްލޭނިން މިނިސްޓްރީން އެކަމުގައި ދެވަނަ ވިސްނެވުމަކަށް ދާނެ ކަމަށާއި އެހެން ނުވެއްޖެ ނަމަ އެ މައްސަލާގައި ފަރުދެއްގެ ހައިސިއްޔަތުގައި އެ މަނިކުފާނު ދައުލަތާ ދެކޮޅަށް ޝަރީއަތަކަށް ވަޑައިގެން ދައުވާ ކުރައްވާނެ ކަމަށެވެ.
"އަޅުގަނޑު މީގެ ކުރީ ދުވަހެއްގައި އަމީނީ މަގުގައި ގަސްތައް ނަގަމުންދާ ވާހަކަ ދެންނެވިން. އަޅުގަނޑު ހިތުން އެކަންބޮޑުވުމަކީ މާލޭގައި ދިރިއުޅޭ ވަރަށް ގިނަ ރައްޔިތުންގެ ކަންބޮޑުވުމެއް. އަޅުގަނޑު އުންމީދު ކުރަން އެކުންފުނިންނާއި ސަރުކާރުގެ ޕްލޭނިން މިނިސްޓްރީން މިކަމާއި އިތުރު ވިސްނުމަކަށް ވަޑައިގަންނަވާނެކަމަށް. އެހެން ނޫންނަމަ އަމިއްލަ ފަރުދެއްގެ ހައިސިއްޔަތުން ޝަރީއަތަށް ދިއުން ނޫންގޮތެއް މިކަމުގައި ހަގީގަތުގައި ނެތް."
ރައީސް ނަޝީދު
ސަރުކާރުގެ ބަޖެޓުން 84 މިލިއަން ރުފިޔާ ހަރަދުކޮށްގެން އާރުޑީސީ އާއި އަމީނީ މަގުގެ މަސައްކަތް ހެދުމުގެ މަޝްރޫއު ހަވާލުކޮށްފައިވަނީ 210 ދުވަހުގެ ތެރޭގައި ނިންމާ ގޮތަށެވެ. މި މަޝްރޫއުގެ ދަށުން އަމީނީ މަގުގައި ތާރު އަޅާ ތަރައްގީ ކުރުމަށް ވަނީ ނިންމާފައެވެ.
Advertisement
This content is created and paid for by advertisers and does not involve Voice Journalists
