ކީރިތި ޤުރުއާނުގެ ކުރީގެ ދިވެހި ތަރުޖަމާގައި ސަލާމްލެއްވި އީސާގެފާނާއި ގުޅޭ ގޮތުން ދޮގު ވާހަކަތަކެއް ލިޔެފައި ވީނަމަވެސް އަދިވެސް އެތަރުޖަމާތައް މިސްކިތްތަކު ގަޔާއި މާފުށީ ޖަލުގައިވެސް ބަހައްޓާފައި ހުންނާތީ ދީނީއިލްމުވެރިޔާ އައްޝައިހް އާދަމް ނިޝާން ކަންބޮޑުވުން ފާޅުކުރައްވައިފިއެވެ.
މި މައްސަލަ އާއްމުންގެ ސަމާލުކަމަށް ގެނައުމަށް ޝައިހް ނިޝާން ޓްވިޓާގައި އާއްމުކުރެއްވި ވީޑިއޯ އަކާއި ފޮޓޯތަކެއްގައި ވަނީ ކުރީގެ ޤުރުއާނުގެ ދިވެހި ތަރުޖަމާގައި އީސާގެފާނާއި ގުޅޭ ގޮތުން ހުރި ދޮގު ވާހަކަތައް ފާހަގަކުރައްވާފައެވެ.
އެގޮތުން ޝައިހް ނިޝާން ހިއްސާކުރައްވާފައިވާ ތަރުޖަމާގެ 514 ވަނަ ޞަފްޙާ ގައި "ފަހުގެ އިލްމުވެރިންނަށް" އިޝާރާތް ކުރައްވާ ޕާކިސްތާންގެ އިލްމުވެރިންތަކެއްގެ ނަން ލިޔުއްވުމަށްފަހު، ލިޔެފައި އޮންނަނީ އީސާއަލައިހިއްސަލާމް ސޮލީބަށް ނޭރުވޭ ކަމަށާއި ޔަހޫދީންގެ ކިބައިން އެކަލޭގެފާނު ސަލާމަތް ކުރެއްވި ކަމަށެވެ. ނަމަވެސް އޭގެފަހުން 150 އަހަރު ދުނިޔޭގައި އުޅުއްވުމަށްފަހު އެކަލޭގެފާނު ވަނީ ތޮބީއީ އަވަހާރަވުމަކުން އަވަހާރަވެ ސުވަރުގެ ވަޑައިގެންފައި ކަމަށް އެތަރުޖަމާގައި ލިޔެފައި އޮވެއެވެ.
ޢީސާ ޢަލައިހިއްސަލާމްއާއި ގުޅޭ ގޮތުން ދޮގު ވާހަކަތައް ލިޔެފައިވާ ޞަފްޙާ
ޝައިހް ނިޝާން ވިދާޅުވީ އެއީ ކީރިތި ޤުރުއާނާއި އިމާމް މުސްލިމް ރިވާ ކުރައްވާފައިވާ ރަސޫލާ ޞޢވ ހަދީޘް ކުރައްވާފައިވާ ހަދީޘް ބަސްފުޅުތަކާއި ވެސް ހިލާފު ވާހަކަތަކެއްކަމަށެވެ.
މިކަންކަން ފާހަގަކުރައްވައި ޝެއިޚް ނިޝާން އިތުރަށް ވިދާޅުވީ، މިފަދަ ބޮޑެތި މައްސަލަތައް ތަރުޖަމާގައި ހުރި އިރު އަދިވެސް އެ ތަރުޖަމާ މިސްކިތްތަކުގައި ހުންނަ ކަމަށެވެ. އަދި އެކަން އިސްލާމިކް މިނިސްޓަރ އަހްމަދު ޒާހިރާއި ހޯމް މިނިސްޓަރ އިމްރާންގެ ސަމާލުކަމަށް އެކި ގޮތްގޮތުން ސަމާލުކަމަށް ގެނެސްފައިވާ ކަންވެސް ޝެއިޚް ނިޝާން ފާހަގަކުރެއްވިއެވެ.
އަދި ޔޯގާ މައްސަލައިގައި ހައްޔަރު ކުރުމުން ދޫނިދޫގައި ތިބި ފުލުހުންގެ އެންމެ އިސްވެރިންނާއި ވެސް މިކަން އެތައް ފަހަރަކު ހިއްސާކޮށްފައި ވާނެކަމަށާ އެހެންނަމަވެސް ޖަލުން ނެރުނު އިރުވެސް އެތަނުގައިވެސް އެ ތަރުޖަމާތައް ހުރި ކަމަށް ޝައިހް ނިޝާން ވިދާޅުވިއެވެ.
އެހެންކަމުން ކުރީގެ ރައީސް ޔާމީން އަބްދުލްގައްޔޫމް ޢީސާ ޢަލައިހިއްސަލާމް ފާސްދާނު ލެއްވިފައިވާ ކަމަށް އޮޅިގެން ވިދާޅުވުމުން އެ ވާހަކަފުޅަށް ރައްދުދެއްވާ ހޯމް މިނިސްޓަރ އިމްރާން ދެއްކެވި ވާހަކަފުޅުތަކަކީ ތެދުވެރި އިހްލާސްތެރިކަމާއިއެކު ދެއްކެވި ވާހަކައެއްނަމަ މިއަދު އާރާއި ބާރު ލިބިފައިވާއިރު މިގޮތައް ލިޔެވިފައި ހުރި ކުރީގެ ޤުރުއާން ތަރުޖަމާތައް ރާއްޖޭގެ މިސްކިތްތަކުންނާއި ޖަލުތަކުން އަދިވެސް ނުނަގާ ބަހައްޓާފައި އެހެރީ ކީއްވެތޯ ޝައިހް ނިޝާން ވަނީ ސުވާލު ކުުރައްވާފައެވެ.
ގުރުއާނުގެ ކުރީގެ ތަރުޖަމާގައި އެފަދަ އެތައް ކުށެއް ހުރުމުގެ ސަބަބުން އެ ތަރުޖަމާގައިވާ އެފަދަ ކުށްތައް އިސްލާހު ކޮށް އައު ތަރުޖަމާތައް ނެރެފައިވީ ނަމަވެސް، އަދިވެސް ކުރީގެ ތަރުޖަމާތައް ގިނަ މިސްކިތް ތަކުގައި ހުންނަކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
