ފަތުރުވެރިކަމުގެ ސިނާއަތަށް 50 އަހަރު ފުލުހުން ސަރުކާރުން ކުލަ ގަދަކޮށް ފާހަގަކޮށްފައިވާ އިރު، ކުރު ފަސް އަހަރު ދުވަހުގެ މުއްދަތެއްގެ ތެރޭގައި އެ ސިނާއަތަށް އިންގިލާބީ ކުރިއެރުންތަކެއް ގެނެސްދެއްވި ކުރީގެ ރައީސް ޔާމީން އަބްދުލްގައްޔޫމަށް ފަތުރުވެރިކަމުގެ އެވޯޑު ދީފައި ނުވާތީ ގިނަ ފާޑުކިޔުންތަކެއް ސަރުކާރަށް ވަނީ އަމާޒުވެފައެވެ. 

ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި "ވޮއިސް" އިން ވަނީ ރާއްޖޭގެ ފަތުރުވެރިކަން ބޮއިކޮޓް ކުރުމަށް ގޮވާލި ފަރާތްތަކަށްވެސް ފަތުރުވެރިކަމުގެ އެވޯޑު ދީފައިވާއިރު، ފަތުރުވެރިކަމުގެ ސިނާއަތު ކުރިއެރުވުމަށް ގިނަ މަޝްރޫއުތަކެއް ހިންގަވާފައިވާދައިވާ ކުރީގެ ރައީސް ޔާމިންއަށް އެ އެވޯޑު ނުދިން ސަބަބަކީ ކޮބައިތޯ ރައީސް އޮފީހުގެ ތަރުޖަމާނުގެ އަރިހުން އައްސަވާފައެވެ. 

އެ ސުވާލަށް ޖަވާބުދެއްވަމުން ރައީސް އޮފީހުގެ ތަރުޖަމާނު މިއުވާން ވިދާޅުވީ ހައްގު ނޫން ފަރާތަކަށް އެވޯޑު ނުދެއްވާކަމަށެވެ. 

މިއުވާނުގެ ޖަވާބު ނިންމަވާލެއްވިއިރުވެސް ރައީސް ޔާމީންއަށް އެ އެވޯޑު ނުދިން ސަބަބު ހާމަކޮށެއް ނުދެވުނެވެ. 

ފަތުރުވެރިކަމުގެ ސިނާއަތަށް ޚިދުމަތްކޮށްދެއްވާފައިވާ ފަރާތްތަކުގެ އަގުވަޒަންކުރުމަށް ދޭ އެވޯޑު ކުރީގެ ރައީސް މުހައްމަދު ނަޝީދަށް އަރުވާފައިވާއިރު، ނަޝީދަކީ އެކި ފަހަރުމަތިން ރާއްޖޭގެ ފަތުރުވެރިކަން ބޮއިކޮޓް ކުރުމަށް ބައިނަލްއަގުވާމީ މައިދާންތަކުގައި ގޮވާލައްވާފައިވާ ބޭފުޅެކެވެ. 

އަނެއްކޮޅުން މި އެވޯޑު ރައީސް ޔާމިންއަށް ދެއްވާފައި ނުވިނަމަވެސް ކުރު މުއްދަތެއްގެ ތެރޭގައި އެ ދާއިރާ ކުރިއެރުވުމަށް އެ ވެރިކަމުގައި ކާމިޔާބު މަސައްކަތްތަކެއް ކޮށްދެއްވާފައިވާކަން ފާހަގަކޮށްލެވެއެވެ. 

އޭގެ ތެރޭގައި އެއަރޕޯޓު އަޕްގްރޭޑު ކުރުމުގެ މަސައްކަތް ފާހަގަކޮށްލެވެއެވެ. އަދި އެ މަސައްކަތުގެ ތެރެއިން ރާއްޖެއަށް އެންމެ ފުރަތަމަ ފަހަރަށް 1 މިލިއަން ފަތުރުވެރިން ޒިޔާރަތްކޮށްފައިވަނީ ރައީސް ޔާމީންގެ ވެރިކަމުގައި 2018 ވަނަ އަހަރުގައެވެ. އޭގ އިތުރުން އެއަރޕޯޓު ތަރައްގީ ކުރުމަށް ކުރެވުނު މަސައްކަތްތަކުގެ ނަތީހާއެއްގެ ގޮތުން އަހަރަކު 4.5 މިލިއަން ފަތުރުވެރިންނަށް ޚިދުމަތް ދެވޭ ވަރަށް އެއަރޕޯޓުގެ ގާބިލުކަން އިތުރުކުރެވުނެވެ. 

ރައީސް ޔާމީންގެ ވެރިކަމުގެ ފަސް އަހަރު 50 އަށް ވުރެ ގިނަ ރިސޯޓް ހުޅުވި އެވެ. އަދި އެނދުގެ އަދަދު 20،000 އަށް ވުރެ އިތުރު ކުރި އެވެ. 

50 ރިސޯޓާއި 300 އަށް ވުރެ ގިނަ ގެސްޓް ހައުސް ހުޅުވުމާއި، ފަތުރުވެރިކަމުގެ ސިނާއަތުގައި 10000 ވަޒީފާ 2019 ވަނަ އަހަރު އެކަނި އުފެއްދެވުމުގެ އިތުރުން ގްރީން ޓެކްސް ތައާރަފްކުރުން ފަދަ މުހިންމު މަސައްކަތްތައް ރައީސް ޔާމީންގެ ޒައާމަތުގައި ވަނީ ކުރެވިފައެވެ. 

ފަޅު ހިއްކައިގެން އިންޓަގްރޭޓެޑް ތަފާތު ކޮންސެޕްޓުގެ ރިސޯޓު ހަދަން ފުރުސަތު ދިނީ ވެސް ރައީސް ޔާމީން ވެރިކަމުގަ އެވެ. މިގޮތުން ޓޫރިޒަމަށް 25 ފަޅެއް ރައީސް ޔާމީންގެ ވެރިކަމުގައި ވަނީ ޓޫރިޒަމް ގާނޫނަށް ގެނައި އިސްލާހާއެކު ދޫކޮށްފައެވެ.