މަސްވެރިންނަށް މިހާރު އޮތް ހައްލަކީ މިވެރިކަން ބަދަލުކުރުން ކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހުމަދު ޠާރިގު (ޓޮމް) ވިދާޅުވެއްޖެއެވެ.
މަސްވެރިކަން ތިޔާގިވެފައިވާ މޫސުމުގައި މަސްވެރިންނަށް ކުރިމަތިވަމުންދާ މައްސަލަތައް ހައްލުކޮށްދިނުމަށް ސަރުކާރަށް ގޮވާލައި ނައިފަރު ދާއިރާގެ މެމްބަރު އަހުމަދު ޝިޔާމް ރައްޔިތުންގެ މަޖިލީހަށް ހުށަހެޅުއްވި ކުއްލި މައްސަލަ އަށް ބަހުސްކުރައްވަމުން ޓޮމް ވިދާޅުވީ މަސްވެރިކަމުގެ ސިނާއަތުގައި މައިގަނޑު މައްސަލައަކަށް ދިމާވާ ކަމަކީ ވެރިކަމަށް އަންނަން މަސްވެރިންގެ ބޮލަށް އެރި، ވާވައްދާ މަސްވެރިންނަށް ހުވަފެން ދެއްކުމަށްޓަކައި ސިޔާސީ ފަރާތްތަކުންވާ ވައުދުތައްކަމަށެވެ.
"މައިގަނޑު މައްސަލައަކަށް ވަނީ ވެރިކަމަށް އަންނަން މަސްވެރިންގެ ބޮލަށް އެރި ވާވައްދާ މަސްވެރިންނަށް ހުވަފެން ދެއްކުމަށްޓަކައި ވާ ވައުދުތައް. އޭގެތެރޭގައި ގޭދޮށު މަސްފެކްޓަރީއާއި. މަސްވެރި ޖަގަހަތަކާއި އަދި ހަނދުމަކޮށްލަން އެބަ ޖެހޭ ރާއްޖޭގެ ދޯނިތަައް ސްރީލަންކާގެ ބަނދަރުގައި މަސްކިރާފައި އެތަނުން ޑޮލަރު ގެންނަ ވާހަކަވެސް އެބަ އޮތޭ. ކީއްވެގެންތޯ އެވާހަކަވެސް ނުދައްކާ މިތިބެނީ. ލަންކާގެ ބަނދަރަށް ދިވެހި މަސްވެެރިން ހއ ގެ މަސްވެރިން މަސްކިރާފައި ޑޮލަރު ހިފައިގެން އަންނަ ވާހަކަވެސް މެނިފެސްޓޯގައި އެބައޮތް."
މަހިބަދޫ ދާއިރާގެ މެންބަރު އަހުމަދު ޠާރިގު
ޓޮމް ވިދާޅުވީ މަސްވެރިން ވާވަށްދަން ސިޔާސީ ފަރާތްތަކުން ވާ މިފަދަ ވައުދުތަކުގެ ސަބަބުން މަސްވެރިން ނިސްބަތްވާ ސަރަހައްދުތަކުން މިސަރުކާރަށް ނޫނެކޭ ބުނެފައިވާކަމަށެވެ. މިގޮތުން އެންމެފަހުން ބޭއްވި ލޯކަލް ކައުންސިލް އިންތިހާބުގައި ހއ އިހަވަންދޫގެ މެޖޯރިޓީ ވަނީ އެމްޑީޕީއަށް ގެއްލިފައިކަމަށާއި ގދ އަތޮޅު އަތޮޅު ކަައުންސިލްގެ ރައީސްކަން ވަނީ ޕީޕީއެމް ހޯދާފައިކަމަށް އޭނާ ވިދާޅުވިއެވެ. މީގެ އިތުރުން އދ މަހިބަދޫގެ ލޯކަލް ކައުންސިލް އިންތިހާބުގެ ފުލް މެޖޯރިޓީ އޮންނާނީ ޕީޕީއެމް އަތުގައި ކަން ޓޮމް ފާހަގަކުރެއްވިއެވެ.
އަދި މަސްވެރިކަމަށް ނިސްބަތްވާ ހުރިހާ ހިސާބެއްގެ ރައްޔިތުންވަނީ މިސަރުކާރަށް ނޫނެކޭ ބުނެފައިވަނީ މެނިފެސްޓޯއެއް ދައްކާފައި ރައްޔިތުންނަށް ވައުދުތަކެއް ވެފަ އެކަން ތަންފީޒު ނުކުރެވުމުގެ ސަބަބުންކަމަށްވެސް ޓޮމް ވިދާޅުވިއެވެ.
"މަސްވެރިންނަށް މިހާރު އޮތް ހައްލަކީ މިވެރިކަން ބަދަލު ކުރުން. މި ވެރިކަމަކީ، މިހާރުގައި ހުރި ރައީސުލްޖުމްހޫރިއްޔާ އަކީ, އެއަންނަ ޕްރެޝަރެއް އެ އޮތް ގޮތަކަށް ދޫކޮށްލާ ޒާތުގެ ބޭފުޅެއް. އެހެންވީމާ މަސްވެރިންނަށް އޮތް ހައްލަކީ ކުރިއަށް އޮތް ޑިސެމްބަރު މަހުގެ 10 ވަނަ ދުވަހު، މަސްވެރިންގެ ދުވަހު މާލެ ސަރަހައްދުގައި ރަނގަޅު މުޒާހަރާއެއް ޖެއްސުން. ޖައްސާ ސަރުކާރަށް ރަނގަޅަށް އަޑު އިއްވުން. އެނޫން ގޮތެއް މި ސަރުކާރުގައި ނެތް."
މަހިބަދޫ ދާއިރާގެ މެންބަރު އަހުމަދު ޠާރިގު
ޓޮމް އިތުރަށް ވިދާޅުވީ މި ސަރުކާރު އޮތީ ކައިރި އަވަށްޓެރި ގައުމެއްްގެ ބަނޑު ދަށުގައި ކަމަށާ، އަމިއްލަ ހާލައިގެން ތެދުވެ އުޅެވޭ ވަރެއް ސަރުކާރުގެ ނެތް ކަމަށެވެ. އަދި ރާއްޖޭގެ އިގްތިސާދު ދަނީ ދާނެ ދިމާލަކަށް ކަމަށާ، ރާއްޖޭގެ އެންމެ ބޮޑު ދެ ސިނާއަތް ކަމަށްވާ ފަތުރުވެރިކަމުގެ ސިނާއަތާއި މަސްވެރިކަމުގެ ސިނާއަތް ވެސް ހަމަހަމަ ކުރާނެ ގޮތެއް ސަރުކާރަށް ނޭނގޭ ކަމަށް ވިދާޅުވެ ޓޮމް ވަނީ އަދުގެ ސަރުކާރަށް ވަރަށް ބޮޑަށް ފާޑުވިދާޅުވެފައެވެ.
Advertisement
This content is created and paid for by advertisers and does not involve Voice Journalists
