އިންޑިއާގެ އެފްކޯންސް ކުންފުނިން އައްޑޫ ސިޓީގައި ހަދަމުންދާ މަގުތަކުގެ ފެންވަރު ދަށް ކަމުގެ ޝަކުވާ ރައްޔިތުން ކުރަމުންދާކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ. 

ނިހާދު މިފަދައިން އެކަން ފާހަގަކުރައްވާ ކުރެއްވި ޓްވީޓެއްގައި ވިދާޅުވީ އައްޑޫގައި ހަދާ މަގުގެ ކޮލެޓީ ދަށްކަން ފާހަގަކޮށް ރައްޔިތުން އިންތިހާއަށް ޝަކުވާ ކުރަމުންދާކަމަށެވެ. 

އައްޑޫ ސިޓީގައި މަގު ހެދުމުގެ މަޝްރޫއަކީ އެތައް މިލިއަން ޑޮލަރެއްގެ މަޝްރޫއަކަށް ވާއިރު، އެފްކޯންސް ކުންފުނިން އެ މަސައްކަތް ކުރަމުންދަނީ ރަނގަަޅަށްތޯ ބެލުމަށް އާދޭހާއެކު ދަންނަވާކަމަށް މެމްބަރު ނިހާދު ވަނީ ވިދާޅުވެފައެވެ. 

ނިހާދުގެ އެ ޓްވީޓުަގައި ޕްލޭނިން މިނިސްޓްރީއާއި އައްޑޫ ސިޓީ ކައުންސިލްގެ އިތުރުން އެފްކޯންސް ކުންފުނީގެ ޓްވިޓާ އެކައުންޓުވެސް ވަނީ ޓެގުކުރައްވާފައެވެ. 

އިންޑިއަން އެގްޒިމް ލައިން އޮފް ކްރެޑިޓް ފެސިލިޓީގެ ދަށުން އައްޑޫ ސިޓީގައި ފެން ހިންދުމުގެ ނިޒާމު ޤާއިމުކުރުމާއި، މަގު ހެދުމުގެ މަޝްރޫޢު، މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން އެފްކޯންސް އިންފްރާސްޓްރަކްޗަރ ލިމިޓެޑާ ހަވާލުކޮށް އެއްބަސްވުމުގައި ސޮއިކޮށްފައި ވަނީ 21 ފެބުރުވަރީ 2021 ވަނަ ދުވަހު އެވެ.

730 ދުވަހުގެ ތެރޭގައި ނިންމުމަށް ކަނޑައަޅާފައިވާ މި މަޝްރޫޢުގެ އަގަކީ 77،630،898 (ހަތްދިޔަ ހަތް މިލިއަން ހަސަތޭކަ ތިރީސް ހާސް އަށް ސަތޭކަ ނުވަދިޔަ އަށް) އެމެރިކާ ޑޮލަރެވެ. އެއީ 1،197،068،447.16 ބިލިއަން ދިވެހި ރުފިޔާ (އެއް ބިލިއަން އެއް ސަތޭކަ ނުވަދިހަ ހަތް މިލިއަން ފަސްދޮޅަސް އަށް ހާސް ހަތަރު ސަތޭކަ ސާޅީސް ހަތް ދިވެހި ރުފިޔާ ސޯޅަ ލާރި) އެވެ.

މި މަޝްރޫޢުގެ ދަށުން އައްޑޫ ސިޓީގައި ގާތްގަނޑަކަށް 103 ކިލޯމީޓަރުގެ ފެން ހިންދާ ނިޒާމަކާއި، އައްޑޫގެ ހުރިހާ އަވަށްތަކެއް ހިމެނޭ ގޮތަށް ޖުމުލަ 40 ކިލޯމީޓަރުގައި ތާރު އެޅި، އިތުރު ގާތްގަނޑަކަށް 60 ކިލޯމީޓަރުގެ މަގުގައި ސިމެންތި ސްޓެބިލައިޒްޑް ލޭޔަރ އެޅުމަށް ވަނީ ހަމަޖެހިފައެވެ.

މީގެ އިތުރުން މިހާރު ތާރު އަޅާފައިވާ މަގުތަކުގެ ތެރެއިން ޖުމުލަ 3.4 ކިލޯމީޓަރުގެ މަގުގެ ރީސަރފޭސިންގެ މަސައްކަތް ކުރުމަށް ހަމަޖެހިފައިވާއިރު، އައްޑޫ ސިޓީ ހަންކެޑެ ހިމެނޭ ސަރަޙައްދުގައި މިހާރު ބޭނުންކުރަމުންދާ ލިންކް ރޯޑުގެ ހުޅަނގުން ހަންކެޑެއަށް ނާރާ ގޮތަށް ހިތަދޫ ގައުކެޑި އާއި މަރަދޫ ގުޅާލުމަށްޓަކައި 1.463 ކިލޯމީޓަރުގެ އައު ހަތަރު ލޭންގެ ޑީޓުއަރ ލިންކް ރޯޑެއްވެސް މި މަޝްރޫޢުގެ ދަށުން ގާއިމުކުރުމަށްވެސް ވަނީ ހަމަޖެހިފައެވެ. 

އެހެން ނަމަވެސް، އައްޑޫގައި އެފްކޯންސް އާއި ހަވާލުކޮށްގެން ކުރިއަށް ގެންދާ މަގު ހެދުމުގެ މަޝްރޫގެ ތެރެއިން އެ ކުންފުނިން މަސައްކަތް ކުރަމުންދަނީ ވަރަށް ފަރިވާކުޑަކޮށްކަން ރައްޔިތުން ފާހަގަކުރަމުންދާތީ އައްޑޫ ސިޓީގެ ފޭދޫ ދާއިރާގެ މެމްބަރު ނިހާދު ވަނީ ނުރުހުން ފާޅުކުރައްވާ، އެ މީހުންގެ މަސައްކަތް މޮނިޓާކޮށް، މަސައްކަތުގެ ފެންވަރު ރަނގަޅުކުރުމަށް ސަރުކާރުން މަސައްކަތްކުރުމަށް އެދިލައްވާފައެވެ.