ހުޅުމާލޭގައި ހުރި ކޮންޓެއިނަރެއްގެ ތެރޭގައި ބަންދުކޮށްގެން އަންހެނަކު ގެންގުޅެފައިވާ ކަމަށް ޕަބްލިކް އިންޓެރެސްޓް ލޯ ސެންޓަރު (ޕީއައިއެލްސީ) އިން ބުނެފި އެވެ.
މި މައްސަލައިގެ މައުލޫމާތު އިއްޔެ މީޑިއާތަކާ ހިއްސާކުރީ ހިލޭ ސާބަހަށް ގާނޫނީ އެހީތެރިކަން ފޯރުކޮށްދޭ ޕަބްލިކް އިންޓްރެސްޓް ލޯ ސެންޓާ (ޕީއައިއެލްސީ)ންނެވެ.
ޕީއެލްސީ އިން ބުނީ، ވެލާނާ އިންޓަނޭޝަނަލް އެއާޕޯޓު ތަރައްގީ ކުރުމުގެ މަސައްކަތްކުރާ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) ގެ ބިދޭސީ މުވައްޒަފަކު ހަތް ދުވަސް ވަންދެން ބަންދުކޮށްގެން ގެންގުޅުނު ކަމަށެވެ. އަދި ބަންދުކޮށްގެން ގެންގުޅުނީ 32 އަހަރުގެ ޗައިނާ އަންހެނެއް ކަމަށް ވެސް ބުނެފައިވެއެވެ.
ޕީއައިއެލްސީން ބުނާ ގޮތުގައި އޭނާ ކޮންޓެއިނަރެއްގެ ތެރޭގައި ބަންދުކުރީ އެ ތަނުގައި މަސައްކަތް ކުރާ ޗައިނާގެ އެހެން އަންހެނަކާ އެކު ހިނގި ދެބަސްވުމަކަށް ފަހުއެވެ. ކޮންޓެއިނަރުގެ ތެރޭގައި ކުޑަ އެނދަކާއި ފާހާނާ ކުރަން އެއްޗެއް ބަހައްޓާފައި ހުރުން ފިޔަވައި އެހެން އެއްވެސް އެއްޗެއް ނެތް ކަމަށް ބުނެއެވެ. ބަންދުގައި ހުރި މީހާއަށް ކާން ދިނީ މީލް ޕެކް ކަމަށާއި ބޯނެ ފެން ވެސް ދިނީ ވަރަށް މަދުން ކަމަށް ޕީއައިއެލްސީން ބުނެއެވެ.
އަންހެން މީހާ ކޮންޓޭނަރުގެ ތެރޭގައި ބަންދުކޮށްފައި ހުއްޓާ ސަލާމަތްވީ ކޮންޓެއިނަރުގައި ހުރި ކުޑަދޮރެއް ފަދަ އެއްޗެއް ހަލާކު ކޮށްލައިގެން ކަމަށް ވެސް ޕީއައިއެލްސީން ބުނެފައިވެ އެވެ. އަދި އެ މީހާ ސަލާމަތްވުމާ އެކު އޭނާ އެންމެ ފުރަތަމަ ވެސް ދިޔައީ ހުޅުމާލޭ ޕޮލިސް ސްޓޭޝަނަށް ކަމަށާ،ނަމަވެސް، އެ ސްޓޭޝަނަށް ގޮސް މައްސަލަ ރިޕޯޓުކޮށް، ރައްކާތެރިކަން ދޭން އެދުމުގެ ބަޔާނެއް ހޯދުމަށް ފަހު ފޮނުވާލީ ކަމަށްވެސް ޕީއައިއެލްސީން ބުނެއެވެ.
އަދި ޖެހިގެން އައި ދުވަހު އޭނާ އެ ސްޓޭޝަނަށް ދިއުމުން ވެސް ކަންކުރީ މިގޮތަށް ކަމަށް އޭނާ ތުހުމަތު ކުރާ ކަމަށާ، އެ ފަހުން އޭނާ ހުޅުލޭ ފުލުހުންނާ މައްސަލަ ހިއްސާކުރުމުން، މަސައްކަތްތެރިިޔާ ބަންދުކުރި ތަނަށް ގޮސް މައުލޫމާތު ނެގި ކަމަށްވެސް އޭނާ މައުލޫމާތު ދީފައިވާ ކަަމަށް ޕީއައިއެލްސީން ބުނެފައިވެއެވެ. އަދި އޭނާ ބަންދުގައި ގެންގުޅުނު މައްސަލަ ހިއުމަން ރައިޓްސް ކޮމިޝަނަށް ވެސް ވަނީ ހުށަހަޅާފައެވެ.
ޕީއައިއެލްސީން ތުހުމަތު ކުރާ ގޮތުގައި ރާއްޖޭގެ ގާނޫނުތަކާއި ގަވާއިދުތަކާ ހިލާފަށް ބީޔޫސީޖީން މުވައްޒަފުން ގެންގުޅޭ ކަމަށެވެ. އެގޮތުން އެ ސެންޓަރުން ބުނި ގޮތުގައި، ބީޔޫސީޖީން މުވައްޒަފުން ގެންގުޅެނީ ރާއްޖޭގައި ރަޖިސްޓްރީ ނުކުރާ ކުންފުންޏަކާ އެގްރީމަންޓު ހަދައިގެންނެވެ. މިއީ ރާއްޖޭގެ ގާނޫނުތަކުން މަސައްކަތްތެރިންނަށް ލިބިދޭ ހިމާޔަތް ގެއްލިގެންދާނެ ފަދަ ގޮތަކަށް، ނިޒާމީ ގޮތެއްގައި ރޭވިގެން ހިންގާ އަމަލެއް ކަމަށް ޕީއައިއެލްސީން ބުންޏެވެ. މިއީ ވެސް މީހުން ޓްރެފިކް ކުރުން ހުއްޓުވުމުގެ ގާނޫނާ ހިލާފު ކަމެކެވެ.
Advertisement
This content is created and paid for by advertisers and does not involve Voice Journalists
