ދިވެހިރާއްޖެ އާއި ސްރީލަންކާ އަށް ކުރިމަތިވި ދަތި ހާލަތްތަކުގައި އެ ދެގައުމަށްވެސް އެހީވި ހަމައެކަނި ގައުމަކީ އިންޑިއާ ކަމަށް އެގައުމުގެ ކަނާތު ފިޔައިގެ ހަރުކަށި ހިންދޫ ޖަމާއަތެއް ކަމަށްވާ ރަކްޝަތުރިޔާ ސްވަޔަމްސެވަކް ސަންގް (އާރްއެސްއެސް)ގެ ޗީފް މޯހަން ބަގްވަތް ބުނެފިއެވެ.
"ބާރަތް ވިކާސް މަންޗް" އިން ގެނެސްދިން ޕްރޮގްރާމްއެއްގައި ވާހަކަ ދައްކަމުން މޯހަން ބުނީ އިންޑިއާ އަކީ ރޫހާނިއްޔަތައް އިސްކަންދޭ ގައުމެއް ކަމަށެވެ. އަދި އެހެނިހެން ގައުމުތަކުގެ މީހުންގެ ކިބައިގައިވެސް އެކަން އަށަގެންނެވުމަށް ޓަކައި އިންޑިއާއިން އެ މިސާލު ދައްކުވައިދޭންޖެހޭ ކަމަށް އޭނާ ބުންޏެވެ. އަދި އިންޑިއާގެ ރޫހަކީ އެއްވެސް ބޮޑާ ކަމެއް ނެތި ދިރިއުޅުން ކަމަށް ވެސް އޭނާ ބުނެފައިވެއެވެ.
މިއާއެކު އޭނާ ވަނީ، ސްރީލަންކާ އަށް އެހީތެރިކަމުގެ އަތެއް ދިއްކޮށްލަދިން ހަމައެކަނި ގައުމަކީ އިންޑިއާ ކަން ފާހަގަކުރަމުން އިންޑިއާ އިން ދިވެހިރާއްޖެއަށް ވެސް ވެދިން އެހީގެ ވާހަކަ އޭނާވަނީ ދައްކާފައެވެ.
"ދިވެހިރާއްޖެއަށް ފެނުގެ ދަތިކަން ލިބުނު ދުވަހު ކޮންބައެއް އެމީހުންނަށް ފެން ހަދިޔާ ކުރީ؟ އިންޑިއާ އިން އެކަން ކުރީ. އެއީ ރޫހާނި އިންޑިއާ" މޯހަން ބުނެފައިވެއެވެ.
މޯހަން ބުނެފައި އެވަނީ، 2014 ވަނަ އަހަރުގެ ޑިސެމްބަރު މަހުގެ ތެރޭގައި އެމްޑަބްލިއުއެސްސީގެ އިންޖީނުގޭގައި އަލިފާނުގެ ހާދިސާއެއް ހިނގައިގެން މުޅި މާލެއިން ފެން ކަނޑާލުމުމުން އެތައް ބަޔަކު ފެނަށް ޖެހިފައު ވަނިކޮށް އިންޑިއާ އިން ފެން ފޯރުކޮށްދިން ވާހަކައެވެ. އެ ކާރިސާގައި ރާއްޖެއަށް އެހީވީ ހަމައެކަނި އިންޑިއާއިން ކަމަށް ދޭހަވާ ފަދަ މޭރުމަކުން މޯހަން ވާހަކަދެއްކި ނަމަވެސް ބަންގްލަދޭޝްއިން ވެސް މާލެއަށް ވަނީ ފެން ހަދިޔާ ކޮށްފައެވެ.
Advertisement
This content is created and paid for by advertisers and does not involve Voice Journalists
