ފަނޑިޔާރުންގެ މައްސަލަތައް ބަލާ އިޖުރާއަތުތަކަށް ބަދަލު ގެނައުމަށް ސަރުކާރުގެ ފަރާތުން ޖުޑީޝަލް ސާވިސް ކޮމިޝަން (ޖޭއެސްސީ) ގެ ގާނޫނަށް ހުށަހެޅި އިސްލާހުތަކަށް ޖޭއެސްސީގެ ރައީސް އަދި ތުޅާދޫ ދާއިރާގެ އެމްޑީޕީގެ މެމްބަރު ހިސާން ހުސެއިން ތާއީދު ނުކުރެއްވި ނަމަވެސް ރައްޔިތުންގެ މަޖިލީހުގެ މެޖޯރިޓީ އާއި އެކު އެ ބިލް މިއަދު ފާސް ކޮށްފި އެވެ.
ޖޭއެސްސީީގެ ގާނޫނު އިސްލާހުކުރުމަށް ސަރުކާރުގެ ފަރާތުން ހުށަހެޅި ބިލަށް މާފަންނު އުތުރު ދާއިރާގެ އެމްޑީޕީގެ މެމްބަރު އިމްތިޔާޒް ފަހުމީ (އިންތި) ވެސް ވަނީ ދެ އިސްލާހެއް ހުށަހަޅުއްވާފައެވެ.
އެގޮތުން ހުށަހެޅުއްވި އިސްލާހުގައިވާ ގޮތުން، ފަނޑިޔާރުންގެ މައްސަލަ ބަލާ ތަހުގީގު ކޮމިޓީން މައްސަލައެއް ނިންމުމަށް ފަހު، ޖޭއެސްސީގެ މެމްބަރުންނަށް ފޮނުވާ ރިޕޯޓުގެ ކޮޕީއެއް މައްސަލަ ރައްދުވާ ފަނޑިޔާރަށް ވެސް ފޮނުވަން ޖެހެ އެވެ.
އެ ހުށަހެޅުމަށް ތާއީދު ކުރެއްވީ ހެންވޭރު ހުޅަނގު ދާއިރާގެ އެމްޑީޕީގެ މެމްބަރު ހަސަން ލަތީފެވެ.
އިންތިގެ އެ ހުށަހެޅުން ބިލުގައި ހިމެނުމާ މެދު މަޖިލީހުގައި ނެގި ވޯޓުގައި 53 މެމްބަރުން ތާއީދު ކުރެއްވި ނަމަވެސް ނަމަވެސް ޖޭއެސްސީގެ ރައީސްގެ މަގާމުގައި ހުންނެވި ތުޅާދޫ ދާއިރާގެ އެމްޑީޕީގެ މެމްބަރު ހިސާން ހުސެއިން ވަނީ އެ ގޮތަށް އިސްލާހު ފާސްކުރަން ނުފެންނަ ކަމަށް ވޯޓު ދެއްވާފައެވެ.
އަދި އިންތި ހުށަހެޅުއްވި އެ ދެ އިސްލާހާއު އެކު އެ ބިލު ފާސްކުރުމަށް މަޖިލީހުގެ މެންބަރުންގެ ވޯޓަށް އެއްސެވުމުން އެ ގޮތަށް ފާސްކުރަން 53 މެމްބަރުން ވޯޓު ދެއްވި އެވެ. އެކަމަކު، ހިސާން ވޯޓު ވަކި ކޮޅަކަށް ވޯޓެއް ނުދެއްވި އެވެ.
Advertisement
This content is created and paid for by advertisers and does not involve Voice Journalists
