ދިރުވާލައިގެން ބަނޑުގައި ބެހެއްޓުމަށްފަހު ފޮރުވައިގެން ދިވެހިރާއްޖެއަށް ރަން އެެތެރެ ކުރި އިންޑިއާ މީހަކު 60،000 ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ހުކުމްކޮށްފިއެވެ.

ދިރުވާލައިގެން ރަން އެތެރެކުރި މައްސަލާގައި ދައުވާ ކޮށްފައިވަނީ ނާޒިމް ކިޔާ އިންޑިއާ މީހެއްގެ މައްޗަށެވެ. އޭނާގެ މައްޗަށް ކޮށްފައިވަނީ ދިވެހިރާއްޖެއަށް ސިއްރުން މުދާ އެތެރެކުރުމުގެ ކުށުގެ ދައުވާއެވެ. އަދި މައްސަލާގެ އިބްތިދާއީ އަޑުއެހުމުގައި ނާޒިމް ދައުވާއަށް އެއްބަސްވެފައި ވާތީ އަވަސް ނިޔާއިން ބަލާ ވަނީ ނިންމާފައެވެ.

އަދި އިއުތިރާފްގެ އެއްބަސްވުމުގައިވާ ގޮތަށް އަދަބު ކަނޑައަޅައިދިނުމަށް އެދި ނާޒިމް ވަނީ ރަން ހިމެނޭ މިކްސްޗާ ދައުލަތަށް ނެގުމަށް އިއުތިރާޒް ނުކުރާ ކަމަށްވެސް ބުނެފައެވެ.

ވުމާއެކު ހޯމަ ދުވަހު ކްރިމިނަލް ކޯޓުން ކުރި ހުކުމުގައި ބުނެފައި ވަނީ މި އަހަރު ޖުލައި މަހުގެ 17 ވަނަ ދުވަހު 8 ޖަހާހާއިރު ނާޒިމް ރާއްޖޭ އައިއިރު ހަށިގަނޑުގައި އެއްޗެހިތަކެއް ފޮރުވައިފާ ހުރި ކަމަށް ޝައްކުކުފައިވާ ކަމަށާއި އެ ތަކެތި އަމިއްލައަށް ނަގަން އެއްބަސްވި ކަމަށެވެ. އަދި ބޮޑުކަމުދިޔަ އިރު ދެ ބުލެޓުގައި ރަނާއި އެނޫން މާއްދާތައް ހިމެނޭ މިކްސްޗާ ހުރި ކަމަށް ފިޒިކަލް އެގްރެމިނޭޝަން ޓެސްޓުން ދައްކާފައިވާ ކަމަށްވެސް އެ ހުކުމުގައި ބުނެއެވެ.

ނާޒިމްގެ މައްޗަށް ކުރި ހުކުމުގައި ބުނެފައިވަނީ 60،000 ރުފިޔާ އިން ޖޫރިމަނާކުރާ ކަމަށާއި އެ ފައިސާ މި މަހުގެ 26 ވަނަ ދުވަހުން ފެށިގެން 3 މަސް ދުވަސް ތެރޭގައި މީރާއަށް ދައްކަން ޖެހޭ ކަމަށެވެ. އަދި ރަން ހިމެނޭ އެ ދެ ބުލެޓު ކަސްޓަމްސްއަށް ނެގުމަށްވެސް އެ ހުކުމުގައި ވަނީ ބުނެފައެވެ.

މިއީ މި މަހުގެ ތެރޭގައި އިންޑިޔާ މީހަކު ވަގަށް ރާއްޖެއަށް އެއްޗެހި އެތެރެކޮށްގެން ހުކުމްކުރި ދެވަނަ މައްސަލައެވެ. މީގެ ކުރިން ހުކުމްކޮށްފައިވަނީ ރާއްޖެއަށް ވަގަށް ރަން އެތެރެ ކުރި މީހެއްގެ މައްޗަށެވެ. އެ މީހާވެސް އެތެރެކުރި 2 ބުލެޓުގެ ރަން ދައުލަތަށް ނަގައި އޭނާ 600,000 ރުފިޔާއިން ޖޫރިމަނާ ކުރިއެވެ.