‏ޖުވާ ކުޅުމަކީ ޤުރުއާނާ ސުންނަތާ، އުއްމަތުގެ އިޖްމާޢު އިން ޙަރާމްކަމެއް ކަމުގައި އައިސްފައިވާއިރު އެކަމަށް އިންކާރު ކުރާމީހާ ޤުރުއާނަށް އީމާންނުވާ ކަމަށް ޖަމިއްޔަތުއްސަލަފްގެ ރައީސް އައްޝައިޚް އަބްދުﷲ ބިން މުހައްމަދު ވިދާޅުވެއްޖެއެވެ.

ރާއްޖޭގައި ކެސިނޯ ހިންގުން އެއްވެސް ގަވާއިދަކުން މަނާ ނުކުރާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވުމާއި ގުޅިގެން ޝެއިޚް އަބްދުﷲ މިއަދު ކުރެއްވި ޓުވީޓެއްގައި ވިދާޅުވީ، ޖުވާ ކުޅުމަކީ ޤުރުއާނާ ސުންނަތާ، އުއްމަތުގެ އިޖްމާޢު އިން ޙަރާމްކަމެއް ކަމަށާ، އިންކާރު ކުރާމީހާ ޤުރުއާނަށް އީމާންނުވާ ކަމަށެވެ. 

އަދި ދިވެހިރާއްޖޭގައި އެހެނިހެން ޖަރީމާތައް ޢާއްމުކުރުމަށް ޒާތްޒާތުގެ އުކުޅު ބޭނުންކުރާފަދައިން، ކެސިނޯ ތަޢާރަފް ކުރަން އެއްވެސް މީހަކު ފައި ނުނެގުމަށްވެސް ޝެއިޚް ވަނީ އިލްތިމާސްކުރައްވާފައެވެ. 

މީގެ އިތުރުން، އެފަދަ ނުބައި ކަންކަން ހުއްދަކުރަމުންދާއި ރައްޔިތުންގެ ޝުޢޫރުތައް ހިފަހައްޓައިގެން ތިބެވޭނީ ވަކިވަރަކަށް ކަން ފާހަގަކުރައްވައި ޝެއިޚް ވިދާޅުވީ، ހެޔޮ ޤާނޫނުތަކުގެ ބާރު ގަސްތުގައި ކަނޑުވާލައިގެން، ކޮންމެކަމެއް ކުރާން ދޫކޮށްލައިގެން އަބަދު ނުތިބެވޭނެ ކަމަށެވެ. 

"ހެޔޮ ޤާނޫނުތަކުގެ ބާރު ގަސްތުގައި ކަނޑުވާލައިގެން، ކޮންމެކަމެއް ކުރާން ދޫކޮށްލައިގެން އަބަދު ތިބޭނެކަމަށް ހީނުކުރާށެވެ. އެހާރުން ޤާނޫނު ތަންފީޒްކުރަން ނިކުންނާނީ ރައްޔިތުންނެވެ!" ޝެއިޚް އަބްދުﷲ ވިދާޅުވިއެވެ. 

ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލު ކުރުމުގެ ވަގުތުގައި، ކާށިދޫ ދާއިރާގެ މެންބަރު ޖާބިރު، ޔޫތު މިނިސްޓަރު އަހްމަދު މަހްލޫފާ ކުރެއްވި ސުވާލަކާ ގުޅިގެން، ރާއްޖޭގެ ރިސޯޓުތަކުގައި ކެސިނޯ ހިންގުން އެއްވެސް ގަވާއިދަކުން މަނާ ނުކުރާ ކަމަށް ރައީސް ނަޝީދު ވަނީ ވިދާޅުވެފައެވެ. 

ރިސޯޓުތަކުގައި ޕްރޮފިޓް ނުލިބޭ ކުޅިވަރުތައް ހިންގުމުގެ ބަދަލުގައި ކެސިނޯ ލައިސަންސް ދޭންޖެހޭ ކަމަށް ވިދާޅުވެ ޖާބިރު ސުވާލު ކުރެއްވީ، ކެސިނޯ އެޅުމަށް ޓޫރިޒަމް އިންޑަސްޓްރީއަށް ބޭނުންވާ ފައިސާ ހޯދުމަށް ޔޫތު މިނިސްޓްރީން ކުރަނީ ކިހާވަރެއްގެ މަސައްކަތެއްތޯ އާއި އެކަން ކުރުން މަނާކުރަނީ ކޮންތާކުންތޯ ކަމަށް ވިދާޅުވެއެވެ. 

އެ ސުވާލަށް ޖަވާބުދެއްވަން މިނިސްޓަރު މަހްލޫފަށް ފުރުސަތު އަރުވަމުން ރިޔާސަތުގައި އިންނަވައި ނަޝީދު ވިދާޅުވީ، ރާއްޖޭގައި ކެސިނޯ ލައިސަންސް ދޫކުރުމާ ގުޅޭގޮތުން ތަކުރާރުކޮށް ސުވާލު ކުރާ ކަމަށާއި، އެއީ އެއްވެސް ގަވާއިދަކުން މަނާކުރާ ކަމެއް ނޫން ކަމަށެވެ.

ޖާބިރުގެ ސުވާލަށް ޖަވާބުދެއްވަމުން މަހްލޫފް ވިދާޅުވީ ކެސިނޯއޭ ބުންޏަސް ރާއްޖޭގެ ރައްޔިތުންނަށް ގޯސްވާ ކަމަށާއި، ނަމަވެސް އެފަދަ ކަންކަމަކީ މުޖްތަމައުގައި މަޝްވަރާ ކުރެވެންޖެހޭނެ ކަންކަން ކަމަށެވެ.

".. މިއިން ތަނެއްގައިވެސް އަޅުގަނޑުމެންނަށް ކެސިނޯއޭ ބުންޏަސް، ވާހަކަ ފެށިޔަސް ގޯސްވޭ. އެ ނަން ކިޔަސް ވެސް ގޯސްވާ ހިސާބުގައި. އެހެންވީމަ އުޅެންޖެހެނީ އެންމެން ބޮޑު ބިރުވެރިކަމެއްގައި، މިއިން ކަމަކާ ގުޅިގެން މަޝްވަރާ ކޮށްލާނެ ޖާގަވެސް އޮންނަ ކަމަކަށް ނުވޭ" މަހުލޫފް ވިދާޅުވިއެވެ.