އުރީދޫ އެމް-ފައިސާ މެދުވެރިކޮށް ޕާކިސްތާނަށް ފައިސާގެ އެހީތެރިކަން ފޯރުކޮށްދިނުމުގެ ފުރުސަތު އުރީދޫއިން ހުޅުވާލައިފިއެވެ.
އުރީދޫއިން ބުނީ ހާލުގައި ޖެހިފައިވާ ޕާކިސްތާނުގެ ރައްޔިތުންނަށް އެހީތެރިކަން ފޯރުކޮށްދިނުމަށް އުރީދޫ އެމް-ފައިސާ މެދުވެރިކޮށްވެސް ފައިސާ ފޮނުވޭނެކަމަށެވެ.
އެގޮތުން އެމް-ފައިސާ މެދުވެރިކޮށް އެހީތެރިވާން ބޭނުންވާ އުރީދޫ އެޕްއަށް ލޮގިންވުމަށްފަހު ފޮނުވަން ބޭނުންވާ އަދަދެއް ޖައްސަވާ ޕޭމަންޓު ކޮންފާމު ކޮށްލުމުން ފައިސާ ފޮނުވޭނެކަމަށް އުރީދޫއިން ވަނީ ބުނެފައެވެ.
މިއީ އެމް-ފައިސާ މެދުވެރިކޮށް ޕާކިސްތާނަށް އެހީތެރިވުމަށް ކުރިއަށްދާ ޓެލެތޯނުގައި ބައިވެރިވާ ފަރާތްތަކަށް ޚާއްސަކޮށްގެން އުރީދޫއިން ހުޅުވާލި ފުރުސަތެކެވެ.
ވާރޭވެހި ފެންބޮޑުވުމުގެ ސަބަބުން އަވައްޓެރި ޕާކިސްތާނަށް ބޮޑެތި ގެއްލުންތަކެއް ލިބިފައިވާއިރު، އެ ގައުމުގައި ދިރިއުޅޭ ރައްޔިތުންނަށް ފައިސާގެ އެހީތެރިކަން ފޯރުކޮށްދިނުމަށް މިއަދު ވަނީ ޚާއްސަ ޓެލެތޯންއެއް ފަށާފައެވެ.
މިރޭގެ 12:00 އާއި ހަމަޔަށް ކުރިއަށް ގެންދާ މި ޓެލެތޯނުގައި ބައިވެރިވެ ކެރިފޯރުންތެރިކަން ހުރި މިންވަރަކުން އެހީތެރިކަން ފޯރުކޮށްދިނުމަކީ މޯލްޑިވްސް ޕާކިސްތާނު ފްރެންޑްޝިޕް އެސޯސިއޭޝަންގެ އިތުރުން ޕާކިސްތާނު އެމްބަސީގެ ވަރަށް ބޮޑު އެދުމެކެވެ.
Advertisement
This content is created and paid for by advertisers and does not involve Voice Journalists
