ރާއްޖޭގައި މިހާތަނަށް އެޅުނު އެންމެ ބޮޑު ސްކޫލްގެ ގޮތުގައި ތަރައްގީކުރެވުނު ހުޅުމާލޭގެ ހުރަވީ ސްކޫލް ހުޅުވައިފިއެވެ.

މި ސްކޫލް މިއަދު ހެނދުނު ހުޅުއްވައިދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ.

މި ސްކޫލް ހުޅުވުމަށް ބޭއްވި ރަސްމިއްޔާތުގައި ނައިބު ރައީސް ފައިސަލް ނަސީމް، އެޑިއުކޭޝަން މިނިސްޓަރ ޑރ.އައިޝަތު އަލީ އަދި ދައުލަތުގެ އެހެން އިސްވެރިން ބައިވެރިވެ ވަޑައިގެންނެވިއެވެ.

ޕްރީސްކޫލުން ފެށިގެން އޭލެވެލް އާއި ހަމައަށް ތައުލީމް ފޯރުކޮށްދިނުމަށް ހުޅުވި ހުރަވީ ސްކޫލް ހުންނާނީ ހުޅުމާލޭގެ ނެއިބަރހޫޑް 1 ގައެވެ. މިއަދު މި ސްކޫލް ހުޅުވިގެން ދިޔައިރު އެލްކޭޖީއިން ފެށިގެން ގްރޭޑް 9 އާއި ހަމައަށް ކުދިން ތައުލީމް ހާސިލްކުރާނެކަމަށް އެ ސްކޫލްގެ ޕްރިންސިޕަލް އަބްދުﷲ ރަޝީދު މައުލޫމާތު ދެއްވައެވެ.

ހުރަވީ ސްކޫލްގައި ހަތް ބުރީގެ ތިން ބްލޮކް ހުންނާނެއެވެ. މި ސްކޫލަކީ ނުކުޅެދުންތެރިކަން ހުންނަ ކުދިންނަށް ސްކޫލްގެ ހުރިހާ ބުރިއަކަށް ވެސް ފަސޭހަކަމާ އެކު އެރޭނެ ގޮތަށް ފަރުމާ ކުރެވިފައިވާ ސްކޫލެކެވެ. އެގޮތުން އިމާރާތުގެ މެދުގައި ރޭމްޕެއް ހަދާފައިވެއެވެ. ހަމަ އެހެންމެ، ސްކޫލްގެ ދަރިވަރުން ބޭނުން ކުރުމަށް ދެ ލިފްޓް ވެސް ސްކޫލްގައި ހުންނާނެކަމަށް އެޑިއުކޭޝަން މިނިސްޓްރީން މައުލޫމާތުދެއެވެ.

ހުރަވީ ސްކޫލްގައި އެއް ފަހަރާ 1450 ކުދިންނަށް ކިޔަވައިދެވޭނެ ޖާގަ އޮންނާނެއެވެ. މި ސްކޫލްގައި 54 ކްލާސް ރޫމް ހުންނާނެއެވެ.